Jean B. Bingham
Palesiteni Lahi ʻo e Fineʻofá
Koeʻuhí kuo ne nofo ʻi ha ngaahi feituʻu lahi ʻi he ʻIunaiteti Siteití, ʻoku fakahoungaʻi ai ʻe Sisitā Jean B. Bingham hono ʻomi ʻe he ongoongoleleí ha ivi tākiekina pau ʻi he lolotonga e ngaahi liliu ʻi he ʻātakaí.
Naʻe fāʻeleʻi ia ʻi he 1952 ʻi Polovo, ʻIutā, USA, kia Robert mo Edith Joy Barrus, pea tupu hake ai mo hono ngaahi tokoua ʻe toko ono mo hono ongo tuongaʻane ʻe toko ua. Naʻe ako ʻi he lautohi puleʻangá ʻi Tekisisi mo Minesota, USA, pea fakaʻosi ʻi he ako māʻolungá ʻi Niu Sēsī. Ko ia pē mo hono ngaahi tokouá mo e ongo tuongaʻané naʻe Siasi ʻi he fānau ako honau ngaahi ʻapiakó, ʻo aʻu ki heʻenau hiki ki Niu Sēsií, ʻo fiefia ke feʻiloaki ai mo ha kiʻi taʻahine honau uooti foʻoú, ʻi heʻene kalasí.
Hili ʻene mali mo Bruce Bingham ʻi he Temipale Polovo ʻIutaá he ʻaho 22 ʻo Tīsema 1972, naʻá na hiki ai ki ʻIlinoisi ke hoko atu ʻene akó.
Naʻe fāʻeleʻi ai ha fānau ʻe toko ua ʻa e ongomātuʻa Bingham, pea ʻokú na lau mo ha niʻihi kehe ne na pusiakiʻi, ko ʻena fānau. Naʻá ne maʻu hono mataʻitohi AA ʻi he moʻui fakafāmilí, pea ʻi he taimi ne hū ai ʻena tamasiʻi siʻisiʻi tahá ki he ako māʻolungá, naʻá ne foki leva ʻo ako ʻo maʻu hono mataʻitohi MA ʻi he faiakó.
Ko e fuofua uiuiʻi o Sisitā Bingham ʻi he Fineʻofá naʻe maʻu ia ʻi he ʻosi pē ha taimi nounou mei hono fāʻeleʻi ʻena ʻuluaki pēpeé. “Naʻe ui au ke u akoʻi e ngaahi lēsoni ako ki he ngaahi faʻeé. Ko ha faingamālie lelei ke te ako mei he sīpinga ʻa e kakai fefine kehé pea mo e tohi lēsoní foki.”
Naʻe lahi e fefonongaʻaki ʻa Sisitā Bingham ʻi he lolotonga ʻene hoko ko e mēmipa ʻo e poate lahi ʻa e Palaimelí pea pehē ki heʻene toe hoko ko e tokoni ʻi he Kau Palesitenisī Lahi ʻo e Palaimelí. Kuó ne mātā e ngaahi faingataʻa mo e ngaahi tāpuaki ʻo e hoko ko ha mēmipa ʻo e Siasí ʻi he ngaahi feituʻu ʻi he funga ʻo e māmaní.
ʻOkú ne fakaʻānaua ke fakatokangaʻi ʻe he kau Fineʻofá ʻa e lelei ʻi he niʻihi kehé. “Ko ha fakatauele ia ke te fakafehoanaki kita mo e niʻihi kehé, he ʻoku ʻikai maʻu ai ha lelei pea ʻoku fehangahangai ia mo e meʻa ʻoku fie maʻu ʻe he Tamai Hēvaní maʻatautolú.” ʻOkú ne pehē ʻoku tokoniʻi ʻe he Fineʻofá ʻa e fefine kotoa pē ke ne fakatupulaki ha mahino pe ko hai ia ʻi he maama taʻengatá. Naʻá ne pehē “Ko e taimi ʻoku fakatefito ai ʻetau moʻuí ʻia Sīsū Kalaisí, ʻoku tau ʻiloʻi moʻoni ai pe ko hai kitautolu.”