Ua Matua Tele Lava Lou Olioli Faatasi Ma Ia
O lo tatou Tama Faalelagi ma Lona Alo o Iesu Keriso o loo i ai se alofa le mafuatia mo i tatou taitoatasi. Na aoao i tatou e Iesu Keriso i le mea lenei:
“Aua ua sau le Atalii o le tagata e faaola i le na le iloa. Pe ni a fa outou? ai se tagata o i ai mamoe e selau, afai e se le tasi, na te le tuua ea le ivagafulu ma le iva i mauga, a e alu o ia e saili i le na se? Afai foi na te maua, e moni, ou te fai atu ia te outou, e tele lona olioli i lea, a e itiiti i le ivagafulu ma le iva e lei se. E faapea lo outou Tama o i le lagi, e le finagalo ia ina ia fano se tasi o i latou nei e faatauvaa” (Mataio 18:11–14).
O le faauuga o le valaauga paia o se Fitugafulu ua aofia ai se tiute paia na faaali mai e le Alii: “O le Toafitugafulu e galulue i le suafa o le Alii, i lalo o le taitaiga a le Au Peresitene o le Ekalesia, e tusa ai ma le faatulagaga a le lagi; e ati a’e le ekalesia, ma pulea mataupu uma o lea lava ekalesia i atunuu uma, muamua i nuuese ona oo atu ai lea i tagata Iutaia,” (MF&F 107:34).
Sa ou malaga talu ai nei i le motu o Manihi mo se konafesi faaleitu faatasi ma se fesoasoani o le misiona, o Peresitene Nauta. A o fono feiloai ma talatalanoa ma le Peresitene o le paranesi, sa matou lagona le matuitui o mafatiaga o loo ia oo i ai ona o se fevaevaeaiga i totonu o le paranesi. “Sa toetoe lava a ou le lavatia faanoanoaga … ua le toe o mai lo’u tama ma o’u uso ma tuafafine i le lotu talu ona valaauina a’u o le peresitene o le paranesi,” sa ia faailoa mai ai. Na matou lagona se uunaiga e tuu atu ia te ia se faamanuiaga faaleperisitua ae matou te lei tietie atu i uila i le aiga. A o matou feiloai ai ma lona faletua, na matou faamautinoa atu ia i latou, e le o tuua na o i latou i o latou tauiviga ma o loo latalata mai le Faaola ia i latou.
Sa manino lava le tele o a matou asiasiga laveai e faatino ma feiloai ma faamanuia ia tagata. O le fetalaiga a le Alii sa toe tatagi i o matou mafaufau: “O le mea lea, ia e faamaoni; tu i le tofi ua Ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai” (MF&F 81:5).
I lena aoauli o le Aso Faraile, na matou faia ni vaega se lua, ma sa ou asia ai le aiga o Mao sa nonofo i ni nai mita mai le falesa. Ua uma ona faamauina o ia i lona aiga ma e toatolu ni ona alo aulelei, o le tasi na fanau i le feagaiga, ae peitai ua latou le toe auai mai i le lotu mo ni nai tausaga. Na matou aoao atu ia i latou le alofa o lo tatou Tama Faalelagi ma molimau atu i le mana o le Togiola i o latou olaga pe afai latou te tuu atu lo latou faatuatua i lo tatou Faaola o Iesu Keriso ma lafoai ese a latou mea sese. Na matou faailoa atu lo matou alolofa tele mo i latou ma tuuina atu se faamanuiaga faaleperisitua ma valaaulia i latou e o mai i le Faaola ma auai i sauniga o le konafesi: “Ioe o le a matou [o atu],” na la fai mai ai.
O le aso na sosoo ai na faaauau pea matou asiasiga i ni nai aiga ma o se tasi o i latou o Ioane, o le uso o le peresitene o le paranesi ma lona aiga. Ua leva tausaga latou te lei toe auai mai i le lotu. E toafitu lana fanau ma e sili atu ma le toasefulu fanau a fanau: o le aofaiga o lona lava ia aiga e toaluasefulu. Na matou faailoa atu lo matou alolofa mo i latou ma le alofa o lo tatou Tama Faalelagi mo i latou ma sii atu i ai le mau lenei: “Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou? Ioe e moni ou te fai atu ia te outou, afai tou te o mai ia te au, o le a outou maua le ola faavavau. Faauta ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou e o mai ia te au. Faauta o Au o Iesu Keriso le Atalii o le Atua. O au na foafoaina le lagi ma le lalolagi, ma mea uma o i ai …” (3 Nifae 9:13–15)
Na matou molimau atu i le alofa o le Tama i le Lagi ma le Faaola mo i latou ma fesili atu ia i latou, “O le a lua o mai ea i le Faaola e ala i le saunia o oulua ma le lua aiga e o atu i le malumalu?” “Ioe o le a ma faia,” sa la tali mai ai. Na matou fesili atu pe o le a latou auai i sauniga o le konafesi. “Ioe o le a matou [auai],” ma latou ataata mai.
I le sauniga o le Aso Sa, e toa 135 e na auai mai, na faaluaina le toatele i lo se Aso Sa masani. E toatele ni aiga na toe foi mai, ma na faia le molimau a Ioane ma sa lagolagoina e avea ma failautusi o le paranesi i le sauniga aoao. O se fiafiaga sili le vaai atu i atalii o le Atua ua toe foi mai i le aiga ma auauna atu i le Faaola. Sa lofituina le peresitene o le paranesi ma lagonaina le filemu ma le olioli a o ia vaaia le faatinoga o ni vavega i ona luma.
Ou te molimau atu o le a faatasi atu lo tatou Alii o Iesu Keriso i e uma e umiaina le perisitua i le lalolagi atoa ma toe aumaia le mamoe na se i le lafu. Ou te molimau atu o le a Ia aumaia le filemu ma le olioli pe a tatou valaaulia o Ia i o tatou olaga, I le suafa paia o Iesu Keriso, amene.