Fesili & Tali

“Fai mai la’u uo na te le talitonu i le Atua. E mafai faapefea ona ou faasoa atu le talalelei ia te ia?”

E tele ni auala e faasoa atu ai le talalelei ma ia? O lou lava olaga o se tasi o auala sili ona lelei. O oe “o se faaaoao o e ua faatuatua” i au gaioioiga, laei, tautala, ma le tausia o isi (tagai i le 1 Timoteo 4:12). Ia mafaufau i manatu nei:

• Taumafai e fesoasoani i lau uo i le alofa ma le faaaloalo, ae le o ni naunautaiga po o faamoemoega natia.

• Ia faamaoni ma saolele i au mea e fai.

• Faaaloalo i lana filifiliga saoloto.

O le ala e te faasoa atu ai le talalelei ma ia e faalagolago lea i le mafuaaga e le talitonu ai o ia i le Atua. O nisi tagata e le i ola i se olaga faalelotu. O nisi e tatala o latou manatu e talitonu ai, ma o le a latou atiina ae le faatuatua a o latou aoao i le auala e tatalo ma suesue ai i tusitusiga paia. Ma o nisi atonu sa talitonu i le Atua i se taimi ae na feagai o latou olaga ma tofotofoga na faigata ai ona latou talitonu. Taumafai ia malamalama i le tulaga o loo manatu i ai lau uo. Tatalo ina ia iloa pe faapefea ona fesoasoani ia te ia.

E mafai ona e maua se lagona mo ona talitonuga e ala i le talanoa e uiga i mea e musuia ai o ia ma mea e sili ona taua ia te ia. Fausia i luga o ni tulaga e laugatasia ai. Mo se faataitaiga, afai e talitonu o ia o le auauna atu o se manatu lelei, e mafai ona e valaaulia o ia i se galuega fesoasoani a le uarota.

E ui e le o talitonu lau uo i le taimi nei, o ia lava o se tagata lelei. Afai lava o ia o se faatosinaga lelei ia te oe, faaauau pea ona avea ma ana uo. A o e mulimuli i le Agaga, faaauau ona valaaulia o ia i le lotu ma aoao atili ai e uiga i le taua o le Atua i lou olaga aua o le a i ai se aso o le a saunia ai o ia e talitonu.

Tatalo mo Lau Uo

I le taimi o le sauniuniga o la’u misiona, e toatele a’u uo na faapea mai latou te le talitonu i le Atua. Pe a ou faalogo o latou fai mai lenei mea, ou te tatalo mo i latou. Atonu latou te le talitonu i le Atua a o tatou faia se tatalo, ae afai tatou te talitonu moni lava i le Atua, o le a faaalia lo tatou alolofa ia te Ia e ala i isi. O la tatou faataitaiga e fesoasoani i isi ia malamalama ai e faamanuiaina lava i tatou e le Atua, o loo soifua o Ia, ma e alofa o Ia ia i tatou.

Emanuelu L., 18 tausaga, Setete o Mekisiko, Mekisiko

Avea ma se Faataitaiga

A o ou laitiiti, sa uunaia au e na o le pau lava le auala e aoao atu ai le talalelei o le talai atu, ae sa ou sese aua e le mafaitaulia auala e faasoa atu ai le talalelei. Ae ona o le poto masani ua ou iloa ai pe afai o le a na o na avea o oe ma faataitaiga o Keriso i mea uma e te fai, o le a faateia oe i le toatele o tagata e vaai ae ia te oe ma talitonu ia te oe. I le tele o tulaga, o gaoioiga e leotetele moni atu lava nai lo se isi lava upu. Taitai ma aoao atu e ala i faataitaiga.

Ammon W., 18 tausaga, Arisona, USA

Talanoa e uiga i le natura

Afai o lau uo e le talitonu i le Atua, e mafai ona e talanoa e uiga i le natura aua ua molimau mea uma o loo i ai se Atua (tagai i le Alema 30:44). E mafai foi ona e tatalo mo ia ma suesue i tusitusiga paia faatasi ma ia—mo se faataitaiga,Salamo 19:1. Ou te iloa o le a fesoasoani le Agaga Paia ia te ia ina ia maua se molimau i lo tatou Tama Faalelagi.

Sofia K., 17 tausaga, Kinshasa, Democratic Republic of Congo

Amata se Talanoaga o le Talalelei

E mafai ona e faasoa atu le talalelei i le tele o auala. Muamua, tatalo ma anapogi mo i latou ina ia mafai ona tatala o latou loto i le talalelei. O le isi taimi e feiloai ai ia te i latou, faasoa atu autu ma mataupu e taitai atu ai i se talanoaga e uiga i le talalelei. Ia mautinoa e valaaulia i latou i le lotu po o gaoioiga, ma o le mea sili lava, o le faauo atu. O ai na iloa—atonu e i ai se aso o le a papatisoina i latou faatasi ma lo latou aiga.

Valerie K., 14 tausaga, Nevada, USA

Faasoa Atu Lau Molimau

E suia e le talalelei olaga o tagata. O se tasi o auala e mafai ona e faasoa atu i lau uo o le tau atu lea o ou lagona o loo soifua le Atua, mo se faataitaiga, i le vavega na e mauaina, ma ua e aafia ai nei e ala i le mea faigofie o le ala i luga i aso uma. O lau faataitaiga ia te ia o se molimau sili lea o lou fiafia i le iloaina o le alofa o le Atua ma le ola ai i le talalelei.

Victória S., 18 tausaga, Piauí, Pasila

Aisea e Faasoa Atu Ai?

Ia manatua le mafuaaga e te manao ai e talitonu o ia i le Atua. Tatou te le na ona faasoa atu lenei mea i tagata ona tatou te mananao e avea i latou o ni tagata o le Ekalesia. Tatou te faia lena mea ona o i latou o ni uso ma ni tuafafine moni lava. Aisea e te manao ai i lau uo e talitonu i le Atua? Taofi lena fesili i lou mafaufau, tatalo mo le malosi ma le alofa mama, faamaoni, ma pe afai latou te fai mai lava e leai, ia naunautai e faaaloalogia la latou filifiliga saoloto. O loo i ai foi le manatu e le i saunia lava i latou. Ae ou te folafola atu ia te oe pe afai e faamaoni lou manao ia latou iloa e uiga i le Atua, aua o oe o la latou uo, o le a latou faalogo i ai. A mavae lena, o le filifiliga o la latou faitalia lava lea, ma e le mafai ona tatou faamasinoina i latou mo le filifiliga ua latou faia.

Elder Eliot, 20 tausaga, misiona a Iapani Sapporo

Faasusulu Atu Lou Malamalama

Avea ma se faataitaiga ia te ia. Fesoasoani ia te ia e latalata atili i le Atua e ala i ou aafiaga ma molimau. Ia avea o se agelu o loo ia sailia e ala i lou malamalama ma aafiaga. Fesoasoani ia te ia e iloa le alofa o lo tatou Tama Faalelagi mo ia, ae aua nei faamalosia o ia.

Mason E., 16 tausaga, Arisona, USA

O tali ua faamoemoe e mo se fesoasoani ma ni manatu ae e le o se faalauiloaina aloaia o aoaoga faavae o le Ekalesia.

E Faapefea ona Maua se Molimau

Elder Dallin H. Oaks

“E faapefea ona maua e se tagata le mea ua tatou ta’ua o le molimau?

“O le laasaga muamua i le mauaina o soo se ituaiga o malamalama o le matua naunau lava ia iloa. Pe a faapea o le malamalama faaleagaga, o le isi laasaga o le ole atu lea i le Atua i le tatalo ma le faamaoni faamoni. …

“A o tatou naunau e saili, e ao ona tatou manatua o le mauaina o se molimau e le o se mea e faatino e se isi ae o se faagasologa lea e faamoemoe tatou te faia se mea. Sa aoao mai Iesu, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).

Elder Dallin H. Oaks o le Korama a Aposetolo e Toasefululua, “Molimau,” Liahona, Me 2008, 27.

Fesili o Le a Sosoo Ai

“Ou te faatusatusa pea lava pea a’u i isi, ae maise o i latou o e foliga mai o loo ola atoatoa. E faapefea ona ou lagona le talitonuga atili?”

Auina mai lau tali ma, afai e manaomia, o se ata manino lelei a o le’i oo i le aso 15 o Iulai, 2017, i le liahona.lds.org (kiliki i le “Submit an Article”) po o le i-meli i le [e-mail].

Faamolemole ia aofia ai faamatalaga nei: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e i lalo ifo o le 18 ou tausaga, o le a faatagaina tusitusiga a ou matua (e talia foi le i-meli) e lolomiina ai lau tali ma lou ata.

E ono iloiloina tali mo le uumi po o le manino.