Cristina B. Franco
Tokoni Ua ʻi he Kau Palesitenisī Lahi ʻo e Palaimelí
Naʻe ako ʻa Sisitā Cristina B. Franco ʻi heʻene kei siʻí, kapau naʻe ʻi ai haʻane fehuʻi, ʻe lava ke ne tafoki ki he Tamai Hēvaní ʻi he lotu ke maʻu ha tali.
Naʻá ne pehē, “ʻOku ou manatuʻi haʻaku ʻalu ki heʻeku faʻeé ʻi heʻeku taʻu 11 pe ofi ki ai, ʻo fai ange ha fehuʻi fakatokāteline.” “Naʻá ne tali ʻeku fehuʻí ka naʻá ne talamai, ‘ʻOku ʻikai fie maʻu ke ke tui ki heʻeku fakamatalá.’ Ko ia, naʻá ku lotu leva ʻo fehuʻi ki heʻeku Tamai Hēvaní pe naʻe moʻoni.”
Naʻe tali ʻene lotú, pea talu mei ai mo ʻene ʻiloʻi ʻoku ʻi ai haʻane Tamai Hēvani ʻoku ʻofa ʻiate ia pea te Ne tali ʻene lotú.
Naʻe fokotuʻu ʻa Cristina Beatriz Franco ʻi he ʻaho 1 ʻo ʻEpeleli 2017, ki he Kau Palesitenisī Lahi ʻo e Palaimelí. Naʻe fāʻeleʻi ia ʻi he 1958 kia Hugo R. mo Maria A. Godoy Fraga ʻi Puenosi ʻAealesi, ʻi ʻĀsenitina.
ʻI hono taʻu tolú, naʻe tukituki ai ʻa e ongo faifekaú ʻi he matapā ʻo e fale ʻene ongomātuʻá. Hili ʻene ako mo maʻu lotu ʻi ha māhina nai ʻe valu, naʻe kau ʻa e ongomātuʻá ki he Siasí peá na kamata ʻohake ai hona fāmilí ʻi he ongoongoleleí. Naʻá ne fetaulaki ai mo Rodolfo C. Franco ʻi he Palaimelí, ko ha kiʻi tamasiʻi naʻe hoko ki mui ko hono kaumeʻa lelei taha.
ʻI hono taʻu 18, naʻe hiki ai ʻa e fāmili ʻo Sisitā Franco ki ʻIutā ʻi USA. ʻI he taimi ko iá, naʻá na ʻilo ai ʻokú na fie maʻu ke na mali, ka naʻe fie maʻu ʻa Rodolfo ke ngāue ʻi ha vahaʻa taimi he tafaʻaki fakakautau ʻo ʻĀsenitiná. Naʻá na fetohiʻaki, pea ʻi he taimi ne ʻosi ai ʻene ngāue fakakautaú, naʻá na mali leva he ʻaho 15 ʻo Tīsema 1978, ʻi he Temipale Sōleki Sití. Ko ha ongomātuʻa kinaua ki ha ngaahi foha ʻe toko tolu.
Naʻá na molomolo-muivaʻe ʻi he tamai ʻa Sisitā Franco ʻa ia naʻe hoko ko ha tokotaha ngaahi uasi, ʻo na ngāue ai ʻi ha falekoloa uasi ʻi Sōleki Siti ʻi ha meimei taʻu ʻe tolungofulu.
Kuo ngāue ʻa Sisitā Franco ʻi ha ngaahi fatongia kehekehe ʻi he Siasí. Naʻá ne ʻi he poate lahi ʻo e Palaimelí mei he 2005 ki he 2010 pea ʻi he taimi ne ui ai ia ki he Kau Palesitenisī Lahi ʻo e Palaimelí, naʻá ne lolotonga ngāue fakataha mo hono husepānití ʻi he lolotonga ʻo ʻene tokangaʻi ʻa e Misiona Argentina Resistencia.