O Le Atotupe Faamaneta
E alala le tusitala i Nevada, ISA.
“Fai mea tonu, ma fiafia. O le a ou fai pea mea sa’o” (Liahona Iuni 1995, 12–13).
“O oe!” O le tala lea a Mandy. Sa ia eu ai lona tuagane laitiiti ona aau ese lea. Sa nonofo le aiga o Mandy i se faletalimalo seia oo ina mafai ona latou masii atu i la latou fale fou. Sa manaia le ‘aina o apa meaai na faavevelaina i le ogaumu faavevela meaai mo le taumafataga o le aoauli. Ma sa mafai ona latou auau i le vaitaele a le faletalimalo e toetoe o aso uma!
Ae sa i ai se vaega e tasi e le lelei tele e uiga i le faletalimalo. O le ofisa a le pule o le faletalimalo sa i lalo tonu o le latou potu, ma sa manatu le pule ua leotetele tele Mandy ma ona uso ma tuagane. “E mafai faapefea ona ou lisiina atu potu pe a foliga mai e pei o ni lafu elefane o loo i luga ae o lo’u ulu?” na ia fesili ai ia Tama.
Ina ua maea le taumafataga o le aoauli, sa oso ifo mai le moega le tuagane o Mandy o Arona i le fola ma se pa’o tele. Sa faamimigi Mandy ma tilotilo atu ia Tina.
“Aua le oso. Savavali filemu, faamolemole,” o le tala lea a Tina.
Ae ua tuai tele. Sa tatagi le telefoni.
“Auoi,” o le mafaufau lea a Mandy.
Sa piki i luga e Tina le telefoni. Sa lagona atu e Mandy lona faatoese atu i le pule.
Sa faanono’u tauau o Tina a o ia tuuina i lalo le telefoni. “Eteuati ma Mandy,” o lana tala lea, “e tatau ona ou faamomoeina Arona ma Emi. E mafai ona lua aveina Kristine ma Tanielu mo se savalivaliga?”
A o amata la latou savaliga i le pakaga taavale o le faletalimalo, sa vaaia e Mandy se mea e laitiiti ma lanu enaena i luga o le eleele.
O se atotupe. Ma sa i ai ni tupe i totonu!
“Eteuati, vaai!” o lana tala lea, a o uuina maualuga i luga le atotupe.
“E tatau ona ta aveina i le taimi lava lenei le atotupe lea i le ofisa a le pule,” o le tala lea a Eteuati.
Sa le lelei lagona o Mandy i lona manava. Aisea e tatau ai ona la aveina i le taimi nei? E le mafai e Tina ma Tama ona toe faafoi i se taimi mulimuli ane?
Ae sa iloa e Mandy le mea sao e fai.
Sa tatala e tamaiti le faitotoa o le ofisa ma savavali ma le fefefe i totonu. Sa foliga faauu le pule. “A, sa ma mauaina le atotupe lenei i le pakaga taavale,” o le tala lea a Mandy. Sa tete lona lima a o ia tuuina atu le atotupe i luga o le fata.
Sa tilotilo ifo se alii sa tu i le fata. “O a’u e anaina,” na ia fai atu ai. Sa tilotilo vave i totonu o le atotupe. “Ma o loo i ai mea uma ii. Faafetai lava, tamaiti!”
Sa tilotilo atu i luga Mandy i le pule. Sa mou ese ona foliga faauu, ma sa foliga fiafia.
Ina ua la tuua le ofisa, sa fesili atu Tanielu, “E maneta le atotupe le la?”
“Aisea e te manatu ai e maneta?” na fesili mai ai Eteuati.
“Aua sa faaliliuina ai se alii maitaita i se tagata fiafia!”
Na lulu le ulu o Eteuati. “E le maneta le atotupe,” o lana tala lea. “Sa fiafia o ia aua sa ta faia le mea sa’o.”
Na i ai se lagona faapitoa o Mandy i totonu. Na te lei iloaina o le filifiliina o le mea sa’o e mafai ona faafiafiaina ai ni tagata.
I ni nai aso mulimuli ane, sa o atu ai Mandy ma Tama e totogi le pili o le vaiaso. Na ataata atu le pule ia Mandy. Sa na o le faatasi ona ia valaau atu talu mai le taimi na la mauaina ai le atotupe, ma tau lava o le faafetai atu ia i latou mo le faamaoni. Na lagona e Mandy e pei ua ia faia se uo fou.
“O le filifilia o le mea sao e faamaneta moni lava,” o le manatu lea a Mandy. Na ia talotalo faatofa atu, ma sa toe talotalo mai le pule. “Ma e moni lava e le maitaita lava o ia.”