Kalinaw dinhi sa Kalibutan batok sa Kalinaw diha ni Kristo

Ni Sarah Hanson

Makahatag si Jesukristo kanato og malungtarong kalinaw, bisan atol sa mga kalisdanan ug mga pagsulay.

Peace in the world versus Peace in Christ

Sa kalibutan nga dunay sosyal, politikal, ug relihiyusong kagubot, unsay inyong gikinahanglan aron makabaton og kalinaw? Maayong mga higala? Usa ka mahigugmaong pamilya? Kaluwasan ug kasiguroan? Usahay maghunahuna kita nga ang atong kinabuhi kinahanglang makatubag sa mga gikinahanglan sama niini aron tinud-anay kitang makabatyag og kalinaw. Apan ang kinabuhi dili gayud mahimong 100 porsyento nga perpekto ug sayon. Nan unsaon man nato pagsagubang ang mga pagsulay ug mobati og kalinaw sa samang higayon?

Ang kalibutan nagsulti kanato nga ang kalinaw mabati lamang kon walay bisan unsang panagbangi. Apan dili kana tinuod! Pinaagi sa Iyang ebanghelyo, si Jesukristo naghatag kanato og kalinaw sa kahiladman nga molabaw pa sa kalinaw nga gitanyag sa kalibutan. Kon motan-aw kita Kaniya uban sa pagtuo, mabati nato ang kalinaw sa bisan unsang kahimtang.

Ang Manluluwas mitudlo, “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan” (Juan 14:27; emphasis gidugang). Ania ang pipila ka paagi diin ang kalinaw sa kalibutan lahi kay sa kalinaw ni Jesukristo.

Kalinaw dinhi sa Kalibutan

Ang kalinaw kinahanglang moabut dayon—dili na kita kinahanglang maghulat pa niini!
Dili mo makakaplag og kalinaw atol sa mga kalisdanan.
Ang kalinaw mao ang pagkawalay gubat.
Ang kalinaw moabut pinaagi sa pagpakabuhi sa bisan unsang paagi ninyo gustong magpakabuhi.
Ang pag-angkon sa inyong mga sayop ug mga kahuyang dili makahatag og kalinaw.
Ang kalinaw moabut gikan lamang sa pag-focus sa inyong mga panginahanglan.
Ang kalinaw moabut gikan sa pagtinguha og pagtugot sa uban.
Kinahanglang maningkamot kita nga makabaton sa kaugalingon natong kalinaw.

Kalinaw diha ni Kristo

Usahay kinahanglan kitang maghulat alang sa kalinaw—apan “ayaw kamo pag-undang. … Salig sa Dios ug tuohi nga moabut ra ang maayong mga butang.”¹
Ang kalinaw mahimong moabut bisan taliwala sa mga pagsulay.
Ang kalinaw mahimong makita sa bisan unsa nga kahimtang.
Ang kalinaw moabut pinaagi sa pagsunod sa ebanghelyo ug sa pagtuman sa mga sugo.
Ang kinasingkasing nga paghinulsol makahatag og kalinaw. “Ang kanindot mismo sa pulong nga paghinulsol mao ang saad nga makalingkawas sa naandang mga problema, mga gawi ug mga kasub-anan ug mga sala. Apil kini sa labing malaumon ug makadasig—ug oo, labing malinawon—nga mga pulong sa bokabularyo sa ebanghelyo.”²
Ang kalinaw moabut gikan sa pagserbisyo ug pagkahimong tigpasiugda og kalinaw alang sa uban.
Ang kalinaw moabut samtang magtinguha kita nga mahimong mas maayo nga mga disipulo ni Jesukristo.
“Ang matang sa kalinaw nga mao ang … ganti sa pagkamatarung … mao ang gisaad nga gasa sa misyon ug maulaong sakripisyo sa Manluluwas.”³

Kon himoon nato si Jesukristo nga sentro sa atong kinabuhi, tinuod kita nga mobati nga Siya “[mosulti] og kalinaw sa [atong] mga kalag” (Alma 58:11). Niining kalibutan makasinati kita og mga kalisdanan, apan bulahan kita nga masayud nga dunay tawo nga atong kadangpan sa bisan unsang mahagiton nga kahimtang. Ang Ginoo miingon, “Gisulti ko kini kaninyo aron nga dinhi kanako makabaton kamog kalinaw. Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33). Tungod sa Pag-ula sa Manluluwas, ang kalinaw posible na karon ug sa kahangturan.