Hangtud sa Sunod Natong Panagkita
ANG EBANGHELYO NAGLANGKOB SA TANANG KAMATUORAN
Ni Presidente Dieter F. Uchtdorf
Ikaduhang Magtatambag sa Unang Kapangulohan
Gikan sa “Seeing Beyond the Leaf,” Brigham Young University Church History Symposium sa Siyudad sa Salt Lake, Utah, USA, niadtong Marso 7, 2014.
Ang dahon nga anaa sa atong atubangan usa lamang ka gamay kaayo nga sampol—kabahin sa hilabihan kadako nga lasang sa talagsaong kahibalo.
Ang kasaysayan importante. Ug ang pagpabilin sa atong kaugalingon nga lig-ong nakabase ngadto sa mga leksyon nga nakat-unan gikan sa kasaysayan makapahimo kanato sa pagsundog sa pinakamaayo sa unsay kahulugan nga mahimong tawo.
Ang namatay na nga novelist nga si Michael Crichton gikataho nga miingon, “Kon wala mo masayud sa kasaysayan, nan wala moy nasayran bisan unsa. Usa mo ka dahon nga wala masayud nga kabahin kini sa usa ka kahoy.” Ang kasaysayan nagtudlo kanato dili lamang mahitungod sa mga dahon sa pagpakabuhi; nagtudlo usab kini mahitungod sa gagmayng sanga [twig], mga sanga [branch], mga punoan, ug mga gamut sa kinabuhi. Ug kining mga leksyon importante.
Usa sa atong mga kahuyang isip mga mortal mao ang paghunahuna nga ang atong “dahon” mao na ang tanan—nga ang atong kamatuoran kompleto ug malukpanon. Usa ka karaang Yiddish nga panultihon [nag-ingon], “Alang sa usa ka ulod diha sa kamunggay, ang kalibutan kamunggay.” Gusto nakong hatagan og gibug-aton nga ang kamatuoran nga gihangup sa Ang Simbahan ni Jesukristo sa mga Santos sa Ulahing mga Adlaw milapas pa sa mga dahon ug sigurado nga milapas pa sa kamunggay. Milapas pa kini sa panahon ug lugar ug naglangkob sa tanang kamatuoran.
Ang ebanghelyo ni Jesukristo naglangkob dili lamang sa kamatuoran kon unsay nangagi ug unsa karon apan sa kamatuoran usab sa unsay mahimo ug unsay mahitabo. Kini ang pinakapraktikal sa tanang kamatuoran. Nagtudlo kini sa pamaagi sa dalan sa disipulo—usa ka agianan nga makadala sa ordinaryo, depektuso nga mga mortal ug mousab kanila ngadto sa mahimayaon, imortal, ug walay kinutuban nga mga binuhat kansang balaanong potensyal lapas pa sa gamayng kapasidad sa paghunahuna.
Karon, kana ang praktikal nga kamatuoran. Mas bililhon pa kini kay sa unsay mahunahunaan. Kini ang kinatas-ang matang sa kamatuoran. Ang pagtinguha, pagdiskubre, ug paggamit sa kamatuoran mao ang unsay angay natong diskubrihon dinhi sa yuta. Ang ebanghelyo ni Jesukristo naglangkob sa tanang kamatuoran, ug nag-focus usab kini sa kahibalo nga labing bililhon ngari kanato niining kinabuhia ug sa tibuok kahangturan nga moabut.
Dili ba kini usa ka talagsaong pagbati nga mahisakop sa Simbahan nga mihangup sa kamatuoran—bisan unsa pay tinubdan—ug nagtudlo nga dunay daghan pang moabut, nga ang Dios “mopadayag pa og daghan nga dagko ug mahinungdanon nga mga butang kalabut sa Gingharian sa Dios” [Mga Artikulo sa Hugot nga Pagtuo 1:9]. Isip resulta, mapaubsanon kita sa kamatuoran nga anaa kanato. Atong nasabtan nga ang atong kahibalo padayong naglambo, nga ang dahon nga anaa sa atong atubangan usa lamang ka gamay kaayo nga sampol—kabahin sa hilabihan kadako nga lasang sa talagsaong kahibalo.