O Le Faatinoina o le Vaega Aupito Taua
E alala le tusitala i Uosigitone, ISA.
Sa faatoa ou mauaina le matafaioi aupito silisili o lo’u olaga. Sa ou fiafia lava—ao faatalitali le taunuu mai o le tusiga.
Ata pue mai le Getty Images
O tala faatino tuusa’o sa avea ma a’u faanaunauga! I le avea ai ma se talavou matua, sa ou auai atu ma le fiafia i le faatinoga o tala ma pesepesega i luga o le tulaga. Sa faamanuiaina a’u i taleni ma faamoemoe e atiae se matata o le faatinoina o tala faapolofesa. Sa ou manumalo i le matafaioi aupito sili ona faigata sa mafai ona ou maua ma amio lelei i taimi uma ina ia maua le faaaloalogia a o’u uso a faigaluega.
Sa ou fiafia lava ina ua tau mai ia te a’u e le faatonu e sili ona taua i la matou eria o le a ia faatautaia ni faataitaiga mo se faaaliga malie puupuu tau pese e aofia ai le siva ma sa ia manao ou te faataitai ai. O le a faia le faafiafiaga i le nofoaga aupito sili ona lauiloa, ma sa foliga mai ua leva ona i ai a’u i le mafaufau a la’u uo faatonusili mo le vaega taua.
Sa lei maua le tusiga mo le faitauina a o lei oo i le taimi o le faataitaiga, ae o le faafiafiaga malie puupuu tau pese e aofia ai le siva sa faatatau i se tala na saunia e se filosofia o le seneturi lona 18, lea sa ou faitau i ai. Sa amata foi ona ou masani i musika o le faafiafiaga, lea sa matagofie tele ma faafiafiaina.
Sa lelei le faataitaiga, ma e lei umi ae logoina mai a’u o le vaega taua—le vaega sili ona taua—o a’u e anaina! Ou te talitonu o lenei tofiga po o vaega o se avanoa maoae.
Sa ou lagona le fiafia tele—seia oo ina taunuu mai le tusiga. A o o’u faitau i ai, sa vave ona mou atu lo’u fiafia. E ui na lelei le tala ma musika, sa le migao le tusiga ma sa i ai ni faatonuga le talafeagai o le tulaga ma taufaaosooso. Sa ou iloaina e le tatau ona ou i ai i lenei tala. Sa avea o se faanoanoaga tele.
Na faafuasei lava ona i ai sau faafitauli. O uiga tatau o le fale faafiafia e faapea a maea ona taliaina se tofiga, e le mafai ona faamavae se tagata faatino aua e le faatagaina e taimi faatulagaina o le tala se suiga o le au faatino. O le faamavae i le taimi nei o le a mafaufauina o se mea le atamai tele. Sa ou fefe i le aveesea o le faatuatuaga o le vaega o le fale faafiafia, faatiga i le faatonu, ma e oo lava i le aveesea o le avanoa e faaauau ai e faatino i se isi nofoaga.
E moni, sa faaosoosoina a’u e faia se alofaga! Sa oso ae i lo’u mafaufau se leo o faapea mai, “E le mafai ona e faamavae nei. E le leaga tele le tusiga. O le a toe faaleleia e mea lelei vaega o mea leaga i le faafiafiaga.” Peitai sa uunaia pea e le Agaga Paia lo’u loto—ma le mausali, ma le onosai, na uunaia a’u ma le malosi e tatau ona ou aluese mai le faafiafiaga.
Sa ou iloaina le mea e tatau ona ou faia. Ma le gatete, sa ou pikia i luga le telefoni ma vili le faatonu.
“Talofa, lau susuga,” o lau tala lea ina ua tali mai. “O Annie lea.”
“Annie! Matuai ou fiafia lava i le faafiafiaga. Na e maua le tusiga?”
“Ioe, sa ou mauaina, ma sa ou … sa ou …”
Sa amata ona ou tagi. Talanoa e uiga i le le atamai!
E ui i lea, i le va o masusu, sa mafai ona ou faamatala atu i le faatonu le mafuaaga e le mafai ai ona ou i ai i lana faafiafiaga. Ma sa ou faatali mo le taunuuga sili ona leaga o le a tupu.
Sa ata le alii alofa. Sa ia faaaloalo i la’u filifiliga. I le taimi muamua sa taumafai o ia e tauanau a’u ia i ai pea i le faafiafiaga, ae sa ia taliaina. Sa ia fai mai na te alofa pea ia te a’u e tusa lava pe ou te le manao ia i ai i lana faafiafiaga. Ma sa na o le fai mai ia te a’u e avatu le tusiga ia te ia i le taimi lava lena ia mafai ai ona tuuina atu i se isi tagata. Sa ou tuuina i lalo le telefoni, matamuli i la’u tagi ae na faafetai mo tali agaalofa, ma le malamalama a le faatonu.
Sa ou soloia o’u loimata ona uu mai lea o le tusiga ma oso i totonu o la’u taavale. Ina ua ola le afi, sa amata foi ona ola le leitio. Sa toeseti i le vaega o musika tuai faalelotoifale, ma i lou ofo tele, o le fati sa taina o le amataga o le faafiafiaga lava lea e tasi. Ou te lei faalogo lava o taina mai i le leitio.
Sa ou lagonaina e pei sa taina mai e le Tama Faalelagi lenei musika mo a’’u. Sa Ia finagalo ia ou iloa e alofa o Ia ia te a’u ma sa Ia faamaonia la’u filifiliga. O le musika sa tataina o se tasi lea o alofa mutimutivale o le Atua. E ala mai i lea musika, sa ou lagona le mafanafana o Lona alofa.
Sa faaauau pea ona ou suesue i tala faatino i le iunivesite. E sili atu ma le faatasi ona ou mauaina a’u lava i tulaga faapena. E i ai taimi e tatau ai ona o ese mai nisi o gaoioiga faatino masani ona o le le talafeagai o anotusi. O nei tulaga sa lei faigofie lava pe matafogie, ae sa mafai lava ona ou taulimaina ma le lelei ma e aunoa ma ni loimata i latou. Atonu o lo’u aafiaga muamua o se tapenaga mo nei taimi. Atonu na fesoasoani ia te a’u ia malamalama lelei ai po o ai a’u ma le mea na ou matua manao lava ia avea ai a’u.
Sa tusia e William Shakespeare:
O le lalolagi atoa o se fale fai konaseti,
Ma o tagata e faia vaega o le tala:
E i ai o latou auala i fafo ma o latou auala e ulufale mai ai;
Ma e tele vaega e faia e le tagata e toatasi i lana taimi.1
Ua ou aoaoina o loo i ai se vaega e tasi e faatino e sili atu le taua nai lo soo se isi lava mea. O le avea lea o se soo moni o Iesu Keriso. O le faafiafiaina i le patipatia e o tatou uo e mafai ona fiafia ai ma faamalieina, ae o le faamaoniga a le Atua e sili ona taua. E oo mai a tatou faatinoga sili a o tatou aoao e mulimuli i le Matai.