Auaunaga i le Ekalesia
Auaunaga Toatasi i Sarajevo
E alaala le tusitala i Rhineland-Palatinate, Siamani.
I Aso Sa, sa ou pese, tatalo, ma tuuina atu lauga e au lava. E mafai e isi tagata ona amata ona auai foi i sauniga?
Ata na tusia e Mia Price/Shannon Associates
I le avea ai ma se sui o le militeli i Siamani, sa ou faaaluina le sili atu ma le afa o le 1999 i Sarajevo, le laumua o Bosnia ma Herzegovina. O lou tofiga i le militeli na i ai ni luitau tele ma itula uumi, ae sa ou faaavanoa lava le taimi e auai i ai sauniga i se falelotu laiitiiti e faaaoga e lotu eseese i la matou tolauapiga e toa 750.
Ina ua ou taunuu i le falesa i le aoauli o se tasi o Aso Sa, sa ou iloa ai o loo lokaina ia faitotoa. Sa ou iloa o nisi tagata o le Ekalesia i le tolauapiga ua siitia ese. Sa ou le fiafia ona sa ou tulimatai atu e tapuai ma auai i le faamanatuga. Ae ou te lei sau i Sarajevo, sa ou pisi e auauna atu o se peresitene o le paranesi i Siamani ma sa mafai ai ona aai ma feinu i le faamanatuga e le aunoa.
I ni nai vaiaso mulimuli ane sa tofia ai au e o faatasi ma lau pule i se asiasiga i se vaega a Amerika. I le taimi o le taumafataga o le aoauli, na fesiligia ai e se kapeteni Amerika o le na vaai ia te au o talanoa i isi fitafita pe o au o se tagata o le Ekalesia. Ina ua ou fai atu ia te ia o lea lava, sa ia tuuina atu lou igoa ma faamatalaga i le taitai sinia o le vaega o le Ekalesia iina.
E lei umi ae faafesootai mai au e Brother Fisher. Ina ua maea se faatalanoaga, na ia vaetofia au o se taitai vaega o le Ekalesia i Sarajevo faatasi ma le tofiga e faatulaga se vaega. (O se vaega o se iunite o le Ekalesia i le faatautoga faamiliteli, e faapei o se paranesi.)
Sa amata ona ou faailoa atu taimi o sauniga i luga o puletini ma auina atu valaaulia, ma le faamoemoe e maua nisi o le Au Paia o Aso e Gata Ai i fale o le militeli i Sarajevo. Mo nai vaiaso muamua, e leai se isi na auai mai. O lea la o Aso Sa, sa ou pese ai, tatalo, ma tuuina atu lauga na o au lava. I le mulimuli ai i taiala a le Ekalesia mo taitai ma tagata o le Ekalesia i le militeli, sa mafai ona ou faamanuia ma ai ma inu i le faamanatuga e aunoa ma se isi perisitua. E aumai ia te a’u e lenei mea le olioli tele.
Sa faia lau sauniga na o au lava i le gagana Peretania ina ia faaleleia atili ai ou tomai i le gagana Peretania. O le lauga muamua sa ou faia e faatatau ia Iosefa Samita. E leai se tasi e iloa atu sa i le potu, ae na ou lagonaina le faatasi mai o isi. Sa faamalosia au e le Agaga Paia ma faaalia mai ia te au le taua o le galuega a le Alii e toe amatalia i lenei nofoaga.
I ni nai vaiaso talu mai lau uluai sauniga o le Aso Sa, sa ulufale mai i le falesa se fitafita talavou Amerika. Sa papatisoina o ia i le na o ni nai masina ua te’a. Sa matuai o’u fiafia lava! I le lua vaiaso mulimuli ane, na taunuu atu ai se isi tamaitai. Ona oo mai ai lea o ni uso e toalua. Faatasi ai ma le fesoasoani a le Alii, na amata ona ola le Ekalesia i Sarajevo.
O loo ua i ai nei le paranesi a le Ekalesia i Sarajevo. A o ou mafaufau i lo’u taimi iina, sa ou mafaufau i le mamalu na tuuina mai e le Alii ia te au e auauna ai i se ala faapitoa—e avea o se mea faigaluega itiiti i lana galuega, ma ia iloa ai “o mea iti e tutupu mai ai mea tetele” (MF&F 64:33).