Asa Ang Akong Bahandi?
Ashlee Cornell
Oklahoma, USA
Paghulagway ni Joshua Dennis
Human mahatud sa eskwelahan ang akong mga anak, nagsugod ko sa paghunahuna mahitungod sa tibuok adlaw. Duna koy daghang buhatunon, pero kinahanglan kong magtrabaho og pang-gabii sa ospital, mao nga limitado ang akong panahon. Mahimo kong magtrabaho sa nataran, magtrabaho sa quilt para sa birthday sa akong pag-umangkon nga lalaki, o mag-ehersisyo. Dayon nahinumduman nako ang kinutlo gikan ni Presidente Ezra Taft Benson (1899–1994):
“Kon atong unahon ang Dios, ang tanan nga butang mapahimutang sa tukma niining dapit o mawala kini sa atong kinabuhi” (“The Great Commandment—Love the Lord,” Ensign, Mayo 1988, 4).
“Kon mao kana, magbasa ko sa akong mga kasulatan!” Naghunahuna ko. Milingkod ko sa akong lamesa ug nagpadayon sa akong pagtuon sa kasulatan gikan sa milabay nga adlaw:
“Ayaw kamo pagtigum og mga bahandi alang kaninyo dinhi sa yuta, diin ang tangkob ug ang taya nagakutkot, ug diin ang mga kawatan nagapanakasaka ug nagapangawat:
“Hinonoa pagtigum kamog mga bahandi alang kaninyo didto sa langit … .
“Kay hain gani ang inyong bahandi, tua usab ang inyong kasingkasing” (Mateo 6:19–21).
“Asa ang akong bahandi?” Naghunahuna ko. Tupad sa akong mga kasulatan mao ang upat ka pangalan gikan sa pamilya sa akong bana nga bag-o lang nakong gidala ngadto sa templo. Ang mga ginikanan sa akong bana mao ang una sa ilang mga pamilya nga mipasakop sa Simbahan. Gigahin nako ang miaging duha ka tuig sa pagtrabaho sa katigulangan sa namatay nakong ugangan nga lalaki. Nakadesisyon ko nga moadto sa FamilySearch aron tan-awon kon ang mga ordinansa narekord ba nga kompleto.
Mitan-aw ko sa mga temple icon diha sa iyang linya. Sa akong katingala, pipila ka pangalan nga akong giandam para sa mga ordinansa sa sealing wala marekord nga kompleto. Basin nasayop ko pagbutang sa mga kard, ug ang mga sealing wala pa mabuhat! Pagkahuman gyud nako og print pag-usab sa mga pangalan, usa ka klaro nga butang ang misantup sa akong hunahuna, “Karon mahimo na kang magpadayon sa pagbuhat sa gusto nimong buhaton.”
Gibati nako ang kalinaw kay nasayud nga giuna nako ang Ginoo. Gitabangan ko niya nga mahatagan og prayoridad kon unsay labing importante. Ang makauban nako ang akong pamilya sa kahangturan mao gayud ang akong gibahandi. Nasayud ko nga kon unahon nako ang Dios, ang tanang butang mahimo ra para sa akong espirituhanong kaayohan ug para sa kaayohan sa uban.