ʻEletā John C. Pingree Jr.
Fitungofulu Taki Māʻolunga
Naʻe pehē ʻe ʻEletā John C. Pingree Jr., ʻa ia ne fokotuʻu ko e Fitungofulu Taki Māʻolunga he ʻaho 1 ʻo ʻEpeleli 2017, “Kuo langa ʻeku fakamoʻoní ʻi ha taimi lōloa, fakakongokonga iiki, ʻi he tali ʻo e ngaahi lotú, ongoʻi ʻo e Laumālié ʻi he lolotonga e lau folofolá, fakatomalá, mo e ngāue maʻá e ʻEikí.”
Naʻe fāʻeleʻi ia ʻi he 1966 ʻi Sōleki Siti ʻi ʻIutā, USA, kia Carmen pea mo John C. Pingree Sr., pea ʻokú ne fakamāloʻia e moʻui līʻoa ʻa ʻene ongo mātuʻá ʻi he tokoni ki hono oʻi ʻo ʻene moʻuí.
Naʻe pehē ʻe ʻEletā Pingree, “Naʻe fai ʻe heʻeku tamaí ha tohi kiate au hili e ʻaho ne fāʻeleʻi ai aú.” “Naʻá ne tauhi pē e tohí, pea ʻi he taimi ne u mavahe ai ke ngāue fakafaifekau taimi kakató, naʻá ne meili ange ʻa e tohí kiate au. ʻOku kau ʻi he tohí ha ngaahi peesi ʻo ʻene fakamoʻoní mo e ngaahi lēsoni naʻá ne fie maʻu ke u ako he lolotonga ʻo ʻeku moʻuí. ʻI heʻeku lau iá, naʻe fakamoʻoniʻi ʻe he Laumālié kiate au, ʻoku moʻoni ʻa e meʻa ne akoʻi ʻe heʻeku ongomātuʻá kiate au fekauʻaki mo e ongoongolelei ʻo Sīsū Kalaisi kuo toe fakafoki maí.”
Naʻe ngāue ʻa ʻEletā Pingree ʻi he Misiona lea faka-Sipeini Massachusetts Boston.
Naʻe maʻu hano ongo mataʻitohi ʻi he lea faka-Pilitāniá mo e saienisi ʻo e politikalé mei he ʻUnivēsiti ʻo ʻIutaá mo e mataʻi tohi MA ʻi he puleʻi ʻo e meʻa fakapisinisí mei he Akoʻanga Pisinisi ʻo Hāvatí. Naʻá ne mali mo Anne Pugsley ʻi Māʻasi 1990, pea ko ha ongomātuʻa kinaua ki ha fānau ʻe toko nima.
Ko e konga lahi ʻo ʻene ngāué ne nofotaha ia ʻi hono tokoniʻi e niʻihi kehé. Naʻe hoko ko e palesiteni ʻo e kautaha tokoni ʻofa fakafaitoʻó pea mo e tokoni palesiteni ʻi ha ongo kautaha tokoni ʻe ua ki he moʻuí.
Naʻá ne hoko foki ko e palesiteni ʻo e Misiona Texas Houston mei he 2011 ki he 2014 pea kuo ne hoko foki ko e Fitungofulu Fakaʻēlia, palesiteni fakasiteiki, pīsope, palesiteni ʻo e kōlomu ʻo e kaumātuʻá, mo e faiako ʻi he ʻinisititiutí mo e seminelí.
Naʻe pehē ʻe ʻEletā Pingree, “ʻOku pehē ʻe he ʻEikí, ‘Kapau te ke holi ki ai, te ke hoko ko e fouʻanga ʻo hono fai ʻo ha ngaahi ngāue lelei lahi ʻi he toʻu tangatá ni’ (T&F 11:8).” “Kiate au, ʻoku pehē ʻe he ʻEikí, ʻTe u lava ʻo ngāue ʻaki koe ke fai ha ngaahi lelei ʻi he moʻui ʻa e kakai kehé, kapau te ke tuku mai.’ Kapau te tau kumi ha ngaahi faingamālie, ʻe meʻangāue ʻaki kitautolu ʻe he Tamai Hēvaní ke tapuakiʻi ha taha kehe.”