Sarah ’e te IRM
Tē ora nei te ta’ata pāpa’i i Colorado (Marite).
Penei a’e e tauturu te Vārua Maita’i ia Sarah ’eiaha ’ia ri’ari’a.
« ’A ora ai te Mesia i ni’a i te fenua nei, ’ua fafau mai ’oia e tono mai ’oia i te Vārua Maita’i nō te tāmāhanahana ia tātou, tō tātou hoa mau ’e te mure ’ore » (Children’s Songbook, 105).
« Mai te mea ra ē, e tītauhia te IRM [hōho’a nā roto i te ratio] nō te tua o Sarah », te parau ïa a te taote Frank. ’Ua ’ata’ata ’oia i ni’a ia Sarah. « E tārena vau hō’ē nō ananahi. E ho’i mai au e’ita e maoro ».
’Ua māuiui te tua o Sarah e mea māoro i teienei. I tōna ti’ara’a mai i ni’a i taua po’ipo’i ra, nō te māuiui rahi ’ua fifi ’oia ’ia ti’a ’āfaro, ’e ’aita e ’āfaro maita’i ’ia haere. ’Ua haere mai ’o Sarah ’e tōna māmā e hi’o i te taote Frank nō te ’ite ē, e aha te fifi.
« Te tahi fa’ahou ā IRM ? », te uira’a ïa a Sarah, ma te hi’o atu i ni’a i te māmā. ’Ua ravehia na te hō’ē IRM nā mua atu. Tē ha’amana’o ra ’oia i tōna ri’ari’a rahi i roto i te tura rahi tei pata i te mau hōho’a o te rotora’a o tōna tino.
« E mea fiu iho ā ïa e Sarah », te parau ïa a te māmā. « Terā rā, e tauturu te mau hōho’a i te taote Frank ’ia ’ite ē, e aha te fifi o tō ’oe tua. ’Ua ’ite au ’e nehenehe tā ’oe. ’E e fa’aea noa vau i pīha’i iho ia ’oe ». ’Ua ’umi’umi a’era te māmā i te rima o Sarah.
« E’ita ho’i tā ’oe e nehenehe e haere mai i roto ’e ’o vau », te parau ïa a Sarah. ’Ua taupe a’era tōna upo’o i raro, ’e ’ua tahe maira te hō’ē roimata i ni’a i tōna pāpāri’a. E nehenehe māmā e tomo i roto i te piha ’e ’ōna, ’ia haere rā ’o Sarah i roto i te tura o te mātini, ’ōna ana’e ïa i reira.
’Ua tauahi atura ’o māmā ia Sarah. « E parau mau te reira, terā rā, ’ua ’ite ānei ’oe ē, ’o vai te nehenehe e haere mai i reira nō te tāmāhanahana ia ’oe ? »
’Ua ha’amana’o a’era ’o Sarah i te hō’ē i’oa tāna i fa’aro’o nō te Vārua Maita’i : te Fa’aa’o Penei a’e e tauturu te Vārua Maita’i iāna ’eiaha ’ia mata’u.
« Te Vārua Maita’i ? » Te uira’a ïa a Sarah.
’Ua ’ē ’o māmā ’e tōna ūpo’o. « ’Ua tiʻa te reira. E nehenehe tā ’oe e pure ’ia tauturu mai te Vārua Maita’i ia ’oe. E pure ato’a māua ’o pāpā nō ’oe ».
’Ua fa’atupu te reira i te hō’ē mana’o maita’i roa i roto ia Sarah. « E nehenehe ānei tā’u e ani ia pāpā i te hō’ē ha’amaita’ira’a ? »
’Ua ʼataʼata māmā. « ’Oia mau. ’Ua ’ite au ē, e au roa ’oia ’ia rave i te reira ».
I taua pō ra ’ua tu’u ’o papa i tōna nā rima i ni’a i te upo’o o Sarah ’e ’ua hōro’a iāna i te hō’ē ha’amaita’ira’a autahu’ara’a. ’A ha’amaita’i ai ’oia ia Sarah ’ia fāri’i ’oia i te tāmāhanahana a te Vārua Maita’i, ’ua ’ī a’era tōna tino i te hō’ē māhanahana marū. ’Ua vai noa taua huru ra i ni’a iāna i te pō tā’āto’a.
I te po’ipo’i a’e ’ua tārava ’o Sarah i ni’a i te ’iri e fa’ahe’ehia i roto i te mātini IRM. ’Ua fa’ahiti noa ’oia i roto i tōna upo’o i te mau parau tā pāpā i fa’ahiti i roto i tōna ha’amaita’ira’a : E tae mai te Vārua Maita’i nō te tāmāhanahana ia ’oe. ’Ua ’u’umi pūai ’o Sarah i te rima o mama. ’Ua fa’ahe’e a’era te tuati iāna i roto i te mātini
E māniania huru ’ē tō te mātini IRM ’a pata ai ’oia i te mau hōho’a o tōna tua. Tītauhia ia Sarah ’ia tārava ma te ha’uti’uti ’ore, ’ia ’ore te mau hōho’a ’ia māramarama ’ore. ’Ua ri’ari’a ri’i ’oia i te tahi taime, terā rā, ’ua fāri’i fa’ahou ’oia i te māhanahana. E au ïa mai te hō’ē o te mau tauahi a māmā. ’E ’aore rā mai te hō’ē ’ahu ta’oto au maita’i. ’Ua ’ite a’era ’oia ē, ’aita e fifi fa’ahou. Hou ’a ’ite ai ’oia i te reira, ’ua oti ato’a ïa te IRM !
I roto i te piha tōro’a o te taote Frank, ’ua fa’a’ite ’oia ia Sarah ’e i tōna māmā i te mau hōho’a o te tua o Sarah. « E mea maita’i roa nō te mea ’ua tarava noa ’oe ma te ha’uti ’ore », te parau ïa a te taote Frank ia Sarah ’a tuturi ai ’oia i pīha’i iho iāna. « Tē fa’a’ite nei teie mau hōho’a o tō ’oe tua ē, tītauhia ’ia tāpū ia ’oe nō te tauturu ia ’oe ’ia haere maita’i a’e ».
’Ua horomi’i ’o Sarah i te huare.
« Tē hina’aro nei mātou ’ia rave ’oi’oi i te tāpūra’a », te parau ïa a te taote Frank, ma te hi’o i ni’a i te māmā o Sarah. I muri iho, ’ua fāriu fa’ahou ’oia i ni’a iho ia Sarah. « E tītauhia paha te tahi tau hepetoma i muri a’e e ti’a ai ia ’oe ’ia riro fa’ahou mai te mātāmua ra, terā rā, i muri a’e i tō’u ’itera’a ia ’oe i teie mahana, ’ua ’ite au ē, e maita’i ’oe ».
’Ua tāmata ’o Sarah i te feruri i te mau mea ato’a tāna e rave i muri a’e ’a fa’a’āfaro ai te taote Frank i tōna tua. E nehenehe tā’u e horo ’e e ’ōu’a i roto i te hō’ē āpapara’a rau’ere rā’au. ’Aita i ti’a iāna ’ia rave i terā mau mea tā’āto’a. Terā rā e mea ri’ari’a a’e te tāpū i te hō’ē IRM ! ’Ua ha’amana’o a’era ’o Sarah i tāna mau pure ’e i tōna ha’amaita’ira’a ta’a ’ē. ’Ua tono mai te Metua i te Ao ra i te Fa’aa’o iāna. E tauturu fa’ahou ’oia iāna.
’Ua hi’o ’oia i ni’a iho i te taote Frank. ’Ua ui a’era ’ōia : « i muri iho e nehenehe iā’u e ’ōu’a i roto i te hō’ē āpapara’a rau’ere rā’au ? »
’Ua ’ata maira ’oia. « E nehenehe tā ’oe e ’ōu’a i roto i te hō’ē āpapara’a rau’ere rā’au ».