Seia Tatou Toe Feiloai
Ua I Ai Nei Iinei le Perisitua
Saunia e Elder Rober D. Hales
O Le Korama a Aposetolo e Toasefululua
Mai se lauga o le konafesi aoao o Oketopa 1995.
Oka se pogisa o le lalolagi lenei pe a aunoa ma faamanuiaga o le perisitua mo oe ma a’u.
Atapue mai le Getty Images
E mafai ona e vaai faalemafaufau atu i le pogisa ma le gaogao o le olaga faitino e ono i ai pe a leai se perisitua? Pe ana faapea ua le i ai le mana o le perisitua i luga o le fogaeleele, semanu o le a saoloto le fili e fealuai ma nofotupu e le mataofia. O le a leai se meaalofa o le Agaga Paia e taitai ma faamalamalamaina ai i tatou; leai ni perofeta e saunoa mai i le suafa o le Alii; leai ni malumalu e mafai ona tatou osia ai feagaiga paia faavavau; leai se pule e faamanuia pe papatiso ai, e faamalolo pe faamafanafana ai. A aunoa ma le mana o le perisitua, “o le a faama’umauina atoa le lalolagi” (tagai i le MF&F 2:1–3). O le a leai se malamalama, leai se faamoemoe—na o le pogisa. …
… [Ae,] ua aumaia e le perisitua a le Atua le malamalama i fanau [a le Tama Faalelagi] i lenei lalolagi pogisa ma faigata. E ala atu i le mana o le perisitua tatou te maua ai le meaalofa o le Agaga Paia e taitai atu ai i tatou i le upumoni, molimau, ma faaaliga. E avanoa tutusa uma i ai alii, tamaitai, ma tamaiti i lenei meaalofa. …
… Ua toefuataiina le perisitua mamalu o le Atua, faatasi ai ma le atoatoaga o ana faamanuiaga, i le lalolagi i o tatou taimi. O le toefuataiga o le perisitua ma ona faamanuiaga na amata i le 1820, ina ua vaai atu Iosefa Samita, o se perofeta tama talavou, ma talanoa ma le Atua le Tama ma lona Alo, o Iesu Keriso, i se vao paia.
Mulimuli ane, o avefeau faalelagi faaopoopo—o Ioane le Papatiso; Peteru, Iakopo, ma Ioane; Mose, Elaia, ma Elia; ma isi—na aumaia i le Perofeta o Iosefa Samita le mana, pule, ma ki e manaomia mo le faaolataga ma le faaeaga o le tagata. … Na toefuatai mai le Ekalesia a Iesu Keriso i le lalolagi, ua atoatoa faatasi ma le Perisitua Arona ma le Mekisateko o anamua. O lenei, e pei ona osifeagaiga le Atua ma Aperaamo, o le a mafai ona faamanuiaina ia tagata taitoatasi ma aiga uma o i le lalolagi.
Mafaufau i ai, uso e ma tuafafine—ua toefuatai mai le perisitua. Ua i ai nei iinei i le lalolagi. … I lalo o le taitaiga a … perofeta, tagatavaai, ma talifaaaliga, o e umia ki i lenei tisipenisione, ua maua ai e e umia le perisitua i le Ekalesia i lenei vaitaimi le aia tatau talafeagai e galulue ai i le suafa o le Atua. …
… O faamanuiaga matagofie uma e faavavau lea ua faaavanoa e le Atua i alii ma tamaitai ma aiga i luga o lenei fogaeleele e mafai ona tatou maua e ala i le mana o le perisitua.