O Leo o Le Au Paia o Aso e Gata Ai
Mativa ae Tumu i le Faatuatua
Ata na tusia e Carolyn Vibbert
Ina ua uma ona auauna atu i le misiona a Filipaina Cagayan de Oro, sa ou naunau e mulimuli i fautuaga a perofeta ma aposetolo ina ia faaipoipo i le malumalu. O le toatele o o’u aiga ma uo e le auai i le Ekalesia, e oo lava i nisi o tagata e auai i le Ekalesia, sa faapea mai e tatau ona ou maua muamua se faailoga pe maua se galuega maoae a o lei mafaufau e uiga i le faaipoipoga. Sa leai uma ni na mea e lua ina ua ou faamau.
Sa ou popole, ae sa ou manatua se tala e uiga ia Peresitene Gordon B. Hinckley (1910–2008) ina ua ia maua se valaauga o le misiona i Egelani. Na ia sauni e tuua i le taimi o faafitauli tau le tamaoaiga ma popolega lea sa faapopoleina ai o ia. A o lei aluese atu o ia, sa tuu atu e lona tama ia te ia se kata na i ai ni upu se iva na tusia ai: “Aua e te matau, tau lava ina e faatuatua” (Mareko 5:36). Sa ou manatuaina foi ia upu o la’u epikopo: “Ia faatuatua. O le a saunia e le Atua.” O nei upu na tuuina mai ia te a’u le lototele ma le malosi e agai ai i luma.
E ui ina mativa, sa ou faaipoipo atu i lau manamea lalelei i le Malumalu o Manila Filipaina. E lei leva ae amata ona ou faigaluega mo se kamupani lea na manaomia ai lo’u faigaluega i Aso Sa. Sa ou manao e tausia le aso Sapati, o lea sa na o se taimi puupuu na ou i ai i lenei galuega. Sa mafaufau le toatele pe aisea na ou tuua ai la’u galuega, ae sa ou tulimatai atu pea i luma, ma toe fai ifo ia te a’u lava ia ia upu “Ia faatuatua. O le a saunia e le Atua.”
Sa amata ona ou aveina se sipi ma galue o se sui o fefaatauaiga e saunia ai mea taua matou te manaomia ma saunia mo le fanau mai o la ma pepe muamua. Sa matauina e lo’u toalua lo’u vaivai i le taumafai e tausi lo ma aiga. Sa fai mai o ia ia te a’u e tatau ona ou toe alu i le aoga, ae sa ou mafaufau o le a faigata ona faigaluega, auauna atu i le Ekalesia, ma avea ma se tagata aoga.
Sa sa’o lava a’u; sa faigata. Ae sa ma faia le mea sili ina ia tausia poloaiga. Sa masani ona le lava a ma tupe, ae o le fesoasoani mai o Tupe Faaagaaga mo Aoaoga a le Ekalesia, sa mafai ona ou faamaeaina la’u aoga a o lei fanau mai la ma tama lona lua. Sa ou maua se galuega e faiaoga i le aoga maualuga, ma na iu ina avea ma se taitai faamaopoopo o le seminare ma le inisitituti.
O le mulimuli ai i le fautuaga a le perofeta ma isi taitai o le Ekalesia na fesoasoani ou te iloa ai o le faaipoipoga e tuuina mai ai ni avanoa silisili mo le tuputupu ae faaleagaga ma le tulaga faamatua. Ua faamanuiaina a’u ona o la’u faaipoipoga, ma le talalelei.
E le tatau ona tatou fefefe, e oo lava i tulaga aupito sili ona faigata. Tau lava o lo tatou faia o le mea silisili ma manatua upu nei: “Ia faatuatua. O le a saunia e le Atua.”