O Tali mai Taitai o le Ekalesia
E Faapefea ona Maua se Molimau
Mai se saunoaga i le konafesi aoao ia Aperila 2008.
O le laasaga muamua i le mauaina o soo se ituaiga o malamalama o le matua manao lea ia iloa. I le tulaga o le malamalama faaleagaga, o le isi laasaga o le ole atu i le Atua i le tatalo faamaoni. E pei ona tatou faitau i faaaliga o nei ona po, “Afai e te ole mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau. (MF&F 42:61).
O le mea lea na tusia e Alema e uiga i le mea na ia faia: “Faauta, sa ou anapogi ma tatalo i aso e tele ina le mafai ona ou iloa nei mea mo au lava ia. O lenei foi, ua ou iloa mo a’u lava ua moni, aua ua faaalitinoina ia te a’u e le Alii le Atua i Lona Agaga Paia” (Alema 5:46).
A o tatou moomoo ma saili, e tatau ona tatou manatua o le mauaina o se molimau e le o se mea tuumamaina ae o se faagasologa lea e tatau ona tatou faia o se mea. Na aoao mai Iesu, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).
O se isi auala e sailia ai se molimau e foliga mai e ofoofogia tele pe a faatusatusa i metotia o le mauaina o isi malamalama. Tatou te mauaina pe faamalosia se molimau e ala i le tuuina atu. Sa fautua mai foi se tagata faapea o nisi o molimau e faigofie ona maua e ala i le tu atu e tuuina atu le molimau nai lo le tootuli e tatalo mo se molimau.
O se molimau patino o se vaega autu lea i lo tatou faatuatua. O le mea lea, o mea e tatau ona tatou faia ina ia maua ai, faamalosia, ma faatumauina se molimau e taua tele i lo tatou olaga faaleagaga. E le gata i mea ia ua uma ona ta’ua, e tatau ona tatou aai ma feinu i le faamanatuga i vaiaso taitasi (tagai MF&F 59:9) e agavaa ai mo le folafolaga taua o le a tatou “maua pea lona Agaga e faatasi ma i [tatou]” (MF&F 20:77). Ioe, o lena Agaga o le punavai o a tatou molimau.