Aiga: O Le Vaipuna o le Fiafia
Saunia e Elder Erich W. Kopischke
O Le Fitugafulu
Mai se saunoaga i le faigalotu, “O le a le Mea E Te Vaai i ai i le Soifuaga?” na tuuina atu i le Iunivesite o Polika Iaga–Idaho i le aso 2 Tesema, 2014. Mo le tusiga atoa i le faaPeretania, asiasi i le speeches.byu.edu.
Manatunatu loloto i le aoaoga faavae o aiga e faavavau, ma ia iloa e oe lava mea e silisili ona taua.
O le mataupu o aiga ma le soifuaga i aiga o se puna moni o le fiafia ua faavaivaiina lava i ni nai tausaga e le mamao atu nei. Ua osofaia le aiga e masani ai mai le tele o puna o le lalolagi aoao. (I le itulau 18 o lenei tusiga o loo saunoa ai Elder Quentin L. Cook i nisi o nei osofaiga.) Ae i ai nisi o tulaga fita e le mailoa ma mautinoa e faasino i nisi o i tatou e iloa le taua, paia, ma le taunuuga e faavavau o le aiga.
Ona o aafiaga a le lalolagi ma ana faatosinaga, o le faatupulaia pea o le naunau e faataunuu manaoga o le tagata lava ia, ma le mananao mo le filemu ma le faia o mea faigofie, ua avea ma mea mamafatu i o tatou aiga ma lo tatou fiafia. I le tele o taimi, ua faamatalaina le fiafia i o tatou olaga e le tulaga moomia “atoatoa ma saoloto,” ua tatou faamoemoe e ausia ma tumau ai i le uiga o le “itiiti le galue, ae tele le mea e maua mai ai”.
Ae e le faapea le tulaga o le soifuaga. Sa lei fuafuaina lava e faigofie. Na fetalai mai le Alii e ala mai i le Perofeta o Iosefa Samita: “Aua a tuanai faigata e tele o le a oo mai faamanuiaga. O le mea lea, e oo mai le aso o le a faapaleina ai outou i le mamalu tele” (MF&F 58:4).
Faauuina e le Atua
Ua faaalia manino mai e le Alii le ala e atiinaeina ma faatumauina ai aiga malolosi. Ua uunaia i tatou uma e suesue ma ola ai i mataupu faavae o loo faatulaga mai i totonu “O Le Aiga: O Se Folafolaga i le Lalolagi.” Ma lenei foi, e ao ona tatou malamalama o le maua o le malosi patino ma le fiafia mai le soifuaga faaleaiga e manaomia ai le ositaulaga ma le faatuatua.
Ua tauina mai e le folafolaga i le aiga “o le faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga e faavavau o Ana fanau.” Ua faapea mai foi “o le poloaiga a le Atua i Lana fanau ia fanafanau ma uluuluola i le lalolagi, ua faamalosia ma faatumauina.”1
Mo le toatele o tagata, o le faatusa ma le faamoemoega o le aiga ua matuai suia lava. Ua faatupulaia pea ona faaaoga e le nuu ia le faatulagaga o le faaipoipoga ua taua o le “soa vavalalata”, e taulai i manaoga ma lagona o tagata matutua e faatusatusa i manaoga o fanau. O lona iuga, o le toatele ua ulu atu i le faaipoipoga pe a mavae se masaniga mo se taimi umi ae le o le agai i luma pe a tuanai se faamasaniga talafeagai. O le maua o le soa e fetaui lelei, o le tau faataitai o se mafutaga e ala i le nonofo faapouliuli e aunoa ma faamanuiaga o le faaipoipoga, po o le faamauina o se soifuaga tamaoaiga e lagolagoina e se maliega malosi ua avea ma faiga masani i le toatele a o lei filifili e faaipoipo.
Ae ua aoao mai i tatou e tusitusiga paia ma perofeta o aso nei i lenei. Tatou te fausia a tatou faaipoipoga i le faavae o le ola mama ma le faamaoni, ma le faamoemoe e atiinae ma tausia se aiga. Na aoao mai Peresitene Spencer W. Kimball (1895–1985): “E toatele ua talanoa ma tusitusi tetee atu i le faaipoipoga. E oo lava foi i nisi o a tatou foi faaipoipoga faatuai ua finau tetee iai. … Matou te valaau atu i tagata uma lava ina ia talia [tu ma aga masani] o le faaipoipoga o se faavae mo le fiafia moni. … O le faavae lava o le faaipoipoga e amata ai se aiga.”2
A o ma laiti ma lou toalua o Christine, o saunoaga nei a lo tatou perofeta soifua, ma e sa tatou talitonu ma mulimuli i ana timaiga. Sa ma tootutuli i le fata faitaulaga o le Malumalu o Bern Suitiselani, ua na o le 20 ma le 22 tausaga le matutua. Sa agavaa i maua mo le feagaiga, sa leai so ma iloa o le mea o le a tupu, e leai so ma tomai i ni galuega pe uma foi aoga, ma e sa ma matitiva lava.
Pau le mea o loo tele ia i maua o lo ma alofa o le tasi i le isi ma le tele o lo ma naunautai mama. Ma e sa ma fausia faatasi lo maua lalolagi. Sa ma le i faatalitali sei maua mulimuli ni fanau, ma e manaomia lo ma faalagolago o le tasi i le isi i le faia o a ma aoaoga. Sa malosi lo ma talitonu i folafolaga a le Alii “afai tou te tausi i ana poloaiga e faamanuia mai o ia ia te outou ma faatamaoaigaina outou” (Mosaea 2:22).
Ma sa Ia faia. Ina ua ma faaipoipo, sa auai Christiane i le aoga faatamaitai tausimai. O lo ma vaai mamao e faauma lana tikeri, ma o le taimi foi lena sa ma faia ai se faaiuga malamalama e amata ona faataunuuina la maua miti o le amatalia o se aiga. Ona o lena, sa fanau mai la ma tama muamua e tusa o le lua vaiaso a o lei pasi le suega faaiu a Christiane ma avea o se tamaitai tausimai aloaia.
I le taimi lenei, toeitiiti 40 tausaga mulimuli ane, ma te faafetai sa ma fausia faatasi lo maua aiga. O lo ma faatuatua i le Atua ma la ma faatasiga o le tasi ma le isi ua le faamaluelueina a o ma vaaia le aao o le Alii ua taitaiina i maua i le tau atiinaeina o lo maua malo i le soifuaga nei. O le a faaauau pea ona ola lenei malo i le faavavau faavavau lava.
Ia Naunau e Ositaulaga
I la ma vaai mamao mo le fiafia, sa maua sauni ma naunau e ositaulaga. Sa ma talia le tiute paia o le tama “e pule faamalumalu” ma “tausi le aiga” ma le tina e tausi i le fanau.”3 Na saunoa Julie B. Beck, le sa avea muamua ma Peresitene Aoao o le Aualofa e faapea: “O le tiute faale perisitua o le tama o le pule faamalumalu ma tuuina atu sauniga o le perisitua i le isi augatupulaga. O le tiute faale perisitua o le tina o le faaaafia. O matafaioi tatau, fefaasoaai, ma felagolagomai nei4
O le fesoasoani o le tasi i le isi i se faaipoipoga ma le aiga o se paaga tutusa e le faapea tatou te faia lava le mea e tasi po o le fai faatasi o mea uma lava po o vaevaega tutusa. Ua tatou malamalama ma talia matafaioi eseese ua tuuina mai ia i tatou i fuafuaga paia e pei ona faatulaga mai i le folafolaga mo le aiga. Ua tatou le mulimuli i le lalolagi e pei ona faamatalaina o le “tuu saoloto,” ua nonofo faatasi ai le tane ma le ava ina ia faataunuu ai na o o laua lava manaoga. Ua tatou ola ai i mataupu faavae o le talalelei; o tane ma ava e feoeoeai, ma e atiae le aiga ina ia autasi e aunoa ma le manatu faapito.
Atonu e tuufesilisili nisi o outou: “Ia e ese lo matou tulaga. O le lalolagi i le taimi nei ua faigata. E tatau ona iai se avanoa mo le faatagana faapitoa. Ioe, ae o lo o ou taumafai e aoao le tulafono po o le manatu paia ae tuu atu ia te oe e feagai ma faatagana faapitoa a o e savalia le ala o le soifuaga.
O se vaaiga mo lo matou aiga, ma te mananao ina ia nofo Christiane i le fale e tausi la ma fanau. O lona uiga o le ositaulaga. E le i mamao ona ma iloa o le a fanau le pepe, sa faamanatu mai e Christiane le faaiuga na ma faia faatasi a o lei oo i le aso o la maua faaipoipoga e ao ona taofia loa lava lona galue i fafo atu o le aiga i le taimi lava e fanau ai le pepe. Sa ou taumafai e solaese mai le mea sa ou iloa o le a avea ma tiute faaopoopo le tau atu sa ia aumaia le tasi o vaetolu o a ma tupe maua mo le aiga. Sa faigofie lana tali, “O le a ou tausia le fanau, ae galue oe e tuu meaai i luga o le laulau.”
Na ou iloa e sao a ia; ua leva ona ma talanoa muamua ai. Sa talafeagai lelei lea ma le vaai mamao o lo matou olaga faaleaiga, sa fetaui ma saunoaga a perofeta soifua, ma sa lagona le sao. O lea sa ia tuua ai lana galuega totogi lelei o se tamaitai tausimai ina ia latalata i le fanau ma faamalieina o latou manaoga o aso taitasi, ma o le a ou galue malosi ina ia maua ni meaai ma le fale. Sa faamanuiaina i matou e le Alii ina ia mafai ona faataunuuina lenei vaega o la matou vaai mamao.
O isi mea taua, e pei o le avea ai o ni matua, aoao atu, faufautua, faamama, e oo lava i le suiga o napekini, sa ma faia faatasi soo e tusa ai ma tulaga. Ua faia lenei vaevaega o tiute aua sa avea lava pea ma vaega o le auala e vaai mamao atu ai i lo matou olaga faaleaiga.
Na ma iloa ma Christiane a o ma galulue i le faatuatua ma talitonu i le Alii, ua fesoasoani mai o Ia ina ia matou faia Lona finagalo i Lana ala ma e tusa ai ma Lona taimi. O lenei, ou te faapea atu o Lana ala e le faapea o le a faafuasei ona faia o mea e pei ona sa maua manatu iai, O nisi o taimi matou te onosai ai, o nisi o taimi e tuu iai seisi taumafaiga faaopoopo, ma o nisi o taimi e foliga mai o loo tofotofoina e le Alii lo matou naunautaiga. Ui i lea, o la matou vaai mamao na musuia i matou ma e sa avea ma faavae o a matou faaiuga silisili ona taua.
Tasi le mea sa ma vaai mamao pea iai ma Christiane o le matou faatasi lea ma le ma fanau i le potu selesetila o se malumalu o se muai sauniuniga mo le olioli e faavavau ma le mamalu matou te faamoemoe e maua i se aso. I ni tausaga ua mavae sa ma aveina atu lo lea tamaitiiti ma lea tamaitiiti ina ia maua sauniga o le malumalu, ma toe faafoi atu i latou i lo tatou Tama Faalelagi ina ua maea ona aoaoina i latou i mataupu faavae o le amiotonu. Sa matou faatasi ai ma le toatolu o la maua fanau i fata faitaulaga o malumalu a o latou faaipoipo atu ia latou paaga pele, ma e matou te faamoemoe i nisi faaipoipoga i le malumalu o le a oo mai.
E leai se mea e maua ai le fiafia sili ma le faamalieina i o tatou olaga nai lo le olioli ua matou maua o le tasi i le isi ma a maua fanau. Ina ua matou malamalama ua na o le amataga lenei o lo matou alualu i luma e faavavau ma o lea ua na o le vaega muamua lava o lo matou olioli ma le fiafia, sa matou—ma o le a matou—naunautai e ositaulaga mea uma ua matou maua e ola ai i aoaoga faavae o le aiga ma iloa ai le faataunuuina o la matou vaai mamao.
Ou te valaau atu ia te outou ina ia manatunatu loloto i lenei aoaoga faavae ma ia iloa mo outou lava mea e silisili ona taua. O lenei ituaiga o fiafia o loo i le taulotoaiga o lo tatou soifuaga. Ma o le fiafia e afua mai agafesootai fiafia i le va o le tane, ava, ma le fanau e ola pea.
Faataunuu Lau Vaai Mamao
Pe a uma ona e suesue i aoaoga faavae o le aiga ma faatuina se vaai mamao mo lou fiafia, e ao ona e maeleelega e faataunuuina lau vaai mamao.
O le muai teena sa ou maua i la ma faamasaniga ma Christiane na oo mai ai sina lotovaivai laiitiiti. I le taimi o le a ou faia ai se faaiuga e amata se galuega lelei o se talavou matua i le Ekalesia, ae i se tasi o aso sa ou maua ai se aafiaga faaleagaga faapitoa. Sa ou auai i se sauniga i le Malumalu i Suiteselani ina ua ou faalogoina se leo i lou loto o faapea mai faapenei: “Erick, afai e te le taumafai ma le maeleelega e faaipoipo ma ulufale atu i le feagaiga fou e faavavau, o nei aoaoga ma faamanuiaga folasia uma e leai lava se aoga mo oe.” O se valaau toe fafagu mai sa ou maua a o ou laiitiiti o ou tausaga e 21, ma e mai lena taimi sa ou taumafai malosi loa ina ia agavaa mo lena faamanuiaga.
Oute valaaulia outou ina ia faatutu ni sini patino e tusa ai ma lau vaai mamao. I le Aoao Atu le Talalelei tatou te faitau ai: O sini e atagia ai manaoga o o tatou loto ma la tatou vaaiga i mea e mafai ona tatou ausia. E ala i le faatuina o sini ma fuafuaga, e suia o tatou faamoemoega i faatinoga. Faatuina o sini ma fuafuaga o ni faatinoga o le faatuatua.”5
Aua le faatauvaaina mea paia. A e taunuu loa i le matua e mafai ai ona faaipoipo ai, aua le na o le faamasani ina ia maua ai le fiafia. Aua lava nei fetuutuunaia lou aia soifua e faavavau e ala lea i le faia o soo se mea e faaogea ai oe mai le osia o feagaiga silisili ona taua i le malumalu. A o e faia faamasaniga uma o se e ono avea ma soa e faavavau, o le a le faia lava uiga le talafeagai e faaleaga ai faaletino po o le faaleagaga lau soa faamasani po o le fetuutuunaia o lou lava agavaa ma faapogisaina ai lau vaai mamao. A o tumau pea lou agavaa, o le a le mu laiitiiti lau vaaiga faaleagaga, ma o le a e aia ai pea i musumusuga a le Agaga. O le a musuia oe e le Agaga Paia ma faamauina le tonu o nei faaiuga taua silisili i lou olaga, e tusa lava pe o nisi o taimi ua e fefe i le oti.
Taofi pea ia te oe lava ina ia e tali atu i le Alii e tusa ai ma lau vaai mamao ma sini o le olaga. Afai e i ai se mea i lou olaga e tatau ona e salamo ai, aua le fefe i se sekone e faia ai loa. O lenei olaga ma le olaga e faavavau e matua taua lava e “faatuai ai le aso o lou salamo” (Alema 13:27; 34:33). Mulimuli i le valaaulia a le perofeta a le Atua, o le o lo o faamalosiau ia tatou “ole atu i le Tama i le suafa o Iesu mo soo se mea tou te manaomia. Aua le masalosalo, ae ia talitonu, ma amata e pei o taimi anamua, ma o mai i le Alii ma o outou loto atoa, ma galueaiina o outou lava faaolataga i le matau ma le gatete i ona luma” (Mamona 9:27).
Ou te iloa o nisi o outou, e tusa ai ma o outou aafiaga, atonu e manaomia ona sui le vaai mamao o se aiga e talafeagai ma lou lava tulaga patino. Ua ou aoaoina o le a fesoasoani le Alii ia i tatou pe afai tatou te taumafai e auauna ia te Ia i le faatuatua ma mulimuli i le mea e tatau ai.
O Le Mataupu Faavae o le Faamae’a
O le talalelei a Iesu Keriso e aofia ai le vaega o le filemu silisili. O le vaega o le faamaeaina po o le faaumaina o lo tatou faatuatua i le Alii o Iesu Keriso. Na aoao mai Moronae ina ia tatou tausisi pea i le ala sao, “ma faalagolago pea i le alofa o Keriso, o [ia] o le tusitala ma le iuga o lo [tatou] faatuatua” (Moronae 6:4).
Ona o lo tatou faatuatua ia Iesu Keriso, tatou te tulimataia ai le ala o le soifuaga tatou te manaomia ona tauave. Ae pe afai tatou te tautevateva ona o le vaivai po o avanoa ua misi, o le a Ia aapa mai ia i tatou, faatumu le avanoa, ma fai ma iuga o lo tatou faatuatua. Na ia faapea mai: “Aua o Aʼu, o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto” (MF&F 137:9).
Mai le Tusitaulima 2 tatou te faitau, “O tagata faamaoni o le ekalesia o e le faatagaina i latou e o latou tulaga ma laasaga e mauaina faamanuiaga o le faaipoipoga e faavavau ma le tulaga faamātua i lenei olaga, o le a mauaina faamanuiaga folafolaina uma i le faavavau, pe afai latou te tausia feagaiga sa latou osia ma le Atua.”6
Ou te molimau atu sa uiga le finagalo o le Alii i mea sa Ia fetalai ai “e le lelei ona toatasi le tagata” (Kenese 2:18) ma o Lona naunautaiga autu mo Lana fanau uma ina ia latou maua le “olioli atoatoa” (Mose 7:67). O le mea lea, ia tumau pea lau vaai mamao i ou luma ma “taumafai mo le tulaga o le ola ai i se aiga e faavavau. O lona uiga o le sauniuni lea e avea ma toalua agavaa ma ni tamā po o ni tinā alolofa. I nisi tulaga, o le a le faataunuuina nei faamanuiaga seia aulia le isi olaga, peitai e tutusa lava le sini autu mo tagata uma.”7
Ou te iloa le tele o ituaiga o tulaga o le soifuaga e faapei foi o le toatele o tagata i le lalolagi. Ou te iloa e iai le eseesega i tu, aganuu, ma tulaga moomia. Ae ui i lea, o nei aoaoga ma mataupu faavae e faavavau ma moni, ma e latou te tutu taitoatasi mai ituaiga o lo tatou soifuaga patino. Ua ia te au le mautinoa uma afai e te manatunatu loloto ma mafaufau ma le agaga tatalo i nei aoaoga ma mataupu faavae, o le a mafai ona e atiinaeina se vaaiga mamao patino mo lou soifuaga o le a matagofie i le Alii ma taitaiina atu ai i lo outou fiafiaga silisili.