’Ia ’ite hou ’a haere ai : Te mau bāpetizora’a hiero

Nā Heather J. Johnson

Te mau ve’a a te ’Ēkālesia

’Aita e tītauhia ’ia tīa’i E nehenehe te mau melo ti’amā tā’āto’a, tae noa atu i te feiā ’āpī ’e te mau melo ’āpī, e tāvini i roto i te hiero i teienei.

standing in front of temple doors

« E mata nā tātou i te riro ’ei mau ta’ata haere hiero ’e te here i te hiero », te parau ïa a te peresideni Howard W. Hunter (1907-95). « E ti’a ia tātou ’ia ha’ape’epe’e i te haere pinepine i te hiero… mai te au i tō tātou vatara’a. E haere tātou ’eiaha nō tō tātou noa mau tupuna tei pohe, nō teie ato’a rā ha’amaita’ira’a nō tātou iho ’ia ha’amori i roto i te hiero, nō te mo’ara’a ’e nō te pārurura’a e roa’a mai i roto i taua mau papa’i tei ha’amo’ahia ra » (« A Temple-Motivated People », Ensign, Fepuare 1995, 5).

E au teie parau a’o nō te mau melo ato’a o Te ’Ēkālesia a Iesu Mesia i te Feiā Mo’a i te mau Mahana Hope’a Nei—noa atu e melo bāpetizo-’āpī-hia ’outou. Mai te mea ē, e mea ti’amā ’outou, ’aita e pu’e tau tīa’ira’a e vai ra hou ’a ti’a ai ia ’outou ’ia haere i te hiero. I te taime ’a bāpetizohia ai ’e ’a ha’amauhia ai ’outou, e nehenehe tā ’outou e fāri’i i te hō’ē parau fa’ati’a nō te hiero i tā’ōti’ahia.

Maoti teie parau fa’ati’a ’outou e tomo ai i roto i te hiero nō te rave i te mau bāpetizora’a ’e te mau ha’amaura’a mono nō te mau tupuna i pohe. ’A tāvini ai ’outou ’ē ’a ha’amori ai i roto i te hiero, e nehenehe tā ’outou e ha’apūai i tō ’outou ’itera’a pāpū nō ni’a i te ’evanelia.

Nō ni’a i tāna haerera’a mātāmua i te hiero, ’ua parau ’o Natalia Lorena Figueroa nō Rāparata : « I roto i te piha bāpetizora’a o te hiero, ’ua hi’o vau i te hō’ē taea’e i bāpetizohia nō tō’u pāpā rū’au ’e nō tō’u mau tonton. I muri iho, ’ua bāpetizohia vau nō tō’u māmā rū’au ’e nō tō’u mau tatie. ’Aita ’e nehenehe e parau te ’oa’oa tā’u i fāri’i. ’Ua tahe tō’u roimata, ’e ’ua ’ite au i te ahu i roto i tō’u ’ouma ’aita vau i ’ite a’enei ». Tē tīa’i ato’a mai ra te reira mau huru ha’amaita’ira’a i te feiā ato’a e fāri’i ’e e fa’a’ohipa i te mau parau fa’ati’a hiero i tā’ōti’ahia.

Mau uira’a ui-pinepine-hia

Nāhea vau e fāri’i ai i te hō’ē parau fa’ati’a tā’ōti’ahia ?

• 12 tō ’oe matahiti ’e ’aore rā pa’ari atu, ’e e melo ti’amā nō te ’Ēkālesia. Tītauhia i te mau tāne ’ia fāri’i i te Autahu’ara’a a Aarona, ’o te nehenehe e ravehia i roto hō’ē hepetoma i muri a’e i tō rātou bāpetizora’a.

• Nō te fāri’i i te hō’ē parau fa’ati’a, e uiui tō ’outou ’episekōpo ’e ’aore rā te peresideni ’āma’a ia ’outou. Hō’ē ā uiuira’a i te uiuira’a tei ravehia nā mua a’e i tō ’outou bāpetizora’a. E paraparau ’outou i tō ’outou ’itera’a pāpū nō ni’a i te ’evanelia ’e i tō ’outou ha’apa’ora’a i te mau fa’auera’a.

• E mana te parau fa’ati’a nō te hō’ē matahiti te māoro.

E aha te tahi mau ha’amaita’ira’a nō te fāri’ira’a i te parau fa’ati’a i tā’ōti’ahia ?

• E nehenehe tā ’outou e tāvini i tō ’outou mau tupuna pohe ’e vetahi ato’a tei pohe nā roto i te ravera’a i te mau bāpetizora’a ’e te mau ha’amaura’a mono nō rātou.

• E nehenehe ’outou e fa’aha’amana’o-fa’ahou-hia i tō ’outou iho bāpetizora’a ’e te ha’amaura’a ’e te mau fafaura’a tā ’outou i rave.

• Noa atu ē, ’aita tā ’outou e nehenehe e haere pinepine i te hiero, e nehenehe tā ’outou e ta’ita’i i tā ’outou parau fa’ati’a i ni’a ia ’outou ’ei fa’aha’amana’ora’a tāmau i te hiero ’e i tā ’outou fafaura’a ’ia ti’amā ’ia haere i reira.

• E riro te orara’a ma te ti’amā nō te hō’ē parau fa’ati’a tā’ōti’ahia i te tauturu ia ’outou ’ia fa’aineine nō te fāri’i i tō ’outou iho mau ’ōro’a hiero te ’ōro’a iho o te hiero ’e te tā’atira’a.

Nāhea vau ’ia fa’aineine i te hō’ē tere i te hiero ?

• ’A ani i te hō’ē ti’a fa’atere nō te pāroita ’e ’aore rā nō te ’āma’a, mai te ta’ata fa’atere ’ohipa mīsionare nō te pāroita ’e ’aore rā te peresideni nō te Sōtaiete Tauturu, i te tauturu nō te fa’anaho i te hō’ē tere i te hiero.

• ’Ua piahia i ni’a i te tahua natirara te tārena bāpetizora’a o te hiero tāta’itahi i ni’a i te temples.lds.org. E nehenehe ato’a tā ’outou e niuniu i te hiero nō te ha’amāramaramara’a.

• Mai te mea ē, tē haere nei ’outou nō te taime mātāmua, e nehenehe tā ’outou e niuniu i te hiero nō te tārena i te hō’ē fārereira’a. Nā roto i te reira, e inieine ïa rātou nō te fāri’i poupou ia ’outou ’e nō te fa’ata’a mai e aha te ’ohipa tā ’outou e rave i roto i te hiero.

• ’A ’ō’omo i tō ’outou ’ahu sābati nehenehe roa a’e nō te haere i te hiero.

• ’A hōpoi i te ’ahu roto ’uo’uo ’ei ’ahu taui. Tē vai ra te tahi mau hiero e hōro’a mai i te ’ahu roto ’uo’uo, ’aita te tahi. E hōro’a mai te hiero i te ’ahu bāpetizora’a ’uo’uo ’e te tauera.

E aha te ’ohipa ’e tupu ’ia haere ana’e au i te hiero nō te rave i te bāpetizora’a ’e te ha’amaura’a mono ?

• ’Ia tomo ana’e ’outou i roto i te hiero, ’a tahi, e haere ’outou i te pa’epa’e nō te parau fa’ati’a. E hi’opo’a hō’ē rave ’ohipa nō te hiero i tā ’outou parau fa’ati’a.

• I muri iho, e haere ’outou i te mau piha ’ō’omora’a ’ahu nō te taui i te ’ahu, te tāne tā rātou ’e te vahine tā rātou. ’Ua fa’ata’ahia te mau ’āfata ’ahu ta’a ’ē nō te taui i tō ’outou ’ahu ’e ’ō’omo i te ’ahu ’uo’uo.

• Nā te mau rave ’ohipa nō te hiero e arata’i ia ’outou i te vāhi e haere nō te rave i te mau bāpetizora’a ’e te mau ha’amaura’a mono.

• ’Ua hōho’a noa te mau bāpetizora’a ’e te mau ha’amaura’a tā ’outou e rave i tō ’outou iho bāpetizora’a ’e te ha’amaura’a, terā rā, tē rave nei ’outou i te reira ’ei mono ’e ’ei maita’i ho’i nō te hō’ē ta’ata pohe.

• ’Ia oti tā ’outou ravera’a i te mau ’ōro’a, e ho’i fa’ahou ’outou i roto i te piha tauira’a ’ahu nō te ’ō’omo i tō ’outou iho mau ’ahu.

• ’Eiaha e taiā ’ia haere ’outou i te hiero. Tē vai ra te mau rave ’ohipa nō te hiero i te mau vāhi ato’a tā ’outou e haere i roto i te hiero. E tauturu rātou ia ’outou.