Maisugong Nanalipod sa Simbahan
Ang mga tagsulat nagpuyo sa Baden-Württemberg, Germany, ug Utah, USA.
“Nahisakop ko sa Ang Simbahan ni Jesukristo sa mga Santos sa Ulahing mga Adlaw. Nasayud ko kon kinsa ko. Nasayud ko sa plano sa Dios” (Children’s Songbook, 77).
Ang unang miting ni Easton sa Simbahan didto sa Germany mao pay pagkahuman. Naghunahuna siya nga lahi gayud kini, pero pareha ra kini sa simbahan sa dapit nga iyang gipuy-an sa Estados Unidos. Lamang dinhi kinahanglan siyang magsul-ob og headphone aron maminaw sa mga pakigpulong nga gihubad ngadto sa Iningles.
Si Mama ug Papa misugod sa pakig-istorya sa pamilya nga naglingkod tupad nila. Morag duna silay anak nga lalaki nga pareha niya og edad!
“Kini ang mga Finotto,” gisultihan ni Mama si Easton. “Si GianMarco makauban nimo sa imong klase sa eskwelahan.”
“Maayo nuon!” Mipahiyum si Easton ni GianMarco. Ang iyang pangalan morag kon paminawon pareha sa “John” ug “Mark” nga giusa—nga dunay “o” sa tumoy. “Taga diin man ka?”
Mibalos sa pagpahiyum si GianMarco. “Gikan mi sa Italy. Pero bag-o lang mi nga mibalhin dinhi gikan sa China.”
“Wow!” miingon si Easton. “Wala pa gyud ko makaadto sa China.”
Pagkasunod adlaw miadto si Easton sa iyang bag-ong eskwelahan. Medyo gikulbaan siya. Pero nakit-an niya si GianMarco nga mikaway niya sa atbang sa classroom. Maayo na lang gani kay duna na siyay usa ka higala. Dunay mga bata gikan sa tibuok kalibutan sa iyang klase. Siguro maganahan ra siya niini nga eskwelahan.
“Maayong Buntag!” Ang magtutudlo mipahiyum sa tanan. “Ako si Ms. Albano. Sa pagsugod, duna bay makasulti nako kon unsay buot ipasabut sa ilhanan sa pagkatawo [identity]?”
Usa ka batang babaye ang miisa sa iyang kamot. “Nagpasabut kini kon si kinsa ka. Unsay labing importante kanimo.”
“Sakto!” miingon si Ms. Albano. “Busa ila-ilahon nato ang usag usa. Unsa ang pipila ka butang nga kabahin sa inyong pagkatawo? Unsang mga butanga ang nakapahimo ninyo kon unsa kamo?”
“Ganahan kog mga video game!” miingon ang usa ka batang babaye diha sa atubangang linya. Mipahiyum si Ms. Albano ug misulat og mga kalingawan [hobby] sa pisara. “Unsa pa?”
Si GianMarco miisa sa iyang kamot. “Gikan ko sa Italy.” Miyango si Ms. Albano ug misulat og nasud.
Naningkamot si Easton sa paghunahuna og unsay isulti. “Mosimba ko,” miingon ang batang lalaki sa luyo.
“Nindot kana!” Naghunahuna si Easton. “Mao unta kana ang akong isulti.”
Dunay mikatawa. Ug dayon daghan nang mga bata ang nangatawa. Mitan-aw si Easton ni GianMarco, nga nahibulong. Morag nahibulong sab si GianMarco. Nganong nangatawa man sila?
Sa pag-abut niya sa balay, gisultihan ni Easton si Mama kon unsay nahitabo.
Nagmug-ot ang nawong ni Mama. “Ang ubang mga tawo wala makasabut nganong importante ang simbahan. Naghunahuna sila nga binuang kini.”
“Ah,” miingon si Easton. Wala gayud siya maghunahuna nga ang simbahan binuang.
Pipila ka semana ang milabay, gihangyo ni Ms. Albano ang mga estudyante sa pagbuhat og usa ka presentasyon uban sa usa ka ginikanan kon unsa ang ilhanan sa ilang pamilya.
“Unsa kaha ang atong proyekto?” Nangutana si Mama samtang nag-andam sila sa lamesa alang sa panihapon.
Naghunahuna si Easton mahitungod sa pagpangatawa sa klase. “Siguro buhaton nato ang mahitungod sa Simbahan,” miingon si Easton.
Mipahiyum si Mama. “Nindot kana nga ideya.”
“Ug pwede kaha sila si GianMarco ug Sister Finotto nga mohimo niini uban nato?”
“Nindot nga ideya. Tawagan nako sila human sa panihapon.”
Pagkasunod adlaw si GianMarco ug si Sister Finotto miabut. Una giistoryahan nila kon unsa sa ilang hunahuna ang labing importante mahitungod sa Simbahan. Gisulat ni Mama ang tanan nilang ideya sa usa ka notebook. Nagkuha sila og mga poster board ug nakakita og mga hulagway ni Jesus ug sa mga propeta ug mga templo nga ikapapilit.
Sa katapusan panahon na alang sa presentasyon. Mibarug si Easton uban ni GianMarco ug sa ilang mga mama sa atubangan sa klase. Miginhawa siya og lawom.
“Mga miyembro kami sa Ang Simbahan ni Jesukristo sa mga Santos sa Ulahing mga Adlaw,” gisugdan niya. Nagpuli-puli sila sa pagpasabut sa mga butang mahitungod sa Simbahan. Gihisgutan ni GianMarco ang mahitungod sa mga kasulatan. Gihisgutan ni Mama ang mahitungod sa mga propeta. Gihisgutan ni Sister Finotto ang mahitungod sa family home evening. Gihisgutan ni Easton ang mahitungod sa bunyag. Nindot kaayo kadto!
Nindot ang gibati ni Easton sa dihang nahuman na sila. Walay nangatawa—mora gani og giganahan niini ang mga bata! Nalipay siya nga nahimo niya ang pakigbahin og butang nga importante kaayo ngadto sa klase. Mipahiyum siya. Nasayud siya sa ilhanan sa iyang pagkatawo. Anak siya sa Dios!