Te pi’ira’a o te mau ’āpōsetolo mātāmua o te Fa’aho’i-fa’ahou-ra’a
I te 8 nō fepuare 1835, ’ua ani ’o Iosepha Semita i nā taea’e Brigham ’e Joseph Young ’ia hīmene mai i mua iāna. Fāri’i a’era te Peropheta i te hō’ē heheura’a ē, ’ua tae i te taime e pi’i ai i te Tino ’Ahuru Ma Piti ’āpōsetolo.1
’Ua ani ’o Iosepha Semita ia Brigham ia pūhara i te hō’ē parau fa’aara ē, e fa’atupuhia te hō’ē ’āmuira’a i te mahana mā’a i muri iho. ’Ua parau ’oia ia Brigham ē, ’o ’oia te hō’ē o te Tino ’Ahuru Ma Piti.2
E ono mahana i muri a’e, ’ua putuputu mai te Feiā Mo’a. ’Ua parau a’era ’o Iosepha Semita ē, te hō’ē o te mau tumu mātāmua o te putuputura’a ’o te mā’itira’a ïa nā ’ite e toru o te Buka a Moromona—Olive Kaudere, Davida Uitima ’e ’o Maratini Haereti—« ’ahuru ma piti tāne i roto i te ’ēkālesia ’ei mau ’āpōsetolo ».3 ’Ua fāri’i a’ena ’o Olive ’e ’o Davida i teie pi’ira’a i te ’āva’e tiunu 1829, terā rā, noa atu ē « ’ua ’imi rāua i te Fatu nā roto i te ha’apaera’a mā’a ’e te pure » nō te ’imi i te Tino ’Ahuru Ma Piti, ’aita ā i tano te taime.4 I teienei, ’ua parau ’o Iosepha ē, ’ua tae i te taime.
Teie te Tino ’Ahuru Ma Piti (’ia au i te ’āna’ira’a i vauvauhia i roto i te putuputura’a) ’o Lyman Johnson, 23 matahiti ; Brigham Young, 33 matahiti ; Heber C. Kimball, 33 matahiti ; Orson Hyde, 30 matahiti ; David W. Patten, 35 matahiti ; Luke Johnson, 27 matahiti ; William E. McLellin, 29 matahiti ; John F. Boynton, 23 matahiti ; Orson Pratt, 23 matahiti ; William Smith, 23 matahiti ; Thomas B. Marsh, 34 matahiti ’e Parley P. Pratt, 27 matahiti. ’Ua tāvini rātou pā’āto’a i te hō’ē misiōni nā mua atu. E va’u tei ’āpe’e ia Iosepha Semita i roto i te tere o te Pūhapara’a o Ziona i te tau māhanahana nā mua atu.5
I muri a’e i tō rātou pi’ira’ahia, ’ua fa’atōro’ahia nā ’āpōsetolo tāta’itahi.6 ’Ua ’ī tō rātou mau ha’amaita’ira’a fa’atōro’ara’a i te mau fafaura’a o te manuiara’a misiōnare. ’Ua ha’amana’o Heber C. Kimball i muri a’e ē, « ’ua tohu te mau ha’amaita’ira’a e rave rahi mau mea ’o te tupu mai, e noa’a ia mātou te mana nō te fa’aora i tei ma’ihia, nō te ti’avaru i te diabolo, nō te fa’ati’a i tei pohe, nō te hōro’a i te ’ite i te matapō… nō te tura’i i te mau mou’a, ’e tei raro a’e te mau mea ato’a ia mātou nā roto i te i’oa o Iesu Mesia ».7
’Ua ha’apāpū ato’a ’o Olive Kaudere i te mau fifi tā rātou e fārerei : « ’Ia ineine noa ’outou i te mau taime ato’a nō te rave i te hō’ē fa’atusiara’a [sic] i tō ’outou ora, mai te mea ē, e ani mai te Atua i te reira nō te fa’ahaerera’a i mua ’e nō te patura’a i tāna ’ohipa ». ’Ua fa’aitoito Olive i te mau ’āpōsetolo ’ia ’imi i tō rātou iho ’ite nō ni’a ia Iesu Mesia ’ia ti’a ho’i ia rātou ’ia fa’a’ite pāpū ē, tē vai mau ra ’oia : « ’Eiaha e fa’aea i te tauto’o ē tae roa atu i te taime ’ua ’ite ’outou i te Atua, te mata ’e te mata ».8
I te ’āva’e mē 1835, ’ua ha’amata te mau ’āpōsetolo i te rave e rave rahi misiōni porohaerera’a nō te ’Ēkālesia, ’e ’ua ha’amaita’i ato’a tā rātou fa’aterera’a i e rave rahi ta’ata.