Elder Terence M. Vinson
Mataveiliutaki ni Vitusagavulu
E vakabauta o Elder Terence M. Vinson ni sega vakadua ni yawa sara na iVakabula. “Sa dau voleka e veigauna, vakabibi ena veivanua tabu kei na gauna ni leqa,” a vakadinadinataka ena koniferedi raraba ni Okotova 2013. “Ena so na gauna, ena gauna sara ga au sega kina ni namaka, au dau vakila ni voleka sara ni vaka me tavia na tabaqu meu vakila ni lomani au o Koya.”
Ena dua na gauna, ni rau taubale tiko o Elder Vinson kei Elder Jeffrey R. Holland ena Kuoramu ni iApositolo Le Tinikarua, a taubena na ligana o Elder Holland e tabai Elder Vinson ka tukuna vua ni lomani koya. E kaya kina o Elder Vinson, “Au vakabauta ni kevaka meda na taubale vata tu kei na iVakabula, eda na vakila ni na vakataqara na ligana e tabada me vaka sara ga o ya.”
E kaya o Elder Vinson, ka a tokoni me Mataveiliutaki ni Vitusagavulu ena 31 ni Maji, 2018, ni loloma ni Kalou “e kamica duadua ni da vakila.”
O Elder Vinson, ka na tekivuna nona ilesilesi vou ena 1 ni Okosita, 2018, a tokoni me Vitusagavulu Vakaitutu Raraba ni Lotu ena 6 ni Epereli, 2013. Ena gauna oya, a lewena voli kina na ika walu ni Kuoramu ni Vitusagavulu ena iWasewase ni Pasifika. Ena gauna oqo e veiqaravi tiko vaka-Peresitedi ni iWasewase ena ra kei Aferika.
A rawata o Elder Vinson e dua na koroi ni bejila ni fika kei na wiliwili, kei na diploma ni vuli kei na veivakavulici, kei na diqiri na masita ena cakacakataki ilavo. Nona cakacaka e oka kina na veivakavulici, veituberi, kei na veivakavulici ena univesiti. Sa cakacaka ga vakalevu o koya vakadauvakasala vakailavo kei na vakatulewataki ilavo.
Ni vakadikeva tiko na Lotu ni se itabagone qase cake, a ciqoma o Elder Vinson na veivakauqeti kaukauwa vakayalo. A vakila vakamatata ni dodonu me lewena na Lotu me rawa kina ni toso ka kunea na isau ni nona taro se vo tu. A papitaiso ka vakadeitaki ena macawa ka tarava.
Mai na gauna ko ya lako yani, “Au sa kila na ka e vinakata na Turaga meu cakava kau kila ni noqu taro kece e tu na kena isau.”
Tekivu mai na nona papitaiso ena 1974, sa veiqaravi o Elder Vinson vaka: daunivakasala ena matabisopi, bisopi, lewe ni matabose e cake, daunivakasala ena mataveiliutaki ni iteki, mata ni yasana, daunivakasala ena mataveiliutaki ni kaulotu, liganicakacaka ni valetabu, ka Vitusagavulu ni iWasewase.
A sucu mai Serene, Ositerelia, ena 12 ni Maji, 1951. A vakamautaki Kay Anne Carden ena Me 1974. Erau nodra itubutubu e ono na gone.