Fesootai Atu Pea ma Ia i Soo Se Taimi, i Soo Se Nofoaga, i Soo Se Auala

Faiaoga asiasi e faatatau i le auauna atu. Sa auauna atu Iesu i soo se taimi ma soo se nofoaga. E mafai ona tatou faia faapea.

Ata

woman on cell phone

O le “auauna atu” o le tuuina atu lea o se auaunaga, tausiga, po o se fesoasoani lea e saofaga atu ai i le faamafanafanaga po o le fiafia o se isi. O le faiaoga asiasi e faatatau i le mauaina o auala e auauna atu ai ia i latou tatou te asia. Sa auauna atu Iesu Keriso i tagata uma—i soo se taimi ma soo se nofoaga. Sa Ia fafagaina le 5,000, faamafanafana ia Maria ma Mareta i le maliu ai o le la tuagane, ma aoao atu Lana talalelei i le fafine i le vaieli. Sa Ia faia ona o Lona alofa faamaoni.

O le mulimuli i Lana faataitaiga, tatou te mafai ai i le avea ma faiaoga asiasi ona tatou iloa ma alolofa i tamaitai taitoatasi tatou te asia. Pe a tatou tatalo mo musumusuga ina ia iloa le auala e auauna atu ai ia te ia ma fesoasoani e faamalosia lona faatuatua, “o le a le mafai ona taofia agelu mai le avea ma a [tatou] aumea mamae.”¹

Mai le faalapotoptoga o le Aualofa i le 1842 e oo mai i le asō, ua faamanuiaina olaga e le auaunaga a tamaitai. Mo se faataitaiga, o Joan Johnson, o se tina e 82 tausaga ua maliu lana tane, ma lana soa o faiaoga asiasi sa asia le latou tuaoi e 89 e maua i le nimonia. Sa la iloa e le na o le faatasi i le masina sa manaomia ai i laua e le la tuaoi, o lea sa amata ai ona la siakiina o ia i vaiaso uma e o i ai pe asia foi i le telefoni.

Mo isi faiaoga asiasi, o le auina atu o se tesi po o se imeli e tuuina atu ai se faamalosiauga e ono avea ma se mea sili ona lelei e faia mo se tamaitai i lena masina. O le faia o fesootaiga faaletagata lava ia ma faalogologo ma se uiga o le alofa o le ute lea o faiaoga asiasi. O tekinolosi faaonaponei ma taimi faamamaluina o asiasiga faafesagai e fesoasoani lea ia i tatou e faia ai i soo se taimi, soo se nofoaga, ma i le tele o auala.² O le auauna atu lena e pei ona faia e Iesu.