ʻEletā Joni L. Koch
Fitungofulu Taki Māʻolunga
Ko ʻEletā Joni Luiz Koch ko ha toʻutangata hono ua ia ʻi he Siasí mei Palāsila. Naʻe ʻaʻahi ʻene ongomātuʻa ko Luiz mo Etelca Gascho Koch ʻi he ngaahi ʻuluaki taʻu ʻo ʻena nofomalí, ki ha ngaahi siasi fakalotofonua kehekehe ko e fekumi ki he moʻoni fakalaumālié.
Hili ha ngaahi houa lahi ʻo e lotu tāumaʻu ʻene faʻeé mo palōmesi ke muimui ki he ʻOtuá, ne aʻu mai ha ongo faifekau ki he ʻapi ʻene ongomātuʻá. Naʻe siʻi hifo he māhina ʻe onó, kuo na papitaiso.
Naʻe fāʻeleʻi ʻa ʻEletā Koch ʻi he 1962, pea ne tupu hake ʻi Sionavili, ʻi Sanita Katalina, ʻi Palāsila. Naʻe tokoni e ivi tākiekina ʻo e kau taki e Siasí, hangē ko ha faiako Palaimeli faivelenga, pīsope anga fakatamai, mo ha palesiteni fakasiteiki loto toʻa, ke ne tukupā ai ke moʻui ʻaki e ongoongoleleí.
ʻI he hili ʻene ngāue fakafaifekau taimi kakato ʻi he Misiona Brazil São Paulo North, naʻe ako ai ʻa ʻEletā Koch ki he sitetisitiká ʻi he ʻUnivēsiti Pilikihami ʻIongi ʻi Polovo, ʻIutā, USA. Naʻe pehē ʻe ʻEletā Koch, “ʻI heʻeku foki ki Palāsilá, naʻá ku ʻeva ki ha uooti ʻo haʻaku maheni, ʻo u fetaulaki ai mo hoku uaifi ki he kahaʻú.” “Naʻá ne hangatonu mai pē ʻo ʻeke mai pe kuó u ʻosi mali.” Hili ha māhina ʻe valu ʻo ʻena teu mali nofo vāmamaʻo—mo e ʻaho pē ʻe 15 ʻena feohí—ne mali leva mo Liliane Michele Ludwig he ʻaho 26 ʻo ʻEpeleli 1988, ʻi he Temipale Sao Paulo Palāsilá. ʻOku ʻi ai haʻana fānau ʻe toko ua.
Hili ʻene ʻosi mei BYU mo maʻu hono mataʻi tohi ʻi he puleʻi e meʻa fakapisinisí, ne ngāue leva ʻa ʻEletā Koch ʻi ha ngāue fakavahaʻa-puleʻanga. ʻI ha taʻu ʻe 25 tupu, ne ngāue ai ʻi ha ngaahi kautaha kehekehe ʻo aʻu ki hono toki ui ke ngāue taimi kakato maʻá e Siasí.
Kuo hoko ʻa ʻEletā Koch ko ha pīsope, palesiteni fakasiteiki, mo e Fitungofulu Fakaʻēlia. Naʻe lolotonga hoko ko e palesiteni ʻo e Misiona Mozambique Maputo ʻi he taimi ne ui ai ia ke hoko ko e Fitungofulu Taki Māʻolungá.
Naʻe pehē ʻe ʻEletā Kosa, “Naʻe langaki māmālie ʻeku fakamoʻoní ʻi ha vahaʻa taimi ʻo fakafou ʻi he ngaahi aʻusia fakalaumālie ne maʻu ʻi hono moʻui ʻaki e ongoongoleleí.” “Ko e Tohi ʻa Molomoná ko e taha ia ʻo e ngaahi tefito mahuʻinga ʻi he mālohi ʻo ʻeku fakamoʻoni ki he ʻEiki ko Sīsū Kalaisí, Hono Siasí, mo e Palōfita ko Siosefa Sāmitá.”