I le Pulelaa
O Faiaoga Asiasi o Avefeau a le Atua
Ata pue o Sister Smith i faaaloaloga a lona aiga; faavaa mai le Getty Images
A o a‘ea e Iesu mauga naumati o Kalilaia pe laasiia ala pefu o Iutaia, sa ia feiloai ma e matitiva, mama’i, ma ituaiga pagatia uma lava. Na ia feiloai ma le tagata agasala salamo ma le le salamo. Sa ia fetaui ma e puapuaga Ma e mai i nei aafiaga ma Lona silafia tele na oo mai ai Lona agaga alofa, “O mai ia te au.”
I le 1830, na folafola mai ai e le Perofeta o Iosefa Samita o le “Atua e tasi e le liu” [MF&F 20:17]. O lea, e le o se mea e ofo ai i le aso 28 o Iulai, 1843, na tofia ai tamaitai e 16 e “saili atu i e matitiva ma puapuagatia … ina ia faamalieina manaoga o tagata uma.”1 Sefuluono i le lalolagi o miliona. Ae tatau lava ona iai se amataga. I le 1843, e 16 faiaoga asiasi; o le aso [1969], ua sili maoae i le 100,000; o taeao 200,000; o le aso e sosoo ai ua lua miliona.
O nai vaiaso ua tea sa ou feiloai ai i sa’u uo lelei. Sa toaga o ia i le Aualofa mo le tele o tausaga. … Na ou fesili ia te ia poo le a lana mea o fai nei i le Ekalesia. Na maitauina se taimi na malolo ai. Ona ia tali mai lea, “Oi, o au ua na o se faiaoga asiasi.” Ua na o se faiaoga asiasi! Ina ua ma faamavae, sa ou manatu, poo le a sona lagona pe a fetalai atu le Faaola ia te ia. “Ou te manao ia fai oe ma au avefeau. Ou te manao e tau atu i tina [e te faiaoga asiasi i ai] oute alofa ia i latou, ma ou te popole i mea e tutupu ia i latou ma o latou aiga. Oute manao ina ia avea oe ma ou fesoasoani. Afai na ma feiloai ina ua maea lenei fonotaga, pe o le a ese ea lana tali? Pe lei valaauina ea o ia e Ia e ala i Lana perisitua e faapei ona tulai mai o Ia i ona luma?
E toafia o tatou faiaoga asiasi o loo manatu ia i latou lava ua “na o ni faiaoga asiasi”?
I le faiaoga asiasi ua tuuina atu iai le matafaoi sili o le saili atu i ai latou o loo iai manaoga faapitoa. I le ma lea, ua ia tau atu i tuafafine uma e ala i lana asiasiga e iai seisi e alofa ma o le Atua e alofa.
… Ua le tatau o ia o se tasi e faatopetope atu i le aso mulimuli o le masina ma faapea atu, “Ua na o ni nai o’u minute lava—ou te iloa ua uma ona e faitau i le savali ma ua sili atu lou iloa nai lo au, ma e te le manaomia lava. O a mai oe, ma e ta feiloai i le Aualofa i le vaiaso lea.” E ao i le faiaoga asiasi ona tuuina atu le alofa e faamanuiaina ai le tuafafine o loo asia ma lona aiga. …
… I tausaga taitasi a o faatupulaia le Ekalesia, e faateleina foi le manaomia mo faiaoga asiasi. … O le a latou fesoasoani e faafetaia’ia le nofo toatasi ua pesia ai lo tatou lalolagi ma amio ai aai tetele. O le a latou tausi i le tagataese, le ua oti lana tane, le ua leai se matua, le ua faamanualia, ma le faanoanoa, i tuafafine uma ua manaomia le fesoasoani, tausia ma le alofa. … O le a latou fesoasoani e faaitiitia le pagatia i le tino, lagona, ma le mafaufau. O le a latou fesoasoani i le ua agasala ma faamafanafana le ua faanoanoa. O le a latou tauave le savali o le alofa o le talalelei i o tatou tuafafine uma i le lalolagi. …
“Ia outou o mai ia te au, outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” [Mataio 11:28–30].
Ia faamanuia le Atua i faiaoga asiasi. Pe afai e galulue faatasi uma, e mama la’u amo, ma e mama foi la’u avega.
… Tau ina ia faia ai pea, ou te tatalo ai. Amene.