Jesukristo: Ang Atong Tinubdan sa Kalinaw
Ni Elder M. Russell Ballard
Sa Korum sa Napulog Duha ka mga Apostoles
Gikuha gikan sa usa ka pakigpulong sa Abril 2002 nga kinatibuk-ang komperensya.
Ang kalinaw alang sa atong magul-anong kasingkasing moabut lamang ngari nato kon atong sundon ang Kahayag ni Kristo.
PAGHULAGWAY GIKAN SA REVIEW AND HERALD PUBLISHING/LISENSYA GIKAN SA GOODSALT.COM
Sa pagtapos sa tibuok adlaw nga pagtudlo ug instruksyon, misugyot ang Ginoo sa Iyang mga disipulo nga motabok sila ngadto sa pikas habig sa Dagat sa Galilea.
Samtang naglawig sila nianang gabhiona, “unya miabut ang usa ka makusog nga unos, ug ang mga balud mitabon-tabon sa sakayan, nga tungod niana ang sakayan napuno na sa tubig.
“Apan siya didto sa ulin, nagkatulog nga nag-unlan: ug siya gipukaw nila, nga nag-ingon, Magtutudlo, wala ka ba lang magkabana nga mangalumos kita?
“Ug siya nagmata, ug iyang gibadlong ang hangin, ug miingon siya sa lanaw, Hilum, hunong. Ug ang hangin milunay, ug miabut ang dakong kalinaw” (Marcos 4:37–39).
Mahunahuna ba ninyo kon unsa kaha ang gihunahuna sa mga Apostoles samtang nagtan-aw sila sa mismong mga elemento—ang hangin, ang ulan, ug ang dagat—nga mituman sa kalmado nga mando sa ilang Agalon? Bisan kon bag-ohay lang sila nga gitawag sa balaang pagka-apostol, nakaila sila Kaniya ug gihigugma nila Siya ug mituo Kaniya. Gibiyaan nila ang ilang trabaho ug ang ilang mga pamilya aron mosunod Kaniya. Sa medyo mubo ra nga panahon, nakadungog sila Kaniya nga nagtudlo og talagsaong mga butang, ug nakita nila Siya nga mipahigayon og daghang mga milagro. Apan lapas na kini sa ilang panabut, ug ang ilang mga panagway mipakita siguro niini.
“Ug siya miingon kanila, Nganong nalisang man kamo? wala ba kamoy pagsalig?
“Ug giabut silag dakong kahadlok, ug nasig-ingon ang usa sa usa, Kinsa man diay kini siya, nga bisan pa ang hangin ug ang lanaw mopatuo man kaniya?” (Marcos 4:40–41).
Sa gubot ug usahay makalilisang nga mga panahon, ang saad sa Manluluwas bahin sa walay kinutuban ug mahangturon nga kalinaw makapahimo nato nga labihan ka madawaton niining mga pagbati, sama ra sa Iyang abilidad sa pagpakalma sa mapintas nga mga balud nga nakaapekto niadtong miuban Kaniya didto sa Dagat sa Galilea nianang unuson nga gabii sa dugay nang panahon.
Pagpangita sa Kalinaw sa Kahiladman
Sama niadtong kinsa buhi pa sa panahon sa Iyang mortal nga pangalagad, dunay pipila kanato kinsa nangita sa pisikal nga kalinaw ug kauswagan isip mga timailhan sa talagsaong gahum sa Manluluwas. Usahay mapakyas kita sa pagsabut nga ang walay katapusan nga kalinaw nga gisaad ni Jesus mao ang kalinaw sa kahiladman, namugna tungod sa hugot nga pagtuo, nakabase sa pagpamatuod, giamumahan sa gugma, ug gipahayag pinaagi sa padayon nga pagkamasulundon ug paghinulsol. Usa kini ka kalinaw sa espiritu nga nakaimpluwensya sa kasingkasing ug kalag. Kon ang usa ka tawo tinuoray gayud nga nasayud ug nakasinati niining kalinaw sa kahiladman, mawala ang kahadlok sa kalibutanong kagubot o panagbingkil. Ang usa ka tawo masayud diha sa kahiladman nga maayo ra ang tanan kon kalabut na sa mga butang nga mas mahinungdanon.
Walay kalinaw diha sa sala. Mahimong dunay kasayon, popularidad, kabantog, ug gani kauswagan, apan walay kalinaw. “Ang pagkadautan dili mahitabo nga mahimo nga kalipay” (Alma 41:10). Ang usa ka tawo dili magmalinawon kon nagpakabuhi siya nga wala mahiangay sa gipadayag nga kamatuoran. Walay kalinaw sa pagkabagis o pagkamabingkilon. Walay kalinaw diha sa pagkabastos, pagkahigal, o pagkamatugtanon. Walay kalinaw diha sa pagkaadik sa druga, alkohol o pornograpiya. Walay kalinaw diha sa pagka-abusado ngadto sa uban sa bisan unsang paagi, ma-emosyonal, pisikal, o sekswal, kay kadtong mga abusado magpabilin sa mental ug espirituhanong kagubot hangtud moduol sila kang Kristo diha sa tumang pagpaubos ug magtinguha og kapasayloan pinaagi sa hingpit nga paghinulsol.
Sa usa ka higayon o sa lain nagatuo ko nga ang tanan nangandoy alang sa “kalinaw sa Dios, nga lapaw sa tanang pagpanabut” (Mga Taga-Filipos 4:7). Kana nga kalinaw alang sa atong nagmagul-anong kasingkasing moabut lamang kanato kon mosunod kita sa Kahayag ni Kristo, nga “gihatag ngadto sa matag tawo, nga siya masayud sa maayo gikan sa dautan” (Moroni 7:16), kay mogiya kini kanato sa paghinulsol sa mga sala ug magtinguha og kapasayloan.
“Kaninyo Ibilin Ko Ang Kalinaw”
Pipila lang ka oras sa wala pa Niya sugdi ang mahimayaon apan mapait nga proseso sa Pag-ula, si Ginoong Jesukristo mihimo niining talagsaong saad ngadto sa Iyang mga Apostoles: “Kaninyo ibilin ko ang kalinaw, kaninyo ihatag ko ang akong kalinaw” (Juan 14:27).
Misaad ba Siya sa Iyang minahal nga mga kauban sa matang sa kalinaw nga nailhan sa kalibutan—kasiguroan, seguridad, nga walay panagbingkil o kalisdanan? Sigurado nga ang rekord sa kasaysayan magsugyot og sukwahi niini. Kadtong orihinal nga mga Apostoles nakasinati og daghang pagsulay ug pagpanggukod sa nahibiling mga adlaw sa ilang kinabuhi, mao tingali nganong gidugang sa Ginoo kining panabut ngadto sa Iyang saad: “Hatagan ko kamo niini, dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27).
“Gisulti ko kini kaninyo aron nga dinhi kanako makabaton kamog kalinaw,” mipadayon Siya. “Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33; emphasis gidugang).
Ang kalinaw—ang tinuod nga kalinaw, nga mabati ninyo sa tinuod nga matang sa tibuok ninyong kalag—moabut lamang diha ug pinaagi sa hugot nga pagtuo kang Ginoong Jesukristo. Kon kanang bililhong kamatuoran madiskubrihan ug ang mga baruganan sa ebanghelyo masabtan ug gamiton, dakong kalinaw ang modagayday sa kasingkasing ug kalag sa mga anak sa atong Langitnong Amahan. Miingon ang Manluluwas pinaagi ni Joseph Smith, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako” (D&P 19:23).
Mapasalamaton ko nga ako makasaksi nganha ninyo nga si Jesus mao ang Kristo, ang Anak sa Dios. Pinaagi sa pagsunod Kaniya, pinaagi sa hugot nga pagtuo ug pagsalig, makaplagan sa tanan ang matam-is nga kalinaw sa kahiladman nga ikatanyag sa ebanghelyo kanato.