ʻEletā Adilson de Paula Parrella
Fitungofulu Taki Māʻolunga
ʻI he taʻu valu ʻa ʻEletā Adilson de Paula Parrella, naʻe kamata akoʻi ai ʻe he kau faifekaú ʻa hono fāmilí fekauʻaki mo e Palōfita ko Siosefa Sāmitá pea mo ongoongolelei kuo Toe Fakafoki Maí.
Naʻe pehē ʻe ʻEletā Parrella, ʻa ia naʻe fokotuʻu ʻi he ʻaho 1 ʻo ʻEpeleli 2017, ko e Fitungofulu Taki Māʻolunga, “Neongo ʻeku kei siʻí, ka naʻe ʻikai ke toe veiveiua ʻa ʻeku tui naʻe mamata tonu ʻa Siosefa Sāmita ki he ʻOtuá pea mo Sīsū Kalaisi.” “Talu mei ai mo e ʻikai pē haʻaku toe veiveua.”
Naʻe fāʻeleʻi ʻa ʻEletā Parrella ʻi he 1962 kia Fioravante mo Vany de Paula Parrella ʻi Kualusa, Palāsila, ʻi he matāfanga ʻo e ʻAtalanitikí ofi ki Sao Paulo.
Naʻe ngāue fakafaifekau fakatouʻosi hono ongo taʻoketé. Naʻe tupu ʻa ʻene holi ke ngāue fakafaifekau taimi kakató, mei he sīpinga ʻo hono ongo pīsopé mo ha pīsope ʻofa ko Angelino Borges de Freitas, ʻa ia naʻá ne fakahinohinoʻi ia he founga ke hoko ai ko ha taha maʻu lakanga Taulaʻeiki Faka-ʻĒlone. Naʻe fakatōmamafa kiate ia ʻe he ngāue fakafaifekaú ʻa “hono moʻoni ʻo e ʻOtuá mo Hono ʻAló pea mo ʻetau hoko kotoa ko e fānau ʻa e ʻOtuá.”
Hili e ngāue ʻa ʻEletā Parrella ʻi he Misiona Brazil Porto Alegre, ne hū ai ki he ʻUnivēsiti Pilikihami ʻIongi ʻi Polovo, ʻIutā, USA, ʻo ne maʻu mei ai hono mataʻitohi BA ʻi he fetuʻutakí pea mo e MA ʻi he puleʻi ʻo e meʻa fakapisinisí. Naʻe hoko ko e talēkita fakahokongāue ʻi he Kodak Polychrome Graphics mo e hoa-ngāue ʻi he Korn Ferry International. Kimuí ni maí, ne hoko ko e hoa-ngāue ʻi he Caldwell Partners.
Naʻá ne mali mo Elaine Finholdt ʻi Tīsema 1988 ʻi he Temipale Sao Paulo Palāsilá. Ko ha ongomātuʻa kinaua ʻo ha ngaahi foha ʻe toko nima.
Kuo hoko ʻeni ʻa ʻEletā Parrella ko ha palesiteni fakakolo, pīsope, aleʻanga māʻolunga, tokoni palesitenisī fakasiteiki, Fitungofulu Fakaʻēlia, mo e palesiteni ʻo e Misiona Brazil Belo Horizonte mei he 2009 ki he 2012.
Talu mei heʻene talanoa mo e kau faifekaú, mo e hoko ʻa ʻene moʻuí ko ha fononga ke mahino e ongo naʻá ne maʻu ʻi heʻene kei taʻu valú. Kuo tokoni ʻene maʻu lotú, hokohoko ako mei he folofola ʻa e ʻOtuá, mo e feinga ke moʻui ʻaki e ngaahi fekaú, ke fakalahi ʻene ʻiló ʻi he fanga kiʻi fakalika ki he moʻoní naʻá ne maʻu ʻi heʻene kei siʻí. Naʻá ne pehē, “Ko e puleʻanga moʻoni ʻeni ʻo e ʻOtuá ʻi he māmaní.”