O Se Taunuuga Lenei o Lo’u Olaga?

Samson Ho, Hong Kong, Saina

Sa avea a’u ma se tama malosi o se fanau aulelei e toalua ma o se tane i se ava lelei ma galue malosi. Sa i ai sau galuega lelei ma se totogi lelei. Sa foliga atoatoa le olaga, ae na amata ona le sologa lelei ina ua ou maua i le kanesa, o se ituaiga o kanesa o le ulu ma le ua.

Sa ou galue o se fesoasoani i le epikopo i lena taimi, ma sa faia se matou tauvaga pasiketipolo faaletausaga i le falesa ae ou lagona le matua mai lava. Sa ou alu e vaai le fomai, ma ina ua mavae ni suesuega i le falesue toto, sa ia tau mai ia te a’u ua ou maua i le laasaga 4 o le kanesa o le ulu ma le ua. Sa ou popole ma fefe. Sa ou mafaufau pe o le taunuuga lenei o lo’u olaga ma o le a se mea o le a tupu i lo’u aiga pe afai ou te oti. Na pau le mea e mafai ona ou faamoemoe moni lava i ai mo le taitaiga ma le faamafanafanaga o le tatalo i le Tama Faalelagi.

Ina ua mavae aso e tolu o le tatalo e le aunoa, sa ou lagona le pei o musumusu mai se leo filemu, “Aua e te fefe.”

Mai lena lava taimi, sa ou le toe mafaufau i le fefe i le oti. Sa faigata pea lava mea mo a’u. Sa i ai se taimi na le mafai ai ona ou foloina se meaai ma sa ou ma’i tele ua le mafai ai ona ou moe, ae sa ou le faavaivai pe liliu ese mai le Atua—ma sa Ia fesoasoani mai ia te a’u.

Ua silia ma le 18 tausaga talu ona faaleleia lo’u kanesa. Ou te leiloa po o le a le umi ua faataga ai a’u e le Atua ou te ola ai ae ou te fiafia o loo mafai lava ona ou auauna atu i o’u uso ma tuafafine. Ou te iloa e le tuua lava pe tuulafoaia i tatou e lou tatou Tama Faalelagi. Ma afai tatou te mananao ia maua faamanuiaga mai le Atua, e le mafai ona tatou tuua pe tuulafoaia o Ia.