Ataata
Aso Soifua
E alaala le tusitala i Idaho, ISA.
O lenei soifuaga e le o le iuga lea; o loo i ai le lalelei ma le fiafia ma le olioli sili o le a oo mai.
Ata mai le Getty Images
Sa manino ma malulu le taeao sesegi o le tau malulu a o amata au galuega i lau faatoaga manu. Sa mamafa lou mafaufau a o ou manatunatu i mea na tutupu i le vaiaso ua tuanai. Sa taia lo matou vanu laiitiiti i puapuaga Sa maliliu sau uo mai le aoga maualuga, faatasi ai ma lona atalii laiitiiti, o lona afafine talavou, ma le toatolu o ana uo i se faalavelave matautia o le taavale lavea. Sa fefaauoai lau fanau ma teine i le faalavelave. Sa faaaluina e lou aiga, ma le toatele o nisi le vaiaso e faanoanoa ai i lenei faalavelave faatasi ai ma aiga na aafia ai. Na matou auai i ni sauniga o maliu e tolu i lena vaiaso ma o le a auai i le sauniga mulimuli, mo le tama ma lana fanau e toalua i le aso.
Sa ou le mautonu i ni fesili faapitoa se lua a o ou to manatu i le mea na tupu.
Muamua, sa ou faanoanoa ma le ofo pe aisea lava ua aveesea ai nei tamaiti laiti a o latou lei maua aafiaga e tele ua ofoina mai e le soifuaga. Ua le ola matutua i latou, faaipoipo, auauna i ni misiona, maua ni fanau, ma maua nisi o aafiaga fiafia o le olaga faaletino.
Lona lua, e ui ina sa ou lagona faapea e tele mea sa mananao ai le nuu e ofoina atu e faamafanafana ai i aiga, e foliga mai e leai se mea e mafai ona matou fai e pai atu ai i o latou loto nutimomoia.
A o ou galue, na faateia au i se asiasiga mai le tama o le toalua o lau uo ua maliu. I le avea ai ma se tasi o tausimanu, e le maua ai se malolo, na manao o ia e faatau atu se tamai povi i se taimi vave lava. Ina ua ma’ea le fefaatauaiga, sa ma talanoa mo sina taimi i le tulaga o i ai lo latou aiga. Sa ou faaleo atu ia te ia lou naunautaiga ou te fia faia se mea sili atu mo i latou. Sa ou lagona le le mafai ona ou faamama i o latou tiga. Ae sa ou maofa i lona toafilemu e ui i le tulaga faigata o loo feagai ma lona aiga.
I lea lava taimi sa ou iloa ai o le tali i se tasi o au fesili sa i ai lava i le taimi atoa. Sa ou popole i le ofoina atu o faamafanafanaga i au uo faanoanoa, ae galo ai o le faamafanafanaga ma le filemu moni e auala mai le Agaga Paia. Ua faamanuiaina nei aiga i le fua faaopoopo o le faamafanafanaga mai le Tama Faalelagi ua na o Ia lava e mafai ona ofoina mai. Na ou iloa sa latou mauaina le faamafanafanaga a le Alii, e pei ona faamatalaina i le Tusi a Mamona:
“O le a ia faamafanafanaina outou i o outou puapuaga, ma o le a ia aioia a outou tagi …
“E, outou uma e o e loto mamā, ia ea ia o outou ulu ma tali le afioga malie a le Atua, ma taumamafa fiafia i lona alofa; aua tou te mafai, pe afai e mausali o outou mafaufau, e faavavau” (Iakopo 3:1–2).
Ina ua uma ona ma faamavae, na ou aluese mai le pa ma iloa ai le atoa o le masina ua goto ifo i sisifo o le lagi. O se vaaiga matagofie. Ona ou liliu atu lea ma iloa le la ua oso ae i sasae. E foliga mai e faapei ua ola le lagi atoa i lanu. O le goto ifo o le masina sa matagofie lava; o le oso ae o le la ua le mafaamatalatalaina. A o ou mapu e mafaufau i lenei tu faafeagai, na oo mai ia te au e tusa lava poo le a le matagofie ma le fiafia tatou te manatu ai i lo tatou soifuaga faaletino, e mou atu e faatusatusa i le matagofie ma le fiafia o loo mulimuli mai pe a tatou faatuatua ma usiusitai. Na ou iloa ai o i latou ua maliliu ua le aveese lava se mea mai ia i latou. Sa latou loto tetele i o latou olaga i le lalolagi ma o le a see atu i ni aafiaga ma fiafiaga sili.
Mulimuli ane i lena aso, sa ou auai i le sauniga mulimuli ma lou aiga. Sa matou faatasi i le vaega faaopoopo o le tapeneko, ua faatumulia lava i vaega uma i le lagolago a le nuu atoa. I lena aso ma se taimi mulimuli ane, sa lagona ai e tagata o lo matou vanu se filemu faapitoa. Sa siitia faalatalata e matua a latou fanau, ma matou iloa ai e utiuti lo tatou soifuaga i le lalolagi ma e ao ona faaali atu i le tele o taimi lo tatou alofa i aiga ma uo. Sa faamanatu mai ia te au le alofa o le Alii mo i tatou ma le matagofie o le ata o le faaolataga. O lenei soifuaga e le o le iuga lea; o loo i ai le lalelei ma le fiafia ma le olioli sili o le a oo mai.