Elder Carlos A. Godoy
Mataveiliutaki ni Vitusagavulu
Ena mua ni 1980 vakacaca, se qai vagalalataki ga mai na bisopi o Elder Carlos A. Godoy. Se qai tauri vola wale mai na vulitorocake, cakacaka tiko ena dua na kabani vinaka, ka nanuma ni na sega ni vinaka cake tale na bula—me yacova ni mai sikovi koya e dua na itokani makawa.
A vakacaucautaki koya na itokani oya ia a qai taroga e dua na taro ka vakavuna nona veilecayaki: “Kevaka o tomana tiko na bula o bulataka tiko, ena yaco beka na veivakalougatataki e yalataki tu ena nomu veivakalougatataki vakapeteriaki?”
A qai kila o Elder Godoy ni gadreva me cakava na veisau kevaka e vinakata me ciqoma na nona veivakalougatataki kece e yalataki tu. E dina ni sa vaka e vakacegu tu nona bula, e nanuma me saga e dua na masita diqiri. A biuta nona cakacaka, volitaka na veika kece e taukena, ka biuta na vanua e kila vinaka o Brazil kei na nona matavuvale me laki vuli ki Amerika.
E kaya o Elder Godoy ka a kacivi ki na Mataveiliutaki ni Vitusagavulu ena 31 ni Maji, 2018, na veika oya sa vakavulica vua e vuqa na ka me baleta na vakabauta nona ituvatuva na Turaga ka tuvakarau mo biuta na veika sa matau tu vei iko.
“Au kila ni tu nona ituvatuva na Turaga ena vukuda ena bula oqo,” e vakadinadinataka o koya ena koniferedi raraba ni Okotova 2014. “E kilai keda o Koya. E kila o Koya na ka vinaka duadua vei keda. Ena vuku ga ni sa toso vinaka na bula e sega ni kena ibalebale meda kakua sara ni nanuma ena veigauna eso ni sega na veika e vinaka cake.”
A tokoni o Elder Godoy me Vakaitutu Raraba ena Vitusagavulu ena ika 5 ni Epereli, 2008. E veiqaravi tiko o koya vaka-Peresitedi ni iWasewase na Ceva kei Amerika Vuaira ka na laki taura nona itutu ena Mataveiliutaki ni Vitusagavulu ena 1 ni Okosita, 2018.
Ni se bera ni kacivi ki na Vitusagavulu, a cakacaka o Elder Godoy vakamanidia ni ivurevure vakatamata ena rua na kabani lelevu ni se bera ni tekivutaka nona kabani ni veivakasalataki. A rawata e dua na diqiri ni bejila ni veika vakailavo kei na vakadidike ni politiki mai na São Paulo Pontifical Catholic University ena 1987 kei na dua na masita diqiri ni itovo vakaivakarau ena Univesiti na Brigham Young ena 1994.
Sa veiqaravi oti o Elder Godoy vakadaukaulotu tudei ena Tabana ni Kaulotu na Brazil São Paulo South, bisopi, lewe ni matabose e cake, itini ni welefea ena yasana, Vitusagavulu ni iWasewase, ka peresitedi ni Tabana ni Kaulotu na Brazil Belém.
A sucu o koya mai Porto Alegre, Brazil, ena 4 ni Feperueri, 1961. A vakamautaki Mônica Soares Brandao ena Maji ni 1984, ka va na luvedrau.