Faasusulu Atu Lou Malamalama
Ou te manao e tau atu ia te outou e uiga i ni teineiti laiti se toalua ou te iloa o ni faataitaiga susulu i le faasoaina atu o le talalelei. Ina ua lata ina atoa le valu tausaga le matua o la ma tama teine, o Neli, sa nonofo lo matou aiga i Suitiselani. Sa matuai fiafia lava Nellie ina ia papatisoina. I le toeitiiti lava oo i lona aso fanau, sa matou fai afiafi faaleaiga ai ma la matou uo o Tina. Sa aoaoina Tina e faifeautalai. Peitai na te lei mautinoa pe sa ia manao e papatiso.
Ina ua uma le matou lesona sa matou talosagaina Tina e tatalo. E lei lelei tele le tautala faaperetania a Tina, o lea sa ia tatalo ai i le gagana Saina. Ma te lei malamalama i ana upu, ae sa matou lagonaina le Agaga ina ua ia tatalo.
Mulimuli ane i lena po, sa fesili atu ai Neli pe mafai ona papatisoina o ia ma Tina i le aso e tasi. Ma te lei iloa lagona o Tina e uiga i lena manatu. Ae na matou malilie uma e tatau lava ona valaau ma talosaga atu Neli. Na matou tetei i le fai mai o Tina, ioe!
Na papatisoina Neli ma Tina i le faaiuga o lena vaiaso. Mulimuli ane, sa tau mai e Tina se tala matagofie. Sa ia faamanatu mai ia i matou e uiga i lana tatalo i la matou afiafi faaleaiga. I lana tatalo sa ia fesili ai i le Tama Faalelagi e tau atu ia te ia pe tatau ona ia papatiso. Ina ua valaau atu Neli i se taimi mulimuli ane o lena po, sa iloa e Tina sa faafofogaina e le Tama Faalelagi lana tatalo.
O la ma uo o Jasmine o se faataitaiga lelei ia i maua foi. Sa 12 tausaga o Jasmine. Sa avea lona aiga ma a matou uo lelei a o matou nonofo i Sasae Tutotonu. I lona atunuu, e le mafai e tagata o le Ekalesia ona talanoa e uiga i le talalelei i isi. E faasa i le tulafono. Ae sa filifili Jasmine e mafai ona ia faasoa atu le talalelei i le faia o mea sa faia e Iesu. E mafai ona ia faasoa atu le alofa ma le agalelei i isi. Po o fea lava e alu ai Jasmine po o le a foi le mea na te faia, na te taumafai ia faapei o Iesu. Sa avea o ia ma se faataitaiga mamana i isi.
Ua faaali mai e Neli ma Jasmine ia i tatou le ala e mafai ai ona avea ma faataitaiga o Iesu Keriso. E mafai ona tatou faia lenei mea e tusa lava po o le a le matua o tatou i ai po o fea o tatou nonofo ai.