Aapa Atu ia Ana
Margaret S. Lifferth
Iuta, ISA
Atapue mai le Getty Images
I ni tausaga ua mavae, sa ou aoaoina ai le tai ono-tausaga le matutua i le Peraimeri. Na lisiina Ana i lau tauvalaauga. Na lava lou masani i le aiga na iloa ai ua tetea ona matua ma na nonofo o ia ma lona tama. E seasea lava la o mai i le lotu.
Na ou afe i le fale e feiloai ia Ana ma lona tama ma valaaulia Ana i le Peraimeri. Na fiafia mai Ana, ae e lei sau lava o ia. O taeao o aso Sa uma lava mo ni vaiaso, ou te valaau atu ai i lona fale e valaaulia o ia i le Peraimeri. E leai lava se tasi e talia le telefoni, ae ou te tuua lava se savali e tau atu ai ia Ana lou fiafia tele e vaai ia te ia i le Peraimeri.
I se tasi taeao o le aso Sa, na i ai iina Ana. Na fesoasoani lona tama ia te ia ia saunia mo le Peraimeri i lona ofu lotu e sili ona manaia ona ia aumaia lea o ia i le lotu. I le fiafia ina ua vaai ia te ia, sa ou faafeiloaia o ia ma fesoasoani ia te ia ia faamasani i isi tamaiti i le vasega.
Na fai le matou lesona, usu pese, ma faia se gaoioiga valivali i le faaiuga o le vasega. Ao o ese atu tamaiti, na sau Ana ia te au ma faapau se fasi pepa maanuminumi i lou lima. I le taimi muamua, na ou faapea o se lapisi. Sa ou tau togieseina, ae uunaia au e le Agaga e tatala. Na tusia e Ana se tusi puupuu mo au i le pepa. I se tusitusi a se ono-tausaga le matua, na faapea mai, “Ou te alofa ia te oe.”
E lei lava le iloaina e Ana o au e alofa ai ia te au. Pau le mea na ia iloaina ia te au o se leo i luga o lana masini tali telefoni o loo valaaulia o ia i le Peraimeri. Ae o lena tamai taumafaiga e aapa atu ia te ia na fesoasoani ia Ana ia iloaina e popole se tasi ia te ia ma manao e fesoasoani ia te ia ia lagonaina le alofa o le Faaola.
Na ou vaai ia Ana i le Peraimeri mai i lea taimi i lea taimi ma na amata foi ona sau lona tama i le lotu i nisi taimi. Ae ina ua toe suia tulaga o lo latou aiga, matou te lei toe vaaia soo i laua.
Sa ou mafaufau ia Ana i le tele o tausaga. Ma lo’u loto atoa, ou te faamoemoe na te manatuaina lona taimi i le Peraimeri. Atonu na te manatuaina ni mea na ia aoaoina, ae ou te faamoemoe ia sili atu, ia ona manatuaina le lagona o le alofa o le Alii, le mafanafana o le Agaga, ma le alofa o se faiaoga.