Ola Tutoatasi ma le Aoaoina o le Talalelei
Pe a avea i tatou ma tagata aoao ola tutoatasi o le talalelei, ua tatou iloa le auala e fafagaina ai i tatou faaleagaga ma faamalosia ai la tatou sootaga ma le Atua.
Sa matauina e se faiaoga o le aoga faataitai i se tasi taimi lana vasega o tamaiti ao tusi a latou ata. Ao ia savali solo e vaai i ata a tamaiti taitasi, sa ia fesili atu i se tasi o teineitiiti, “O le a le ata o e tusiina?” Sa tali atu le teineitiiti, “O loo o’u tusiina le ata o le Atua.” I lona tei, sa fai atu le faiaoga, “Ae e leai ma se tasi ua iloa pe faapei foliga o le Atua.” E aunoa ma le faatuai, na tali atu le teineitiiti, “O le a latou iloa i sina taimi.”
Pe le o se mea manaia ea le i ai o sea ituaiga o mautinoa? O le mea moni, e finagalo le Tama Faalelagi ia i tatou ina ia mausali lo tatou malamalama ia te Ia. Sa fetalai atu le Alii ia Ieremia e le tatau ona tatou mitamita i lo tatou atamai po o lo tatou malosi po o a tatou oa. Nai lo lena, sa Ia fetalai mai, “a o lē mitamita, ina mitamita ia o ia i lenei mea, ina ua mafaufau o ia, ma ua iloa a’u” (tagai i le Ieremia 9:23–24).
Na aoao mai le Perofeta o Iosefa Samita (1805–44), “O le Atua e na te le faaalia se mea ia Iosefa, ae o mea o le a Ia faailoa atu i le Toasefululua, ma e oo lava i se aupito itiiti o le Au Paia e mafai ona ia iloa mea uma i le vave e na te mafai ai ona talia ia mea, aua o le a oo mai le aso e le manaomia ai e se tasi le faapea atu i lona tuaoi, ia outou iloa le Alii aua e iloa au e i latou uma … e mai le itiiti e oo i le sili.”1
O le mausali o lo tatou malamalama i le Atua e le tupu e aunoa ma se taumafaiga malosi. E mafai ona fesoasoani matua ma faiaoga, ae e tatau ona avea i tatou ma tagata aoao ola tutoatasi o le talalelei. E pei lava ona tatou aoao e fafaga i tatou lava faaletino e lagolago ai o tatou tino, e tatau ona tatou aoao e fafaga i tatou lava faaleagaga e lagolago ai o tatou agaga.
I tausaga ua mavae sa matelaina ai i le fiaaai ia manulele i St. Augustine, Florida, ISA. Sa aoaoina e manulele mo le tele o augatupulaga le faalagolago i ni vaa e fagotaina le ula e fafagaina i latou mai toega mai ia latou upega. Na iu lava ina siitia ese le auvaa e fagota ula mai le eria. Na lei aoaoina e manulele le ala e fagota ai mo i latou lava; latou te le’i aoaoina foi a latou fanau i le ala e fagota ai. O le mea lea, na mafatia ai o le a pēpē nei manulele aulelei e ui sa tele le ‘ia na siomiaina i latou i le vai.2
E le tatau ona tatou avea e faapei o manulele; e le mafai foi ona tatou tuu a tatou fanau e o atu i le olaga o faalagolago ia i tatou, po o nisi, mo lo latou malamalama i le Alii. “E tatau ona faasino tonu atu a tatou taumafaiga,” na saunoa ai Peresitene Marion G. Romney (1897–1988), Fesoasoani Muamua i le Au Peresitene Sili, “ia avea tagata malolosi ma tagata e faalagolago ia te i latou lava.”3 Pe a avea i tatou ma tagata aoao ola tutoatasi o le talalelei, ua tatou iloa le auala e fafagaina ai i tatou faaleagaga ma faamalosia ai la tatou sootaga ma le Atua.
Na aoao mai Peresitene Boyd K. Packer (1924–2015), Peresitene o le Korama a Aposetolo e Toasefululua, “O le ola tutoatasi faaleagaga o le mana fesoasoani lea i le Ekalesia. Afai matou te faoa lena mai ia te outou, e mafai faapefea ona tou maua le faaaliga o loo i ai se perofeta a le Atua? E mafai faapefea ona tou maua tali i tatalo? E mafai faapefea ona e iloa? Afai matou te vave taliina uma a outou fesili ma saunia le tele o auala e foia ai a outou faafitauli uma, atonu o le a matou faavaivaia outou, ae le faamalosia.”4
E ui o loo matou fiafia i le aoaoina ma le mauaina o musumusuga i le lotu, e le mafai ona matou faalagolago atoatoa i lena mea mo lo matou tausiga faaleagaga. Na faamalamalama mai e Peresitene George Albert Smith (1870–1951), “Ou te popole i le avea ai ma tagata o le Ekalesia ua tatou faalagolago tele atu i faalapotopotoga a ausilali, ma i le fautuaga ma le apoapoaiga a i latou e i fafo atu o o tatou lava aiga. Ua uma ona tatou faalogo i le tele o faamanuiaga ua tuuina mai e le Alii ia i tatou i faamaumauga paia sa teuina seia oo mai i lo tatou aso, ma o loo i ai fautuaga ma apoapoaiga a se Tama ua tumu i le atamai. E foliga mai e tele naua o tatou tagata … e le masani lelei i anotusi o nei faamaumauga paia.”5
Ou te fiafia e aoao i le talalelei i le lotu, ae e sili atu lo’u fiafia e uiga i le talalelei pe a ou maua ni malamalamaaga musuia i le taimi o la’u suesuega faaletagata lava ia. E leai se mea e sili atu ona faagaeetia ia te au nai lo le mauaina o se oa itiiti o le upu moni i tusitusiga paia lea e faamalamalamaina lo’u mafaufau ma faatumulia ai au i le Agaga o le Alii.
Aoao i le Auala e Aoao Ai
Ina ua ou foi mai la’u misiona, sa ou iloa e tatau ona ou alu i faeasaite ma faigalotu i le toetoe lava o vaiaso uma e faatumauina ai lo’u tulaga faaleagaga. Na fafagaina a’u e failauga i o latou malamalamaaga o le talalelei, ma na ou talisapaia lagona na ou mauaina mai na malamalamaaga. Sa ou suesue ma aoao atu le talalelei mo le lua tausaga, ae na foliga mai ou te le’i maua ni tomai talafeagai e fafaga ai a’u lava ia i se tulaga fai soo. Sa na o lou faitauina o tusitusiga paia ma ou te le’i suesue moni i ai ma le filiga.
O le suesue i le talalelei e pei lava o le aoaoina e vali. E le o le iloaina o se mea e aunoa ma se faamaoniga po o se tulaga masani mo tagata uma. Tatou te le mafaufau i le tuuina atu o se laupapa e tusi ai ata ma faamoemoe o le a avea faafuasei lena tagata ma se tusiata. O le avea ma se tagata aoao ola tutoatasi o le talalelei e tutusa lava. E le mafai ona tatou faamoemoe ia iloa ni malamalamaaga maoae i se tulaga masani pe afai tatou te le’i aoaoina ni tomai autu mo le suesueina o le talalelei. Na faamalamalama mai e Peresitene Packer o loo “i ai [i tusitusiga paia] le atoatoaga o le talalelei tumau-faavavau, o se faavavau o le malamalama. Ae e tatau ona aoao se tasi e faaaogaina pe o le a faavaivai loto le sailiga.”6
O le tulaga lena sa i ai mo a’u—faavaivai loto—Ina ua ou faatoa taumafai e saili le uiga ma le taitaiga mai a’u suesuega o tusitusiga paia. O lea sa amata ai ona ou iloiloina pe faapefea ona maua ai e failauga lo latou malamalamaaga. Na umi se taimi, ae na i’u lava ina ou iloa le auala na latou aumaia ai faamatalaga patino o aoaoga faavae mai tusitusiga paia; o le auala na latou maua ai aoaoga anoa e uiga i le Faaola mai fuaiupu; le auala na latou faatulagaina ai mataupu faavae e taialaina olaga mai fuaitau faatusipaia; auala na latou faaliliuina ai faatusa; ma le auala na latou faafesootaia ai aoaoga a perofeta ma aposetolo i fuaiupu patino o tusitusiga paia.
Ao o’u faaauauina la’u suesuega o tusitusiga paia ma aoaoga a perofeta ma aposetolo, sa oo ina ou fai atu ni fesili:
-
O le a le mataupu faavae o loo aoaoina i nei fuaiupu, ma o le a se mea ua ou aoaoina e uiga i lena mataupu faavae?
-
O fea ma o anafea na ou vaaia ai o faaaogaina lenei mataupu faavae o le talalelei ma le mataalia?
-
O le a se mea ua ou aoaoina e uiga i le Tama Faalelagi ma Lana fuafuaga mo lo’u fiafia?
-
O le a se mea ua ou aoaoina e uiga ia Iesu Keriso ma Lana Togiola?
-
O le a se mea e finagalo le Alii ou te aoaoina mai lenei mea?
-
O a mafaufauga ma lagona musuia o o’u mauaina ao o’u faitau?
-
O i ai se mea iinei o fesoasoani mai ia te a’u i se luitau o i ai nei i lo’u olaga?
-
O le a se mea ua ou aoaoina o le a fesoasoani ia te a’u e ola ai mai lea aso i lea aso?
Faiaoga Mamana, Faatauanau
Ao suia la’u suesueina o tusitusiga paia, sa faapena foi lo’u aoao atu. Sa amata ona sili atu lo’u naunau e fesoasoani i tagata ia iloa upumoni o le talalelei lea o le a taialaina i latou nai lo lo’u tau atu ia i latou le taua o tusitusiga paia ia te a’u.7 Sa matua faagaeetiaina a’u i le vaai atu i le lagonaina o le fiafia e isi pe a latou iloaina se mea fou. Sa avea, ma o loo avea, ma se tasi o aafiaga aupito faamalieina o lo’u aafiaga faafaiaoga.
Sa ou iloaina foi ina ua ou fesoasoani ia i latou sa ou aoaoina ia faaaogaina pea lava pea ia tomai ma fesili o i luga, sa faatelevave lo latou gafatia ia avea ai ma tagata aoao ola tutoatasi o le talalelei. E lei manaomia lo latou faia o le faagasologa umi lea sa ou oo i ai.
O le aoaoina e muamua mai i le aoao atu, ma o tagata aoao lelei e avea atili ma ni faiaoga musuia faaleagaga. “Aua le saili e talai atu la’u upu,” na fetalai mai ai le Alii, “ae ia muamua saili ia maua la’u upu, ona matala ai lea o lou laulaufaiva; ona oo lea, afai e te manao i ai, o le a e maua lo’u Agaga ma la’u upu, ioe, le mana o le Atua i le faatalitonuina o tagata” (MF&F 11:21). O ai se o le a le manao i lena faamanuiaga matagofie!
Ua faamamafa mai e Elder David A. Bednar o le Korama a Aposetolo e Toasefululua le manaoga tuputupu ae mo i tatou e avea ma tagata aoao ola tutoatasi o le talalelei:
“Ou te manatu ua tatou faamamafaina ma ua tele foi le silafia e uiga i le faiaoga e aoao atu i le Agaga, nai lo le tatou iloa e uiga i se tagata e aoao e ala i le faatuatua. E manino lava, o mataupu faavae ma le faagasologa o le aoao atu ma le aoao mai, e taua i le faaleagaga. Peitai, a o tatou vaavaai atu i le lalolagi o le a tatou ola ai i le lumanai, ua matuai matautia ma fenumiai, ou te talitonu e taua ia i tatou uma lava ona faateleina lo tatou malosi ma le gafatia e saili ai e aoao e ala i le faatuatua. …
“O le mea taua lava, o le matafaioi e aoao e ala i le faatuatua ma faaaoga upumoni faaleagaga, e i luga o i tatou lava ia taitoatasi. O se matafaioi ua matua faateleina lona taua i le lalolagi lea o loo tatou nonofo ai, faapea foi e o le a soifua mai ai. Pe o a, pe faapefea, ma pe o afea foi tatou te aoao ai, e lagolagoina—ae le faalagolago i—se faiaoga, se metotia e faaaoga e aoao atu ai, po o se autu patino po o le faiga o se lesona.”8
Faamanuiaga o le Aoaoina Tutoatasi
Ua faamanuiaina moni lava i tatou e ala i aoaoga musuia a matua ma faiaoga o le Ekalesia, ae atonu o le mea e sili atu ona taua o le aoao e musuia i tatou lava. Pe a avea i tatou ma tagata aoao ola tutoatasi o le talalelei, o le a sili atu le mafai ona tatou valaaulia ia faaaliga faaletagata lava ia. O tagata aoao ola tutoatasi o le talalelei e le manaomia ni mea e faaosofia ai e suesue e le aunoa i tua atu o le iloaina o le isi taimi latou te suesue ai o le a faagaeetiaina i latou nai lo le le fiafia. O tagata aoao ola tutoatasi o le talalelei e sili atu foi ona faaauupegaina ina ia sao mai osofaiga o manatu sese lea ua taliaina masani i lo tatou lalolagi o le seneturi lona 21.
O le mea sili ai o se tasi o folafolaga a le Alii na faatatau tele lava mo tagata aoao ola tutoatasi o le talalelei: “Ai se na te teu faaoloa taua a’u upu, o le a le faaseseina” (Iosefa Samita—Mataio 1:37).
Na folafola mai Peresitene Thomas S. Monson, “Afai e te suesueina ma le filiga tusitusiga paia, o le a faateleina lo’u mana e aloese ai mai faaosoosoga ma maua ai le taitaiga a le Agaga Paia i mea uma e te faia.”9
O tagata aoao ola tutoatasi o le talalelei e lagona le folafolaga a le Faaola:
“Afai e fia inu se tasi, ina sau ia ia te au e inu ai.
“O se faatuatua ia te au, e faapei ona fai mai o le Tusi, E tafe mai o vaitafe mai totonu ia te ia, o le vai ola lava” (Ioane 7:37–38).
O loo tele lava ni mea ina ia ou malamalama i ai, ae o le avea ma se tagata aoao ola tutoatasi o le talalelei o se tasi lea o mea sili ua ou faia. Ua faamanuiaina ai vaega uma o lo’u olaga.