Sailiga mo Tuaa ma le Mauaina o le Meamoni
Yuri Siqueira Zanini
Rio de Janeiro, Pasila
Ata na tusia e Truina Dalziel/Lilla Rogers Studio
Sa ou fiafia e aoao e uiga i ou tuaa Italia, o lea na ou amata ai ona sailia lou gafa i ni nai tausaga ua tuanai. E leai se aso ou te le faia ai sina sailiga ia maua i latou. I le iuga, na ou mauaina le pepa fanau a le tama o lou tama-matua lona tolu mai Italia. O le mauaina o lana pepa na ou ootia ai i se ala lea na ou lagonaina ai e tatau ona ou faaauau pea le sailiga mo ou tuaa.
A o ou faia, sa ou mauaina le tele o tuaa ou te lei faalogo lava muamua i ai. Na ou feiloai foi i se tamaitai talavou e ala i le agafesootai e igoa ia Ingrid Zanini. Na ma iite atonu ma te aiga i se ala aua e tutusa o ma faaiu. I le ma talanoaga, na tau mai ai e Ingrid ia te au o ia o se tagata o Le Ekalesia a Iesu Keriso o le Au Paia o Aso e Gata Ai. Sa ia talanoa mai ia te au e uiga i le Ekalesia, ma fai mai o le a ia auina mai ia te au se kopi o le Tusi a Mamona. O le taimi lava na taunuu mai ai le tusi, na ou amata faitauina loa.
I se tasi aso i le galuega, na iloa ai e se tamaitai talavou e igoa ia Erika na i ai lau Tusi a Mamona ia te au. O le a le galo lava ia te au le vaaiga i ona foliga—na matuai fiafia lava o ia ma olioli. Na ia fesili mai pe na ou fiafia i le tusi ma pe ou te fia alu faatasi ma ia ma lona tuagane i le lotu. E lua vaiaso talu ona maua le Tusi a Mamona, ae ou auai i le lotu mo le taimi muamua.
O le lesona i lena aso i le Aoga Sa o le papatisoga mo e ua maliliu ma le taua o talafaasolopito o aiga. Sa matuai ou fiafia lava. Na ou feiloai i faifeautalai ma auai i se fonotaga e uiga i le talafaasolopito o aiga i lena aoauli i le nofoaga autu o le siteki. Ao ou sailiili i le Ekalesia, na mafai ona ou lagonaina le faatasi mai o ou tuaa, ma na ou lagonaina le uunaiga e aoao atili.
Ina ua valaaulia au e faifeautalai ia papatiso, na ou taofi sei mafaufau e uiga i mea uma lava na tutupu talu ona ou amata faia lou talafaasolopito o aiga. O le faafeiloai atu i le talalelei ma aoao e uiga i le taua e faavavau o le talafaasolopito o aiga e le mafai ona faapea ua na o se mea na tupu faafuasei. Na ou taliaina le valaaulia a faifeautalai ina ia papatisoina.
O loo ou faia pea talafaasolopito o aiga, ma ou te faafetai i le iloaina o au taumafaiga i le sailiga o ou tuaa ua mafai nei ona aumaia faamanuiaga e faavavau ia i latou aua na ou maua le talalelei a Iesu Keriso.