Totoina o Fatu o le Talalelei i le Loto o Lou Tina
E alala le tusitala i Iuta, ISA.
Na ou faia mea uma na mafai ona ou mafaufau i ai e aoao ai lou tina e uiga i le Ekalesia, ae o se faletatala o le malumalu na faia ai se eseesega tele lava.
Ata mai le Getty Images
Sa ou auai i le Ekalesia ina ua 14 o‘u tausaga. Na tuuina mai e ou matua le faatagaga ia papatiso, ae e leai se tasi o i laua na fia auai pe e oo lava foi i le aoao e uiga i le Ekalesia.
Mo le sili atu i le 10 tausaga, sa ou moomoo ai lava mo lou aiga ia iloa le fiafia na ou lagonaina i le talalelei toefuataiina a Iesu Keriso, ae i totonu o lena 10 tausaga, na ou auai i le lotu, mauaina ou faaeega paia, ma auauna atu i se misiona faafaifeautalai e aunoa ma se lagolago a lou aiga.
Ina ua ou foi mai le fale i Mekisiko ina ua uma lau misiona i le Lotoa o le Malumalu i le Aai o Sate Leki, Iuta, ISA, na ma nonofo ma lou tina. (Na tetea ou matua ao ou i ai i le aoga maualuga.) Na amata ona ou galue i le Nofoaga Autu e Aoao Ai Faifeautalai a Mekisiko, o lea na ou valaaulia ai loa o ia ma le poto ia sau e feiloai i alii ma tamaitai faifeautalai sa ou aoaoina. Na ou valaaulia ma le faaeteete lava (ae o nisi taimi e le faaeteete tele) faifeautalai o loo auauna i lau uarota e faatasi ma i maua ma lou tina mo se aiga o le afiafi. Na ou faia mea uma lava na ou mafaia ia i ai o ia faatasi ma faifeautalai, ma le faamoemoe o le a mafai ona ia fesili atili e uiga i le talalelei, ae na le manuia au taumafaiga uma lava.
Ou te manatu na ia feiloai i soa taitasi uma lava o faifeautalai na ou feiloai i ai i totonu o lena vaitau o le tolu-tausaga, ae leai lava se mea na tupu.
I le 2008, na ou siitia atu ai i le Iunaite Setete e saili sou tikeri i le tausi soifua. I le latalata i le faaiuga o lena tausaga, i le mavae ai o se faafouga tele, na faia ai e le Malumalu o le Aai o Mekisiko i Mekisiko se faletatala. Na ou uunaia lou tina e alu e vaai i mea uma e faatatau i le malumalu ao ia maua lenei avanoa. I le mavae ai o le tele o faamalosiauga i lau vaega, na ia malie mai e faia se tietiega e 70-maila (113 km) ia auai i le faletatala.
Ina ua ou toe talanoa atu ia te ia, sa ia talanoa fiafia mai e uiga i se aafiaga ofoofogia na ia maua. Na ia tau mai ia te au e faapea na ia faia ni fuafuaga e toe alu foi. O le mea moni, na mafai ona ia alu i le tele o isi taimi i vaiaso o totoe o le faletatala. Na oo lava ina auai atu foi i le faafiafiaga faaleatunuu ao lei faia le faapaiaga o le malumalu.*
O le isi taimi na ma talanoa ai i le telefoni, na tau mai ai e Tina ia te au o le a ia valaaulia faifeautalai e aoao o ia. E foliga mai e aunoa ma se uunaiga, sa ia faia ni fesili ma taulai atu i ni auala na leva ona ou faamoemoe i ai. Ina ua ou alu i le fale i le taimi o le Kerisimasi, na ou vaaia ua ese lava o ia. Ao avea o ia i taimi uma lava o se tagata agalelei ma agaalofa, na i ai se suiga loloto i totonu ia te ia—o se liua tele.
Na ou toe foi atu i le aoga ma le ofo i le mea ua tupu. I se vaiaso mulimuli ane, na valaau mai ai Tina ma fai mai, “Sonia, na o lou fia iloa lava po o afea e te toe sau ai i Mekisiko, aua o le a ou papatiso.“
Sa ou matuai olioli lava, matuai fiafia lava! Na ou lele [mai i le vaalele] i le fale ia Fepuari mo lona papatisoga. O se mea ofoofogia ia te au le vaai atu ia te ia ua auai i le lotu, le vaai ia te ia ua taliaina ma auauna i se valaauga, ma tuputupu ae i le talalelei. Na ou iloaina sa ia iloaina e moni le talalelei.
Na mamana foi le faalogo ia te ia o tatalo. Na faapitoa lava lou ootia i le faalogo ia te ia o tatalo mo au ma lou saogalemu ae ou te lei toe foi atu i le Iunaite Setete. E leai se mea e pei o le tatalo a se matua mo se tamaitiiti.
Aisea e lei tutupu vave ai ni mea? Ou te le iloa. Atonu na manaomia e lou tina ia totoina ni fatu i lona olaga ae lei mafai ona ia taliaina le talalelei. Atonu o le malumalu na pai atu ia te ia i se ala ma i se taimi na le mafai e au taumafaiga muamua ona faia. O le vaaia o le galue ai o le Alii i le olaga o lou tina ua faamanatu mai ai ia te au taimi na ou vaaia ai Lona aao i lou lava olaga, ma ua tuuina mai ai ia te au le faamoemoe maoae mo mea e mafai ona Ia tatala mai i olaga o isi tagata o lou aiga.
Ou te iloa e silafia e le Alii i tatou ma Na te taialaina o tatou olaga. Pe a ou tuuina atu ia te Ia e taitaia lou olaga, ou te iu ane i nofoaga sao. Pe a ou mulimuli i lou lava manao, e fai sina umi ma e masani lava ona faigata atu. E sili ia au le tuu atu i le Alii e faaofo au ma faaali mai ia te au mea maoae ua Ia faapolopolo mo au.