Seia Tatou Toe Feiloai
O Le Faamoemoega o le Foafoaga
Mai le “Celestial Marriages and Eternal Families,” Ensign, Me 1980, 15–18. Ua faalaugatasia le sipelaga ma le faailogatusi.
E mafai e i tatou taitoatasi ona faia o tatou aiga o se lagi i le lalolagi.
Sei o tatou mafaufau … i le faamoemoega o le foafoaga o le lalolagi. O loo faamanino mai i tusitusiga paia … le saunia ai o se nofoaga mo atalii ma afafine o le Atua e nonofo ai i le olaga nei ma faamaonia lo latou lava agavaa, e ala i le tausia o poloaiga, ina ia toe foi atu ai i le afioaga o le Atua lea na latou o mai ai.
Ina ua mae’a le Foafoaga o le lalolagi, “Na fetalai ane lea o le Atua, Ina tatou faia ia o le tagata i lo tatou faatusa. …
“Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i la’ua o le tane ma le fafine.
“Ua faamanuia foi e le Atua ia te i laua; ma ua fetalai atu le Atua i te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai” (Kenese 1:26–28).
Ina ua foafoaina e le Atua le fafine ma aumai o ia i le tane, na fetalai atu:
“O le mea lea e tuua ai e le tane lona tama ma lona tina, a e faatasi ma lana ava: ona avea ai lea o i laua ma tino e tasi” (Kenese 2:24).
Ioe, o le faaipoipoga ua faauuina e le Atua, ma i le mavae ai o lena faatatauga i le tane ma le ava, tatou te maua faifai pea ai tusitusiga paia o se faamaoniga na avea le alii ma le tamaitai ma tane ma ava i sauniga o le faaipoipoga. … Tatou te le o i ai iinei ia tau lava o le “aai, feinu ma fiafia” (2 Nifae 28:7). …
E taua mo i tatou le malamalama, a o mafai ai ona tatou aoao mai tusitusiga paia, e faapea o le Atua e faavavau, o Ana foafoaga e faavavau, ma o Ana upumoni e faavavau. O le mea lea, ina ua Ia tuuina atu Eva ia Atamu i le faaipoipoga, o lena tuufaatasiga o le a faavavau. …
… A malamalama matua i le faamoemoega o lo i ai iinei, o i laua moni o fanau faaleagaga a lo la Tama oi le Lagi ma e i ai se la tiutetauave e saunia tino faaletino mo isi, la te olioli i le vavega o le fanau mai a o la iloa o i laua o paaga ma le Atua i le foafoaina o fanau taitoatasi o e o mai i totonu o lena aiga. …
Ou te iloa, e ala i le talalelei a Iesu Keriso ma le tausiga o poloaiga a le Atua ma feagaiga na tatou osia ma Ia, e mafai ai e i tatou taitoatasi ona fausia o tatou aiga e avea ma se lagi i le lalolagi ao saunia i tatou lava ma a tatou fanau ina ia toe foi atu i lo tatou Tama Faalelagi.