O Le Fautua Maualuga Faamaoni
Sa ou aoaoina se lesona taua e uiga i le “faamaualuga le mea e te tu ai” mai se faitaulaga sili faamaoni i Siamani.
Ia Oketopa 2008, ao o’u faalogologo i le faasalalauga o le sauniga perisitua o le konafesi aoao, na amata ona saunoa Peresitene Dieter F. Uchtdorf, Fesoasoani Lua i le Au Peresitene Sili, e uiga i le auauna atu i le Ekalesia. Sa ia faamatalaina se tala e uiga i le auala na ia taumafai ai ma nisi o le usoga e siiina se piano mamafa. Ina ua le faamanuiaina taumafaiga uma, sa uunaia i latou e se tasi o tamalii ina ia tutu faatasi ma “faamaualuga le mea e te tu ai.”1
Sa faaaauau atu le saunoaga a Peresitene Uchtdorf e uiga i le auauna atu i le Ekalesia i soo se nofoaga lava ua valaauina oe e auauna atu ai. O nisi tagata latou te lagona o le a sili atu la latou auaunaga pe afai ua valaauina i latou e faia se mea e fetaui lelei ma le tele o a latou taleni. Sa ia saunoa mai, “E leai se valaauga faapea e maualalo mo i tatou. O valaauga uma lava e maua ai se avanoa e tautua ai ma tuputupu ae.”2
Ao saunoa mai Peresitene Uchtdorf, sa ou mafaufau i se taimi sa ou feiloai ai i se tagata agamalu o le Ekalesia o le sa naunau ia faamaualuga le mea lea sa ia tu ai.
I le 1985, sa ou tiute o se taitai o le Ami a le IS i se tamai aai i Siamani. Sa ou auauna atu i se misiona i Siamani i le 10 tausaga ua mavae atu. I le taunuu atu ai i le 1983 o se fitafita ma lo’u toalua, o Debra, ma le ma fanau teine talavou e toalua, sa amata ona matou auai i le paranesi a fitafita pe tusa ma le 100 tagata malolosi. Ina ua mavae tausaga e lua, sa matou filifili ina ia faatofu atoa i matou i le aganuu a Siamani ma amata ai ona auai i le Paranesi laitiiti o Bad Kreuznach, lea e toa 12 tagata.
Pe a ma le vaiaso lona lua talu ona amata ona matou auai, sa matou iloaina se alii fou iina. Sa i ai o ia i le ogatotonu o le vaitau o le 40, ma sa matou iloaina o ia o le fautua maualuga ua tofia i la matou paranesi. Na te le’i i ai iina e faatautaia ni pisinisi faalesiteki, tau lava ina asiasi. Sa matou talanoa mo se taimi umi ina ua uma le lotu, ma ina ua matou faatofa, sa ou manatu o le a matou toe vaai ia te ia atonu i le ono masina.
O le vaiaso na sosoo ai, na toe i ai foi iina le fautua maualuga. Na ou iloa sa nofo pe tusa ma se itula le mamao mai i si o matou tamai nuu. I le taimi o le vaega na totoe o lona valaauga o se fautua maualuga, e sau faalua pe faatolu i le masina i la matou paranesi. O ia o se tagata faauo, agamalu, ma faamalosiau. E talatalanoa lava o ia i taimi uma ma tagata taitoatasi o le paranesi. Ma, ma se paranesi laitiiti faapena, e masani lava ona talosagaina o ia e lauga mai le pulelaa. O le faagaeetia ai i lona tuuto, sa ou faaigoaina o ia i lou mafaufau “o le Fautua Maualuga Faamaoni.”
I se tasi Aso Sa sa ia malaga mai ai i sauniga a le paranesi i le taeao ona toe foi mai ai lea i le 6:00 i le afiafi e auai i se papatisoga. I le va, sa auai atu o ia i se isi paranesi. Ou te tautino atu na oo moni mai lava le manatu i lo’u mafaufau, “O le a le mea na ia faia ua le fiafia ai le peresitene o le siteki? O le a se isi mafuaaga ua tofia ai o ia i le paranesi sili ona laitiiti ma maotua i le siteki?” Atonu e le o ia moni lava o se alii atamai, agamalu, ma fiafia i ai tagata e pei ona ou mafaufau ai ia te ia. Atonu na te le fiafia i lana uarota ma faaaoga ai lenei tofiga ia aluese mai ai. Sa le mafai ona ou iloaina, o lea sa na o lo’u taliaina ai.
I ni nai vaiaso talu ona uma lenei papatisoga, sa ou toe foi ai i le fale ina ua mavae le vaeluapo i le taeao o se Aso Sa. Sa ou toleni e latalata i le tuaoi o le va o Siamani Sasae ma Siamani Sisifo, ma sa alu ai le tolu ma le afa itula ou te toe foi ai i le fale. Sa ou matua vaivai lava ina ua ou savali atu i le faitotoa. Na ala lava lo’u toalua, o Debra. Sa ia ta’u mai ia te a’u na valaau atu “le Fautua Maualuga Faamaoni”. Sa ia manao e feiloai ia te a’u. Sa ou fesili atu, “Ao lei faia po o le tuua o le lotu?” Na amata le lotu i le 10:00 i le taeao. Sa ou faamoemoe o le tuua o le lotu ina ia mafai ai ona ou moe seia oo i le 8:30.
“Ao lei faia,” o lana tala lea.
“9:30?”
“Leai. E i ai se isi mea e tatau ona ia alu i ai i pisinisi faalesiteki. E manao o ia lua te feiloai i lona ofisa i Frankfurt. Fai mai o ia e te alu i le Faitotoa 5.”
“O le a le taimi? Sa ou fesili atu ai.
“Ono,” o lana tali mai lea.
O lenei la ua ou le fiafia. O lea ua ta le 12:30 i le vaveao. Ina ia mafai ona ou auai atu i le faatalanoaga i le 6, e tatau ona ou ala i luga i le 4:30. O lona uiga e itiiti ifo ma le fa itula e moe ai. O le a la la’u mea o le a fai? E le o ia te a’u se numera o le telefoni ou te valaau atu ai ia te ia i le taeao e sosoo ai e ta’u i ai ou te le alu atu. Sa togi i lalo o’u ofu i autafa o le moega ma taoto i lalo e aunoa ma le setiina o le uati tatagi. A o ou taoto ai iina, na oo mai ni manatu nei i lo’u mafaufau:
Afai ou te le feiloai i “le Fautua Maualuga Faamaoni,” o le a le mea e tupu? Afai ou te le alu i lona ofisa, ou te mautinoa lava o le a ia faaaogaina lelei lona taimi. O le isi taimi ou te talanoa atu ai ia te ia ma faamatala i ai le mafuaaga na ou le feiloai ai ia te ia, o le a ia tali mai, “Ioe ua e faia le filifiliga sa’o. Ou te le talosaga atu lava e te sau pe ana faapea ou te iloa ua fai lava si tuai o lou taunuu i le fale. E mafai ona matou taulimaina lena tulaga i le taimi nei.” Ma le isi mea, e le o a’u moni lava o se tasi o le paranesi. E moni, sa i ai iina o matou faamaumauga ma sa matou auai i vaiaso taitasi, ae o i matou o ni tagata ese, le lelei le tautala faaSiamani, ma o le a siitia ese i le lima pe ono masina.
Sa toetoe lava a manino lou mafaufau. I ni nai minute lava ma o le a mafai ai ona ou moe. Ona ou manatuaina lea o le igoa na ou tuuina atu ia te ia ma taimi uma na sau ai “le Fautua Maualuga Faamaoni” i le paranesi talu ona matou auai. Na sau o ia i lena papatisoga i le leva o le po o le Aso Sa. Na sau o ia i se gaoioiga a le paranesi i le ogatotonu o le vaiaso. E saunoa soo lava i tagata uma ma faamalosiau atu ma uunaia i latou. E le foliga lava o ia o se tagata e faamasinosino pe le popole. Sa ia faaaloalo i le peresitene o le paranesi ma ana taumafaiga. Afai sa ia le fiafia i le tofia o ia i lenei tamai paranesi, e mautinoa lava na te le’i faaaliaina.
Sa ou tu i luga ma savali atu i le kapoti lavalava lea sa i ai la’u uati tagitagi. Sa ou setiina le tatagi mo le 4:30 i le vaveao. I le filifili ai e feiloai i le “Fautua Maualuga Faamaoni,” ou te lei popole e uiga i se tala o le a ia fai mai po o se manatu pe ana faapea ou te le [alu atu]. Aua o le mea moni lava, masalo ou te le toe vaai pe faalogo foi ia te ia pe a matou siitia ese atu. Sa ou filifili e ala i luga i le itiiti ifo ma le fa itula ma tietie atu i le 50 maila (80 km) i lona ofisa aua sa ou matua faaaloalo ia te ia mo le ituaiga tagata sa ia i ai, “o le Fautua Maualuga Faamaoni.” E faapefea ona ou le mulimuli ia te ia?
Sa aveina atu la’u taavale i le Faitotoa 5 i le 6 i le taeao i lena taeao o le Aso Sa ma faafeiloaia e se leoleo faitotoa ma se fana. Sa ia vaaia le laisene a le American Armed Forces [Vaega Faaaupegaina a Amerika] o la’u taavale. Atonu sa ia faapea ua ou leiloa. Pe ua filifili ea “le Fautua Maualuga Faamaoni” e le sau? E lei silia ma le lua minute mulimuli ane, ae tu lana taavale i autafa o la’u taavale. Sa ia fai mai, “Talofa lava, Don. Ta o i totonu o lo’u ofisa.” Sa tatala e le leoleo faitotoa le pa ma faataga i ma’ua e o i totonu.
Ina ua mavae ni talatalanoaga laiti ma faasino solo a’u i totonu o lona ofisa, sa ia talanoa sa’o loa e uiga i le feiloaiga. Na ia fai mai sa ia valaauina a’u e auauna atu o se fesoasoani i le peresitene o le paranesi. E le o le fesoasoani muamua po o le lua—ua na o le pau lea o le fesoasoani. Ae ou te lei taunuu atu, sa na o le toalua i la’ua na umia le perisitua i le paranesi, ma sa fesuiai i la’ua i ni nai tausaga i le va o le avea ma se peresitene o le paranesi ma le peresitene o le korama a toeaina.
Sa ou taliaina le valaauga ma auauna atu ai seia oo ina ou aluese i le tolu masina mulimuli ane e auai i se aoaoga e lua masina i le Iunaite Setete.
I le taimi o lou toesea, na mama’i lo’u toalua ma lo’u atalii laitiiti. O faafitauli o lona ma’i [lo’u atalii] na aveina atu ai o ia i le falema’i pe a ma le 60 maila (97 km) mai le nofoaga sa ou i ai. I le avea ai ma se ava malosi o le ami, e lei tomumu pe na talosaga mai Debra ia te a’u ou te toe foi atu i Siamani. O le mea moni, ou te lei iloa le tulaga moni o lona gasegase seia oo ina ua uma ona ou taunuu i le fale. Ina ua mavae se tasi o asiasiga i le falemai i le lotoifale, sa aveina o ia e le foma’i i le fale ona sa ia manatu e le o lava lona malosi e alu ai na’o ia. Na ofo atu uma le peresitene o le paranesi ma le peresitene o le Aualofa e fesoasoani, ae sa ia teena ma le faaaloalo. E le gata i faigata o le gagana ma le aganuu, e lei manao Debra e faaopoopo se avega i se tasi.
I se tasi aso na valaau atu ai “le Fautua Maualuga Faamaoni” ia te ia. Na valaauina talu ai nei o ia e avea ma peresitene o le siteki. Sa ia fesili atu ma le faaeteete e uiga i lona soifua maloloina ma sa ia musu e avea le “O lea ou te malosi” ma se tali. Soo se faamautinoaga mai ia Debra sa fetaui ma se fesili malu ae anoa i le tulaga moni o le aiga. Mulimuli ane na ia faamalamalama mai, “Debra, e tatau ona e tuu atu i le paranesi e fesoasoani atu ia te oe. Latou te matua mananao lava e fesoasoani atu, ma o le a aumai faatasi atili ai le paranesi ina ia mafai ona fesoasoani ia te oe.” Sa ia taliaina ma le agaga faafetai la latou fesoasoani.
Ina ua ou foi mai le Iunaite Setete, na matou nonofo i le paranesi mo le isi lua masina a o lei siitia atu i se aai e tele atu.
Na mou atu ou manatuaga o lena taimi i lo’u olaga ao o’u punou atu i luma i lo’u nofoa, ma sa toe tulimataia ai lo’u gauai atu i le siufofoga o Peresitene Uchtdorf ao fofogaina mai i luga o le mea faaleotele leo. Sa matua ootia lava a’u e ala i aafiaga o lana savali. E le pei o isi taimi pe a ou mafaufau ai e uiga i le sootaga i le va o upu a se failauga ma faatinoga patino a le failauga (i pisinisi, i le militeli, ma, ioe, e oo lava i nisi o lauga sa ou faalogo i ai i le lotu), sa leai so’u masalosalo e uiga i le savali a Peresitene Uchtdorf. Sa le na o le tulaga o le faaleoga o upu a Peresitene Uchtdorf sa faamanatu mai ai ia Siamani ma lo’u aafiaga e uiga i le “Fautua Maualuga Faamaoni.” Ae o le mea moni, o Peresitene Uchtdorf o “le Fautua Maualuga Faamaoni.” O le nofoaga faalegaluega lea na ma feiloai ai i le vaveao o le taeao o lena Aso Sa o le Malaevaalele Faavaomalo o Frankfurt, lea sa avea ai o ia ma Pailate Sinia mo le Kamupani Vaalele a le Lufthansa i Siamani.
E mafai ona ou faapea atu ma le faamaoni ou te lei iloaina lava se tagata e sili atu ona lotomaualalo ma sili atu le faamaoni i le faatinoina o mea sa ia talai atu. Sa ou faafetai i le aoaoina o se lesona taua e faatatau i le uiga o le “faamaualuga le mea e te tu ai.”