O Lau Lava Liahona

Saunia e Richard M. Romney

Mekasini a le Ekalesia

Ai se manaia pe a maua sau GPS faaleagaga e taialaina oe? I lou faamanuiaga faapeteriaka, e mafai ona e maua.

Ata

holding a compass

Ata na tusia e Jeff Harvey

O nisi taimi e mafai ona foliga faigata ai le olaga. E tele naua mea tetele e agai mai ia te oe i nai tausaga e sosoo ai: saunia mo le malumalu, faasoaina atu o le talalelei, filifiliina o se aoga ma se matata. Ma ua na o oe o se talavou! Faamata e manaia pe ana, faapei o Liae, e mafai ona e mauaina se Liahona i fafo atu o lou faitotoa, o se meafaigaluega ua mautinoa lava e taitaiina oe i le ala pe afai e na o lou gauai atu i ai?

O le mea moni, ua leva ona i ai le tele o punavai o le taitaiga i lou olaga: tatalo, tusitusiga paia, fautuaga mai matua ma taitai, uunaiga mai le Agaga Paia, konafesi aoao, ma faaauau ai pea le lisi. Ae o le isi punavai lea e faaopoopo i lau lisi—o se Liahona patino e taua o lou faamanuiaga faapeteriaka. O faaaliga faaletagata lava ia mo oe, e faatatau ia te oe, mai lou Tama Faalelagi, na ia silafiaina oe talu mai lena taimi, ia, e faavavau.

Mafaufau i lou faamanuiaga faapeteriaka o se ituaiga o GPS faaleagaga, ma o nisi. E le gata ina mafai ai ona e iloa po o ai oe ma le mea e te i ai; e mafai foi ona fesoasoani e te malamalama ai pe aisea e te i ai iinei ma o fea e tatau ona e agai atu i ai. Ae ia manatua, o le taitaiga mai lou faamanuiaga faapeteriaka e manaomia ai le faaaogaina o mataupu faavae lava e tasi ia na mafai ai ona galue le Liahona a Liae: gauai ma le filiga (tagai i le 1 Nifae 16:28; Mosaea 1:16).

Gauai ma le Filiga

O le a le gauai ma le filiga? O le gauai o lona uiga e le gata i le faalogo atu i upu o fai mai ae o le usitai atu foi i ai. O se upu e fesootai i ai o le faalogo mai ia, o lona uiga ia faalogo ma usitai. O lea la ina ia avea lou faamanuiaga faapeteriaka ma se Liahona i lou olaga, e le tatau le na o le faitau i ai, ae e tatau foi ona e mulimuli i ai.

“Ua aoao mai e mau ua faamaumauina i tisipenisione uma lava, tatou te faaali atu lo tatou alolofa i le Atua pe a tatou faalogo atu i Ana poloaiga ma usiusitai i ai,” na saunoa ai Peresitene Russell M. Nelson, o le Peresitene o le Korama a Aposetolo e Toasefululua. “O nei faatinoga e vavalalata le sootaga. O le mea moni, e faaaoga i le gagana Eperu o le Feagaiga Tuai i le tele o taimi le faaupuga lava lea e tasi mo le faalogo atu (i le Alii) ma usiusitai (i Lana afioga).”¹

Ata

holding a patriarchal blessing

O le filiga o se tasi lea o ki i le aoaoina mai i lou faamanuiaga faapeteriaka. O le filiga o lona uiga o le magafagafa, gauai atu ma le faifai pea. O lona uiga o le taumafaiga naunautai ma le lemafaatoilaloina. “O le aoaoina lea o le mea ua faamoemoeina mai e le Alii ia te outou, fai se fuafuaga e fai ai, [ma] galue i lau fuafuaga,” o le saunoaga lea a Peresitene Henry B. Eyring, Fesoasoani Muamua i le Au Peresitene Sili.²

Afai e te manao e fesoasoani lou faamanuiaga faapeteriaka ia te oe, suesue i ai ma se taumafaiga naunautai ma le malosi; fai ni fuafuaga ia ola ai; ma faatino na fuafuaga.

O Se Faataitaiga e Mulimuli I Ai

O Alema le itiiti, i le fautuaina o lona atalii o Helamana, na faapea atu ai o le Liahona o se “ituaiga”, po o se faataitaiga, mo i tatou e mulimuli i ai i o tatou lava olaga. I le Alema 37:38–45 na faapea mai a ia:

Sa saunia e le Alii e faaali atu, e pei o se tapasa, po o le fea le ala e malaga ai.
Sa galue e tusa ai ma le faatuatua i le Atua, lea na faatagaina ai “vavega na faia e ala i le mana o le Atua mai lea aso i lea aso.”
E faaaoga ia “mea faatauvaa” e faataunuu ai le “galuega ofoofogia.”
Afai ua galo ia Liae ma lona aiga e faaaoga le faatuatua ma le filiga, ona “taofia [lea o] galuega ofoofogia” ma “latou te le alualu i luma i la latou malaga.”
Ina ua latou tosina ese, sa latou le malaga i le ala sao.
E faigofie lava le faalogo i le afioga a Keriso, lea e faasino i se ala sao.

O nei lava aoaoga faavae e tumau faamaoni mo lou faamanuiaga faapeteriaka. “Ua uma ona saunia o le ala, ma afai tatou te tepa atu e mafai ona tatou ola e faavavau” (Alema 37:46).

Vaaiga Faapeteriaka

Ata

checkpoints on the road

Sa matou talosagaina ni peteriaka se toafa e tali i fesili e uiga i faamanuiaga faapeteriaka. O nisi nei o a latou tali.

Aisea e taua ai le mauaina o se faamanuiaga faapeteriaka?

“A o tatou auai atu i fonotaga, vasega, ma le seminare, ua aoaoina i tatou i aoaoga faavae, mataupu faavae, ma mea ua faamoemoeina e tutusa i tagata uma o le Ekalesia. Ae a tatou maua se faamanuiaga faapeteriaka, e le tutusa i tagata uma—e patino lava i se tagata e toatasi. E le faatatau i le mea e tatau ona tatou faia ae i le mea e tatau ona e faia, faamanuiaina i uiga po o meaalofa e paia i le amataga. O se faamanuiaga faapeteriaka o se faamaoniga mautu ua ia te oe se sootaga tulaga ese faaletagata lava ia ma se Tama Faalelagi o le e alofa ia te oe ma finagalo ina ia e toe foi atu i Lona afioaga.”

—Clayne A. Steed, Siteki a Raymond Alberta, Kanata

E leai se afaina o le faasoa atu o la’u faamanuiaga ma isi pe faatusatusa lo’u faamanuiaga ia i latou?

“O faamanuiaga faapeteriaka e paia ma patino. E mafai ona faasoaina atu ma ni aiga patino ae e le faasoaina atu ma pe faamatalaina e isi. Atonu e i ai se taimi i lou olaga a’o talanoa i se tasi, o le a oso a’e se manatu po o se fuaitau mai lou faamanuiaga i lou mafaufau. Atonu e talafeagai le faasoaina atu, ae e le o se auala gugutu pe faamaualuga a’e o se savali o loo ofoina atu ai se faamoemoe ma se faamalosiauga.”

—Keith L. Stapleton, Siteki a Cartersville Georgia, USA

Aisea e taua ai le iloa po o le a lou gafa?

“E fesoasoani e te malamalama ai o tala na tusia i le Tusi Paia e le na o tala e uiga i nisi o tagata ma taimi na latou soifua ai. Na avea a latou talafaasolopito ma vaega o le talafaasolopito o tagata uma—o tagata na soifua mai ma o le a soifua pea. O le a tatou malamalama atili i a latou matafaioi ma la tatou matafaioi pe a tatou iloa lo tatou tupuaga. E finagalo le Alii ina ia iloa e Lona nuu po o ai i latou.”

—Vyacheslav V. Protopopov, Siteki a Moscow Rusia

E mafai faapefea ona ou saunia ina ia mauaina?

“Ua saunia e le Faaola le faataitaiga sili o le sauniuniga. Amata i le mea sa Ia aoao mai ia i tatou: muamua, o le tatalo ma le anapogi (tagai i le Mataio 14:23); lona lua, o le suesue i tusitusiga paia e saunia ai i tatou ia maua ma malamalama i faaaliga faaletagata lava ia.”

—Emile E. Bailly, Siteki a Pale Farani

E faapefea ona ou iloa pe afai ua oo i le taimi ou te mauaina ai?

“Sa ou feiloai i se tamaitai talavou talu ai nei. Sa ia faamatalaina le auala sa ia mafaufau ai e uiga i le feiloai ma lona epikopo [e talanoa ai e uiga i lona pepa talosaga mo sana faamanuiaga faapeteriaka] mo sina taimi. Sa ia ta’u atu lona manao i ona matua ma anapogi ma tatalo ina ia iloa ai le taimi ua ia saunia ai. Sa ia tau mai ia te au ina ua amata le ma talanoaga sa fai si ona popole, mafaufau po o ua ia saunia, ae na fai mai talu ai nei lava sa ia lagonaina ai le filemu ao ia mafaufau e uiga i lana feiloaiga ma a’u. Sa ou fai atu ia te ia, ‘O lau tali lena. Na aumaia e le Agaga lena filemu i lou loto.’”

—Keith L. Stapleton, Siteki a Cartersville Georgia, USA

E faapefea ona fesoasoani musumusuga i peteriaka?

“Ou te manatua le taimi muamua sa ou tuuina atu ai se faamanuiaga faapeteriaka. Ioe, sa ou mafaufau loloto, suesue, ma saunia faaleagaga. Sa ou popole, ae ina ua oo mai le taimi, sa faatumulia le potu i le Agaga ma aveeseina soo se fefe po o se tautaofiofia. Na fesoasoani le Agaga ia te a’u ina ia lagonaina upu ia na oo mai i lo’u loto.”

—Vyacheslav V. Protopopov, Siteki a Moscow Rusia