Gisunod Nako ang Unang Impresyon
Kenny Quispitupac
Lima, Peru
Paghulagway pinaagi ni Simone Shin
Usa ka Dominggo human nakapauli gikan sa simbahan, nakatulog ko hapit sa tibuok hapon.
Ngitngit na sa dihang nakamata ko. Gisugdan nako pinaagi sa pag-ampo ang akong sinemana nga pagplano aron mangutana kon sa unsang paagi ko makaserbisyo og maayo sa Ginoo. Mibati ko nga mag-home teaching. Alas 8:00 sa gabii na kadto, mao nga miingon ko sa akong kaugalingon nga moadto ko sa sunod na lang nga Martes, apan ang impresyon nga moadto nianang gabhiona mas nagkakusog.
Napahinumduman ko sa tambag nga akong nadungog nga gihatag ni Elder Ronald A. Rasband sa Korum sa Napulog Duha ka mga Apostoles sa missionary training center didto sa Lima, Peru, samtang usa pa ko ka magtutudlo didto: “Sunda ang unang impresyon.” Ako dayong gitawagan ang akong kompanyon sa home teaching, pero wala siya motubag. Nakadesisyon ko nga moadto gihapon.
Mibiya ko sa balay ug nakabantay og usa ka batan-ong priest sa akong ward nga naglakaw sa karsada. Giduol nako siya ug gihangyo kon pwede ba ko niyang kuyugan. Miuyon siya. Sa unang balay, ang brother miabli sa pultahan. Giingnan nako siya nga gibati nako nga kinahanglan nakong makigkita niya. Mipahiyum siya ug gisultihan mi nga duna siyay operasyon pagkasunod adlaw ug malipay kon mahatagan og panalangin. Gihatagan nako siya og panalangin, ug mibiya mi alang sa among ikaduhang bisitahan.
Alas 8:40 kadto sa gabii sa dihang miabut mi sa balay sa sunod nga pamilya. Nasurprisa sila nga nakakita namo tungod kay gabii na kaayo kadto. Misulod mi sa ilang panimalay ug nakabantay nga ang amahan nasakit. Mitanyag ko nga hatagan siya og panalangin.
Sa pagpauli na namo, mipakigbahin ko sa Moroni 7:13 ngadto sa batan-on nakong kompanyon: “Matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios.”
Gisultihan nako siya nga ang unsay bag-ohay lang nga nahitabo dili aksidente tungod kay nakadawat ko og usa ka pag-aghat. Miingon siya nga mituo siya niini tungod kay sa wala pa ko moduol niya, nag-ampo siya aron masayud kon unsaon pag-ila sa Espiritu.
Wala ko masayud kon ang impresyon nga mag-home teaching mas alang ba kaha sa akong mga pamilyang gibisitahan o alang niining batan-on nga priest, pero mapasalamaton ko nga naminaw ko. Nasayud ko nga dagkong panalangin ang moabut kon mosunod kita sa unang impresyon sa Espiritu.