Mga Hulagway sa Hugot nga Pagtuo
Feinga Fanguna
Tongatapu, Tonga
Isip usa ka tigkulit og kahoy, gisuportahan ni Feinga ang iyang asawa, ang ilang tulo ka anak, ug laing tulo pa nga ilang giatiman. Dili kini kanunayng sayon, apan pinaagi sa pag-una sa Dios, kanunay nga paigo kon unsay anaa nila.
Christina Smith, photographer
Sa dihang ang akong asawa, si ‘Anau, ug ako bag-ong naminyo, magkulit ko og ginagmayng mga butang ug moadto sa merkado aron ibaligya kini. Sa ubang adlaw mobalik ko nga dunay kwarta, sa laing adlaw wala koy mabaligya.
Nakadungog ko bahin sa usa ka tawo kinsa mibalik gikan sa Hawaii diin dunay grupo sa mga Maori gikan sa New Zealand ang mitudlo niya sa pagkulit og kahoy. Sa dihang nagkahimamat mi, miingon siya, “Dili ko usa ka magtutudlo, usa ko ka tigkulit og kahoy. Apan kon ganahan kang motabang paghimo og kalia (usa ka bangka sa Tonga), pwede kang mouban nako.” Nakakat-on kog daghan bahin sa pagkulit og kahoy gikan niya.
Sa akong patriyarkal nga panalangin, gisaaran ko nga panalanginan sa Dios ang trabaho nga akong himoon gamit ang akong mga kamot ug nga gamiton nako ang akong talento sa pagtabang sa mga tawo. Kini nga mga saad nangatuman.
Mibiyahe ko sa Australia, New Zealand, Guam, Japan, ug sa Estados Unidos aron sa pagrepresentar sa Tonga atol sa mga festival sa pagkulit ug sa art .
Isip usa ka tigkulit og kahoy, nakasuporta ko sa akong pamilya. Ang akong asawa ug ako dunay kaugalingon namong tulo ka anak ug laing tulo pa nga among giatiman. Gibuhat namo ang among mahimo aron sa pagtabang sa mga bata. Gisulayan namo sa pagpakita nila sa kalipay nga gidala sa ebanghelyo.
Duna mi mga baboy, mga baka, ug mga manok. Duna mi mga saging ug kolo. Nagtanom mi og kamoteng kahoy ug ube nga among gipakigbahin sa uban.
Gipanalanginan mi sa daghan kaayong paagi. Ang among mga paryente nagtuo nga dato mi. Dili, apan anaa namo ang tanan nga among gikinahanglan tungod kay giuna namo ang Dios.
Gituman namo ang mga sugo, moadto sa simbahan, mag-family home evening, magbasa og Basahon ni Mormon ug mag-ampo isip usa ka pamilya, ug nagbayad mi sa among ikapulo. Mao kana ang nagdala og mga panalangin sa among pamilya.