I Le Itu a le Alii: O Lesona mai le Tolauapiga a Siona
Saunia e Elder David A. Bednar
O Le Korama a Aposetolo e Toasefululua
Mai se saunoaga i le faigalotu o le Vaiaso o Aoaoga, “O Ai o i ai i le Itu a le Alii? O Le Taimi Lenei e Faaali Atu Ai, “na fofogaina i le Iunivesite a Polika Iaga–Idaho i le aso 30 o Iulai, 2010.
O le savaliga a le Toalauapiga a Siona na taitaiina e le Perofeta o Iosefa Samita i le 1834 o se faataitaiga ofoofogia o le filifilia po o ai o i ai i le itu a le Alii. O le iloiloina o le talafaasolopito o le Tolauapiga a Siona e mafai ona fesoasoani ia i tatou e aoao ai i ni lesona taua ma lemasuia mai mea taua na tutupu i le talafaasolopito o le Ekalesia lea e faatatau i o tatou olaga ma tulaga i le taimi nei.
O Le a Le Tolauapiga a Siona?
Na maua e le Perofeta o Iosefa Samita se faaaliga i le 1831, e atofaina Initipene, Itumalo o Siakisone, Misuri, o le nofoaga mo Siona, o le nofoaga tutotonu o le faapotopotoina mo le Au Paia o Aso e Gata Ai ma le nofoaga mo le Ierusalema Fou lea na faaalia mai i le Tusi Paia ma le Tusi a Mamona (tagai MF&F 57:1–3; tagai Faaaliga 21:1–2; Eteru 13:4–6). I le taumafanafana o le 1833, na faitauina ai tagata Mamona mo le pe tusa ma le tasi vaetolu o le faitau aofai o tagata i le Itumalo o Siakisone. O le televave o le faateleina o le aofai, o aafiaga faaupufai faaolioli, ma talitonuga iloagofie faalelotu ma faaupufai a nei tagata faatoa masii mai o mafuaaga ia o le popole o isi tagata sa nofoia le eria, ia sa poloaiina loa tagata o le Ekalesia e tuua o latou fale ma fanua. Ina ua le faatinoina lenei poloaiga, na osofaia loa e tagata Misuri ia nuu ma alalafaga ia Novema 1833 ma faamalosia le Au Paia e o ese.
Forging Onward, Ever Onward, saunia e Glen Hopkinson.
O le tuufaatasiga o le Toalauapiga a Siona o se poloaiga na aumai i se faaaliga ia Fepuari 1834 (tagai MF&F 103). O le faamoemoega autu mo lenei autau a le Alii o le puipuia lea o tagata Mamona na i ai i le Itumalo o Siakisone mai nisi osofaiga—ina ua uma ona faataunuuina e le autau ona matafaioi e malaga faatasi ma tagata o nofoia laufanua ina ia toe foi saogalemu atu i o latou fale ma laufanua. Sa aumai foi e le tolauapiga ia tupe, sapalai, ma le lagolago faamalosiau i le Au Paia matitiva. O lea la, ia Me ma Iuni 1834, o se vaega e silia ma le 200 volenitia o le Au Paia o Aso e Gata Ai na taitaiina e le Perofeta o Iosefa Samita na malaga mo le pe tusa ma le 900 maila (1,450 km) mai Katelani, Ohaio, i le Itumalo o Kalei, Misuri. O Ailama Samita ma Laimani Wight na faatulagaina foi se vaega toalaiti o tagata volenitia mai le Teritori o Michigan ma feiloai ai ma le vaega a le Perofeta i Misuri. O tagata na auai i le Tolauapiga a Siona na aofia ai Polika Iaga, Heber C. Kimball, Uilifoti Uitilafi, Pale P. Palate, Orson Hyde, ma le toatele o isi tagata iloga mai le talafaasolopito o le Ekalesia.
O lo’u faamoemoega e le o le faamatalaina o faamatalaga auiliili o lenei malaga faigata po o le faamatala atu o vaega taua uma faaleagaga na tupu. Sei o’u otootoina atu ni nai mea tetele na tutupu i le malaga o le Tolauapiga a Siona:
-
Na lei mafai e Kovana Daniel Dunklin o Misuri ona tuuina atu le fesoasoani na folafola atu o le vaegaau lea na manaomia mo tagata paionia Mamona ina ia toe nofoia o latou laueleele.
-
O feutagaiga na faia a taitai o le Ekalesia, taitai o le setete o Misuri, ma tagatanuu o le Itumalo o Siakisone e aloese mai fetauaiga ma ia foia feeseeseaiga o meatotino na lei mafai ona ausia se maliega faamalieina.
-
Mulimuli ane, na faatonuina e le Alii Iosefa Samita e faataape le Tolauapiga a Siona ma faailoa mai le mafuaaga na lei ausia ai e le autau a le Alii ona faamoemoega na mafaufauina (tagai MF&F 105:6–13, 19).
-
Na faatonuina e le Alii le Au Paia ia fausia ni uiga agaalofa i le eria e saunia ai mo le taimi o le a toe malosi ai Siona faaletulafono nai lo o tulaga faalemiliteli (tagai MF&F 105:23–26, 38–41).
Na vaevaeina le autau a Siona i ni vaega laiti i le faaiuga o Iuni 1834, ma na tuuina atu ni pepa e faamalolo ai mai tiute faamiliteli i nai aso muamua o Iulai 1834. O le toatele o volenitia na toe foi atu i Ohaio.
O A Ni Lesona Ua Mafai Ona Tatou Aoao Mai Le Tolauapiga a Siona?
Ona o le toilalo e toe faafoi le Au Paia i o latou laueleele i le Itumalo o Siakisone, na manatu ai nisi o le Tolauapiga a Siona o se taumafaiga e le’i manuia ma e le’i aoga. O se uso i Katelani—o se tasi sa leai se faatuatua e volenitia ai e malaga faatasi ma le tolauapiga—na feiloai ma Poliga Iaga i lona toe foi mai mai Misuri ma fesili atu, “Ia, o le a la se mea na e maua mai lenei malaga e leai se aoga i Misuri faatasi ai ma Iosefa Samita?’ ‘O mea uma sa matou o ai,’ o le tali vave mai lea a Polika Iaga, ‘E le mafai ona ou fesuiaia le aafiaga sa ou mauaina i lena malaga mo le tamaoaiga uma ua i ai i le Itumalo o Geauga,’” o le itumalo lea sa i ai Katelani i le taimi lea.1
Ou te valaaulia outou ina ia mafaufau mamafa e uiga i le tali a Polika Iaga: “O mea uma sa matou o ai.” O a ni aoaoga taua tatou te mafai ona aoaoina mai se taumafaiga e lei ausia lona faamoemoega taua ae ui i lea na saunia mo na Au Paia anamua, ma saunia mo i tatou, ia faamanuiaga o le olaga atoa?
Ou te talitonu e le itiiti ifo ma le lua ni lesona atoatoa e mafai ona maua i le tali a Uso Polika i lena fesili faatiga: (1) o lesona o le tofotofoina, iloiloga, ma le sauniuni ma le (2) o le lesona o le faamamaluina, aoaoina mai ai, ma le mulimuli i le Usoga. Ou te faamamafa atu o nei lesona e taua, pe e sili atu foi le taua, mo i tatou e aoao ai ma faaaogaina i le taimi nei e pei ona i ai i le silia ma le 180 tausaga ua mavae mo volenitia i le Tolauapiga a Siona.
O Lesona o le Tofotofoina, Iloiloina, ma le Sauniuni
Sa tofotofoina ma faaosoosoina le Au Paia faamaoni o e na savavali i le autau a le Alii. E pei ona folafola mai e le Alii, “Ua Ou faalogoina a latou tatalo, ma o le a Ou talia la latou taulaga; ma ua tatau ai ia te aʼu ona aumai i latou seia oo mai iinei mo se tofotofoga o lo latou faatuatua” (MF&F 105:19).
I se auala e sili ona moni, na fatuina e luitau faaletino ma le faaleagaga o le Tolauapiga a Siona se iloiloga o le saito mai le titania (tagai Mataio 13:25, 29–30; MF&F 101:65), o le vavaeeseina o mamoe mai oti (tagai Mataio 25:32–33), o se tuueseeseina o le malosi faaleagaga mai le vaivai. O lea la, o alii ma tamaitai taitasi o e na auai i le autau a le Alii na feagai ma taliina le fesili sailiili o le “O Ai o i ai i le Itu a le Alii?”2
A o faamaeaina e Uilifoti Uitilafi ana mataupu faapisinisi ma sauniuni e auai i le Tolauapiga a Siona, na lapataia o ia e ana uo ma tuaoi e aua nei auai atu i lea malaga lamatia. Sa latou fautua atu, “Aua e te alu, afai e te alu o le a fasiotia oe.” Sa ia tali atu, “Afai ou te iloa o le a i ai se pulufana e tuuina i lo’u fatu o le laa muamua lava ou te faia i le setete o Misuri o le a ou alu”3 Na silafia e Uilifoti Uitilafi e le tatau ona ia fefe i taunuuga leaga pe afai lava o loo ia faamaoni ma usiusitai. E manino lava sa i ai o ia i le itu a le Alii.
E moni lava, “o le taimi e faaali ai”4 mo na alii ma tamaitai faamaoni o le taumafanafana lea o le 1834. Ae o le faaiuga e savavali faatasi ma le Perofeta o Iosefa Samita i Misuri sa le o se tali e faatasi, lautele, pe vave ona tali atu ai i le fesili “O Ai o i ai i le Itu a le Alii?” O le taimi e faailoa atu ai i na Au Paia, na tulai mai soo ma faifai soo e ala i le vaivai o le mafaufau ma le tino, e ala i ni manuaga tafetotoi i o latou vae, e ala i le le lava o meaai ma vai mama, e ala i le anoanoai o mea e le fiafia, e ala i faatuiesega ma le fouvalega i totonu o le tolauapiga, ma e ala i taufaamatau mai fafo mai fili matautia.
O le taimi e faaali atu ai na oo mai i aafiaga ma faigata o itula uma, o aso uma, ma vaiaso uma. O se tuufaatasiga maoae o le tele o filifiliga ma faatinoga ia na foliga mai e laiti i olaga o nei Au Paia tuuto ia na saunia le tali mautinoa i le fesili, “O Ai o i ai i le Itu a le Alii?”
Na faapefea ona avea ia tofotofoga ma iloiloga ia na tutupu i olaga o tagata na auai i le Tolauapiga a Siona ma se sauniuniga? O le mea e malie ai, o le toavalu o le usoga ia na valaauina i le Korama a Aposetolo e Toasefululua i le 1835, faapea ai foi ma Fitugafulu uma na valaauina i lea lava taimi e tasi, o tagata ua i ai aafiaga o le Tolauapiga a Siona. I se fonotaga ina ua mavae le valaauina o Fitugafulu, na tautino mai ai e le Perofeta o Iosefa Samita:
“Uso e, o nisi o outou ua feita ia te au, ona tou te lei tau i Misuri; ae sei ou tau atu ia te outou, e lei finagalo le Atua tou te tau. Sa le mafai ona Ia faatulagaina lona malo i ni tamalii e toasefululua e tatalaina faitotoa o le talalelei i atunuu o le lalolagi, ma i ni tamalii e toa fitusefulu i lalo o la latou taitaiga ia mulimuli i o latou tulagaaao, seiiloga na Ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo.
“O lenei, ua maua e le Alii lana Toasefululua ma ana Fitugafulu, ma o le a i ai nisi korama o Fitugafulu e valaauina.”5
E moni, o le Tolauapiga a Siona sa avea ma se afi a le tunu auro mo volenitia uma i se tulaga lautele ma ae aemaise lava mo le toatele o taitai o le Ekalesia a le Alii i le lumanai.
O aafiaga na maua e volenitia i le autau a le Alii o ni sauniuniga foi mo malaga tetele i le lumanai o tagata o le Ekalesia. Na silia ma le 20 o tagata auai o le Tolauapiga a Siona na avea ma kapeteni ma lutena i malaga maoae e lua—o le uluai fa tausaga i le lumanai, e aofia ai le aveesea o le 8,000 i le 10,000 tagata mai Misuri i Ilinoi6; ma le lona lua, o le 12 tausaga i le lumanai, o le malaga tele mai sisifo pe tusa ma le 15,000 le Au Paia o Aso e Gata Ai mai Ilinoi i Sate Leki ma isi vanu o Mauga Papa. I le avea ai ma se aoaoga faamasani sauniuni, sa avea le Tolauapiga a Siona ma taua tele i le Ekalesia. O le tausaga 1834 o le taimi lea e faailoa ai—ma ia saunia mo le 1838 ma le 1846.
I le avea ai ma tagata taitoatasi ma aiga, o le a tofotofoina foi i tatou, iloiloina, ma saunia, e pei o tagata o le Tolauapiga a Siona. Ua tumu tusitusiga paia ma aoaoga a le Usoga i folafolaga o le faatuatua i le Alii o Iesu Keriso; ua gaosia ai, faamamalu, ma manatua ai ia feagaiga paia; ma o le usiusitai i poloaiga a le Atua o le a faamalosia ai i tatou ina ia saunia mo, ia taulimaina, faatoilalo, ma ia aoao mai luitau ma tofotofoga o le olaga faaletino.
Ua faailoa manino mai e taitai o le Ekalesia a le Alii nisi o tofotofoga tuufaatasi po o le faaleaugatupulaga e mafai ona tatou faamoemoe e fetaiai i ai i o tatou aso ma augatupulaga. I le avea ai ma Peresitene o le Korama a Aposetolo e Toasefululua i le 1977, sa tuuina mai ai e Peresitene Ezra Taft Benson (1899–1994) se leo faaperofeta o le lapataiga i se fonotaga a sui risone. Ou te siina mai le savali a Peresitene Benson ma valaaulia outou ina ia gauai mai i lana fautuaga:
“Ua tofu augatupulaga uma ma ona tofotofoga ma ona avanoa e tutu atu ai ma faamaonia i latou lava. E te fia silafia se tasi o a tatou tofotofoga sili ona faigata? Faafofoga i upu o le lapataiga a Polika Iaga, ‘O le mea e sili ona leaga ou te fefe i ai e uiga i nei tagata, o le a latou mauoa i lenei atunuu, ma galo ai le Atua ma Lona nuu, faasolo puputa, ma tuliesea i latou lava i fafo mai le Ekalesia ma o i seoli. O nei tagata o le a latou tatalia tagata faatupu faalavelave, au gaoi, mativa, ma ituaiga uma o sauaga, ma faamaoni. Ae o lo’u popolega sili o le le mafai lea ona latou tatalia le tamaoaiga.’”
Na faaauau pea Peresitene Benson: “O o tatou tofotofoga ua sili atu ona faigata, aua ua sili atu ona poto ma sili atu ona atamai le fili. Ua foliga mai ua itiiti le taufaamatau ma ua faigata atu ona iloagofie. E ui o tofotofoga uma o le amiotonu e faatusa i se tauiviga, e foliga mai o lenei tofotofoga patino e le pei o se tofotofoga, e leai se tauiviga ma ua mafai ona avea ma tulaga sili ona taifaasese i lo tofotofoga uma.
“E te iloa le mea e mafai ona faia e le filemu ma le manuia i se tagata—e mafai ona faamatamoeina i latou. Ua lapataiina i tatou e le Tusi a Mamona i le auala o le a taitai lemu ese atu ai i tatou e Satani, i aso e gata ai, i lalo i seoli. Ua i ai i le Alii i luga o le fogaeleele ni sauai faaleagaga faaolioli ia na Ia faapolopoloina mo le pe tusa ma le ono afe tausaga e fesoasoani i le tauaveina ma le manumalo le Malo, ma o loo taumafai le tiapolo e tuu atu i latou e momoe. E iloa e le fili atonu o le a ia le manuia tele i le taumafai e aumai i latou e faia agasala tele ma le matuia o poloaiga. O lea na te faamoegase ai i latou, e pei o Gulliver, ao ia nonoaina i latou ma tamai agasala o le faatalale. Ma o le a le lelei o se sauai tautulemomoe, faaleogalua, e le tuuto i le avea ai ma se taitai?
“Ua tele naua sauai faaleagaga faaolioli o e ua tatau ona siitiaina ma le malosi atili ia o latou aiga, o le malo, ma le atunuu. Ua ia i tatou le toatele o e o lagona o i latou o ni alii ma ni tamaitai lelei, ae e tatau ona i ai se mea latou te lelei ai—o ni peteriaka malolosi, faifeautalai lototetele, tagata faigaluega totoa o talafaasolopito o aiga ma le malumalu, tagata lotonuu faamaoni, ma uso tuuto o korama. I se faapuupuuga, e tatau ona luluina ma fagua mai i tatou mai se moe faaleagaga.”7
Mafaufau faapea o oa, tamaoaiga, ma le le popole e mafai ona avea ma tofotofoga i o tatou aso ma e tutusa lava pe sili atu foi le malosi nai lo sauaga ma faigata faaletino ia na onosaia e Au Paia o e na volenitia e savavali i le Tolauapiga a Siona. E pei ona faamatalaina mai e le Perofeta o Mamona i lana aotelega matagofie e uiga i le li’o o le faamaualuga o loo i ai i le Helamana 12:
“Ma ua faapea ona mafai ona tatou vaai i le sese, ma le le maumaututu foi o loto o le fanauga a tagata; ioe, ua mafai ona tatou vaai e faamanuia ma faatamaoaiga e le Alii, i lona agalelei silisili le tuaoia, i latou o e e tuu atu lo latou faalagolago ia te ia.
Ioe, ma e mafai ona tatou vaai o le taimi lava e faamanuiaina ai e ia ona tagata, ioe, i le fua tele mai o o latou fanua, a latou lafu ma a latou fagaga, ma i auro, ma ario, ma mea taua uiga eseese uma o ituaiga taitasi ma teuga; i le faasaoina o o latou ola, ma laveai i latou i fafo mai lima o o latou fili; i le faamaluluina o loto o o latou fili ina ia latou le sii taua faasaga mai ia te i latou; ioe, ma i se aotelega, i le faia o mea uma mo le manuia ma le fiafia o ona tagata; ioe, o le taimi lena latou te faamaaa ai o latou loto, ma galo ai ia i latou le Alii lo latou Atua, ma soli i lalo o o latou vae le Paia e Toatasi—ioe, ma o le pogai ona o lo latou le popole, ma lo latou tamaoaiga tele” (Helamana 12:1–2).
Ou te valaaulia faapitoa outou e matauina le fasifuaitau mulimuli o le fuaiupu mulimuli: “ma o le pogai ona o lo latou le popole, ma lo latou tamaoaiga tele.”
Na aoao mai foi Peresitene Harold B. Lee (1899–1973) e uiga i le tofotofoina tuufaatasi o le le popole o fetaiai ma i tatou i o tatou aso: “Ua tofotofoina i tatou, ua faaosoosoina i tatou, o loo tatou i ai i nisi o tofotofoga sili ona matautia i lenei vaitaimi ma e atonu tatou te le o iloa le matautia o tofotofoga o tatou feagai ai. I na aso sa i ai le fasioti tagata, sa i ai tagata faomea, sa i ai e na faasaua. Na tutuliesea i latou i le toafa, sa latou fiaai ma le lavalava, ma sa latou maalilili. Sa latou o mai iinei i lenei laueleele faapitoa tele. O i tatou o e mautofi i mea na latou tuuina mai ia i tatou. Ae o le a le mea o le a tatou faia i ia mea? I le taimi nei ua tatou olioli i se olaga o le tamaoaiga, o mea tatou te lei vaai muamua lava i ai i le talafaasolopito o le lalolagi. E foliga mai atonu o le tofotofoga aupito sili ona ogaoga lea o soo se tofotofoga na tatou mauaina i le talafaasolopito o lenei Ekalesia.”8
O nei aoaoga mai perofeta o ona po nei ma anamua e uiga i tofotofoga ma luitau o aso e gata ai ua faamaoni ma aloaia. Ae e le tatau ona lotovaivai, ma e le tatau ona tatou fefefe. Mo i latou e i ai mata e vaai ma taliga e faalogo, o le lapataiga faaleagaga e taitai atu ai i le faateleina o le mataalia. O loo ta feola i “se aso o le lapataiga” (MF&F 63:58). Ma talu ai ua uma ona ma o le a lapataiina, e tatau ona tatou, e pei ona apoapoai mai le Aposetolo o Paulo, ia “mataala… ma matua tausisi” (Efeso 6:18). Ma pe a tatou mataala ma saunia, e moni e le tatau lava ona tatou matatau (tagai MF&F 38:30).
O Ai o i ai i le Itu a le Alii? O le taimi lenei e faaalia ai ua i ai ni o tatou mafaufau ma loto ia e talia ma o le a tali atu i nei lapataiga musuia. O le taimi lenei e faaali atu ai ua tatou mataala ma sauniuni e tetee atu i tofotofoga o aso e gata ai o le tamaoaiga ma le faamaualuga, o oa ma le le popole, ma le maaa o loto ma le faagaloina o le Alii lo tatou Atua. O le taimi lenei e faaali atu ai o le a tatou faamaoni i taimi uma i soo se mea ua faatuatuaina i tatou e lo tatou Tama Faalelagi ma Lona Alo Pele—ma o le a tatou tausia poloaiga a le Atua ma savavali ma le amio sao i Ona luma (tagai i le Alema 53:20–21).
O Le Lesona o le Faamamaluina, Aoaoina mai, ma le Mulimuli i le Usoga
Sa faamanuiaina le Au Paia faamaoni i le autau a le Alii i le faamamaluina, e aoao mai ai, ma le mulimuli i le Usoga. Ma ua matua faamanuiaina ai i tatou i lenei vaitaimi i faataitaiga ma le tuuto o tagata faamaoni o le Tolauapiga a Siona.
I le tali atu i le fautuaga mai ia Pale P. Palate, na malaga atu ai Ulifoti Uitilafi i Katelani, Ohaio, ia Aperila 1834 e auai i le Tolauapiga a Siona. O le faamatalaga a Uso Uilifoti i lana feiloaiga muamua ma le Perofeta o Iosefa Samita sa aoga tele mo i tatou uma.
“O i mo le uluai taimi i lo’u olaga sa ou feiloai ai ma faia se faatalanoaga ma lo tatou Perofeta pele o Iosefa Samita, o le tamalii lea na filifilia e le Atua e aumaia Ana faaaliga i nei aso e gata ai. O lo’u feiloaiga muamua sa le o se tulaga e faamalie ai manatu ua uma ona i ai o mafaufauga faalelalolagi e faatatau i le tulaga e tatau ona i ai se perofeta, ma le auala e tatau ona ia faaali mai ai. Atonu sa faateia ai le faatuatua o nisi tagata. Sa ou mauaina o ia ma lona uso o Ailama o loo tafanaina se faailoga ma se pea fana. Ina ua taofi le la fanafana, sa faafeiloai atu a’u ia Uso Iosefa, ma sa ia faatalofa mai ia te a’u ma le naunautai. Sa ia valaauliaina a’u e fai lona fale ma o’u fale ao ou i ai i Katelani. O lenei valaaulia sa ou taliaina ma le naunautai tele, ma sa matua faagaeetiaina ma faamanuiaina lo’u nofo ai faatasi ma ia.”9
Sa ou iloa le taua aua o Uso Uilifoti, lea sa nofo ai i le maota o le Perofeta mo sina taimi na mautinoa lava lona mauaina o se avanoa ofoofogia tele e matauina ai o ia i faagasologa masani o le olaga, na faamanuiaina i mata e vaai atu ai i tua atu o “manatu ua uma ona i ai o mafaufauga faalelalolagi e faatatau i le tulaga e tatau ona i ai le perofeta, ma le auala e tatau ona ia faaali mai ai. O ia ituaiga o manatu na faapuaoaina le vaaiga a le toatele i le lalolagi i lenei vaitaimi, i totonu ma fafo atu o le Ekalesia toefuataiina a le Alii.
O se taunuuga o lo’u valaauga i le 2004 e auauna atu i le Korama a Aposetolo e Toasefululua, ua ia te a’u se vaaiga patino mautinoa e faatatau i uiga o le faamamalu, ia aoao mai ai, ma ia mulimuli i le Usoga. Ua ou vaaia nei i aso taitasi ia uiga faaletagata lava ia, vaega eseese e filifili ai, ma uiga malualii o taitai o lenei Ekalesia. O nisi tagata e avea ni le atoatoa ma vaivaiga faaletagata o le Usoga ma ni popolega ma faaitiitia ai lo latou faatuatua. Mo au, o na vaivaiga e faamalosia ai lou faatuatua. O le mamanu faaalia a le Alii o le puleaina o Lana Ekalesia ua sauniaina ma faaitiitia ai le aafiaga o vaivaiga faaletagata. E matuai ofoofogia lava ia te au le vaai atu i le faataunuuina e le Alii o Lona finagalo e ala mai i Ana auauna e ui i sese ma vaivaiga a Ana taitai filifilia. O nei tamalii latou te faapea mai lava ua latou atoatoa ma latou te le atoatoa; ae ui i lea, ua mautinoa lava ua valaauina i latou e le Atua.
O se faitaulaga sili ina ua ia savali atu i Misuri ma le autau a le Alii, na tautino mulimuli ane e Uilifoti Uitilafi ao auauna atu o se tasi o le Korama a Aposetolo e Toasefululua: “Na matou maua se aafiaga semanu matou te le mauaina i se isi lava auala. Na matou maua le avanoa o le … malaga i ni maila se tele ma [le perofeta], ma vaai i galuega a le Agaga o le Atua ia te ia, ma faaaliga a Iesu Keriso ia te ia ma le faataunuuina o na faaaliga. … Pe ana ou le alu i le Tolauapiga a Siona semanu ou te le i ai iinei i le taimi nei.”10
I le Aso Sa mulimuli ia Aperila 1834, sa valaaulia ai e Iosefa Samita se vaega o taitai o le Ekalesia e saunoa atu i volenitia a le Tolauapiga a Siona na faapotopoto i se faleaoga. Ina ua uma ona faaiu e le usoga a latou savali, na tulai le perofeta ma tau atu ua faagaeetiaina o ia e ala i le faatonuga. Ona Ia vavalo atu lea:
“Ou te fia fai atu ia te outou i luma o le Alii, e tou te lei iloaina nisi mea faaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. Tou te lei malamalama i ai. … Ua na o sina aofaiga toaitiiti lava o le Perisitua o loo outou vaai atu i ai i le po nei, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.”11
O alii e pei o Poliga Iaga, Heber C. Kimball, Orson Pratt ma Uilifoti Uitilafi na faalogo ma aoao le tele o mea mai le Perofeta i lena po—ma na fesoasoani tausaga mulimuli ane e faataunuu lana folafolaga faaperota. O ni avanoa matagofie ia na maua e nei tamalii e faamamalu ai, aoao mai ai, ma mulimuli ai i le Perofeta.
E taua mo i tatou uma ona manatua e mafai ona tatou aoao uma mai aoaoga a le Usoga ma mai faataitaiga o o latou olaga. O le faaaliga mataina o le tuputupu ae i le lumanai o le Ekalesia lea na faamatalaina e le Perofeta o Iosefa Samita, faamolemole ia mafaufau nei i le mana o lana faataitaiga patino i le faatinoga o faiga masani ma faamoe tagata ae o ni galuega e tatau ai. Na faamatalaina e Siaosi A. Samita i lana api talaaga le tali mai a le Perofeta i luitau o aso taitasi o le savaliga i Misuri.
“O le Perofeta o Iosefa sa tauaveina se vaega atoa o le tiga o le malaga atoa. I le faaopoopo ai i le vaaia ua saunia mea mo le Tolauapiga ma le pulefaamalumalu ai, sa ia savali i le tele o le taimi ma sa afaina ona aao i le mafoe o le pa’u, vae tiga ma le totoulia. … Ae i le taimi o le malaga atoa sa ia le tomumu lava pe tuuina mai se faitioga, ao faitio mai ai pea alii o le Tolauapiga ia te ia ona o le tiga o o latou tamaivae, o le mafoe o pa’u o vae, umi o le savaliga, utiuti o meaai, leaga o le tulaga o falaoa, leaga o falaoa saito, manogi leaga o pata, malosi o le hani, o fasi puaa ma sisi ua i ai ilo, ma isi mea faapena, e oo lava i se taifau e ou atu i nisi o alii e tomumumu lava ia Iosefa. Afai latou te tolauapi ae leaga vai, e toetoe lava ona mafua ai se faatuiesega, ae peitai o i matou o le Tolauapiga a Siona, ma o le toatele o i matou e le faia ni tatalo, leai se magafagafa, faatamala, le faalogo, valea, po o le tiapoloa, ae matou te lei iloa lava ia mea. O Iosefa sa onosaia i matou ma aoao i matou e pei o ni tamaiti.”12
O Iosefa sa avea ma se faataitaiga malosi o le mataupu faavae na aoao mai e Alema: “Ona sa lē sili atu le lelei o lē sa talai atu nai lo lē sa faalogologo mai ia te ia, pe sa sili atu foi le lelei o lē na aoao atu, i lē na aoaoina; … ma sa latou galulue uma, o tagata taitoatasi uma e tusa ma lona lava malosi” (Alema 1:26).
Talu mai lo’u valaauga o se Pulega Aoao, sa ou taumafai e faamamalu ma aoao e pei ona feagai ai nisi o la matou Usoga ma aafiaga o le matua po o manaoga faifaipea o toatuga faaletino ma ni tiga faifaipea. E le mafai ma o le a e le iloaina lava ia mafatiaga e le faalauaiteleina ma le le magagana o nisi o nei tamalii o latou soifua ai ao latou auauna atu i nofoaga faitele ma o latou loto, manatu, mafaufau, ma le malosi atoa. O le auauna atu ma le vaavaai atu ia Peresitene Gordon B. Hinckley (1910–2008), Peresitene James E. Faust (1920–2007), Elder Joseph B. Wirthlin (1917–2008), Peresitene Boyd K. Packer (1924–2015), Elder L. Tom Perry (1922–2015), Elder Richard G. Scott (1928–2015), ma isi a’u uo faaaposetolo ua faamalosia ai a’u e folafola atu ma le manino ma le mausali o le Usoga o loo matou galulue o ni fitafita—fitafita faaleagaga e tamalii ma tautaua—i se tulaga sili ona moni ma sili ona matagofie o lena upu! O lo latou onosai, faapalepale, ma le lototoa ua latou mafai ai ona “fetaomi atu i luma ma le tumau ia Keriso” (2 Nifae 31:20) e taua lena mo lo tatou faataitaiga.
Ua lapatai mai Peresitene Lee e uiga i se suega faaopoopo o le tuufaatasi ua faateleina le tuputupu ae lautele i lenei augatupulaga: “Ua tatou agai atu nei i se isi tofotofoga—o se vaitaimi atonu tatou te tauina o le atamai. O se taimi lenei ua toatele ai tagata atamamai o e le fia faalogo i perofeta lotomaualalo a le Alii. … E nai lo o lena o se tofotofoga tuga.”13
O le tofotofoga o le atamai o le soa lea i le tofotofoga o le tamaoaiga ma le le popole. E taua tele mo i tatou taitoatasi le faamamalu, aoao mai, ma mulimuli i le Usoga.
“O Ai o i ai i le Itu a le Alii?” O le taimi lenei e faaali atu ai e ala i le faalogo ma usitai i le fautuaga a aposetolo ma perofeta soifua ua valaauina a le Atua i nei aso e gata ai ina ia vaaia ma taitaia Lana galuega i luga o le fogaeleele. O le taimi lenei e faaali atu ai tatou te talitonu “e le mavae atu lava upu [a le Atua], ae o le a faataunuuina uma lava, pe i lo’u lava leo po o i le leo o a’u auauna, ua tutusa lava” (MF&F 1:38). O le taimi lenei e faaali ai. O le taimi lava lenei!
O La Tatou Lava Tolauapiga a Siona
I nisi taimi i o tatou olaga taitoatasi, o le a valaauliaina i tatou e savalia la tatou lava Tolauapiga a Siona. O le a eseese taimi o valaaulia, ma atonu o faafitauli patino tatou te feagai ai i le malaga o le a eseese. Ae o la tatou tali atu faifaipea ma le mausali i lenei valaau mautinoa o le a iu ina saunia ai le tali i le fesili “O Ai o i ai i le Itu a le Alii?”
O le taimi e faaali atu ai o le taimi lenei, i le asō, taeao, ma le faavavau. Ou te faamoemoe o le a tatou manatua pea ia lesona e fesootai i le tofotofoina, iloiloina, ma le saunia ma le faamamaluina, aoao mai ai, ma mulimuli i le Usoga.