ʻEletā Brian K. Taylor
Fitungofulu Taki Māʻolunga
Naʻe fokotuʻu ʻa Brian King Taylor ko e Fitungofulu Taki Māʻolunga ʻi he ʻaho 1 ʻo ʻEpeleli 2017.
Naʻe fāʻeleʻi ‘a ʻEleta Taylor ʻi he 1964 ʻi ʻOkiteni, ʻIutā, USA, kia Lowell Moon pea mo Marie King Taylor. Naʻe tupu ofi hake pē ʻi Keisivili, ko e fika fā ia ʻi ha fānau ʻe toko nima, naʻe manako ʻi he toutaí mo e sipotí.
Naʻe maʻu ʻe hono taʻokete ko Craig haʻane sikolasipi pasiketipolo ʻi he ʻUnivēsiti ʻo e Siteiti ʻo ʻIutaá ʻi Lōkani, ʻIutā, peá ne feinga ke fakakaukauʻi pe ʻe ngāue fakafaifekau pe hoko atu ʻene vaʻinga he ʻunivēsití.
Ne manatuʻi ʻe Taylor, “Naʻá ku pehē ange [kiate ia] ʻi ha maʻu meʻatokoni efiafi he pō ʻe taha, ‘Hei, kapau te ke ʻalu ʻo ngāue fakafaifekau, te u ʻalu mo au ʻo ngāue fakafaifekau.’” Naʻe iku ʻo ngāue fakafaifekau ʻa e ongo tautehiná ni, pea ʻalu ʻa ʻEletā Taylor ki he Misiona Spain Seville.
Kimuʻa ʻene ngāue fakafaifekaú, naʻe vaʻinga ʻa ʻEletā Taylor ʻi he timi pasiketipolo ʻa e ʻUnivēsiti Pilikihami ʻIongí mei he 1982 ki he 1984 fakataha mo Devin G. Durrant, ʻa ia ʻoku lolotonga hoko he taimí ni ko ha mēmipa ʻo e Kau Palesitenisī Lahi ʻo e Lautohi Faka-Sāpaté.
Naʻe toe fetaulaki foki mo hono uaifi ne teʻeki ke na mali ko Jill Featherstone, ʻi BYU. Naʻe lolotonga faiako ʻi he kalasi Tokāteline ʻo e Ongoongoleleí ʻi he uooti ʻo e kau akó. Naʻe fakaafeʻi ia ʻe hono tokouá, pea ʻaʻahi ai ʻa ʻEletā Taylor ki he kalasi ʻa Jill Featherstone ʻo ne feʻiloaki ai mo ia. Ne tupu ai haʻana feʻofaʻaki, peá na mali ai ʻi he ʻaho 30 ʻo ʻEpeleli 1987, ʻi he Temipale Sōlekí. Ko ha ongomātuʻa kinaua ki ha fānau ʻe toko fitu.
Ko Sisitā Taylor, ko e ʻofefine pē ia ʻe toko taha ʻi he fānau ʻe toko fitu ʻa ʻEletā Vaughn J. Featherstone, ko e Taki Māʻolunga Mālōlō, mo Sisitā Merlene Featherstone. Naʻe pehē ʻe ʻEletā Taylor kau ki hono kāinga ʻi he fonó, “Naʻa nau tali lelei moʻoni mo e angaʻofa.” “Naʻá ku ongoʻi ʻofeina he kamataʻangá pē.”
Kuo kamata ʻe ʻEletā Taylor ha ngaahi pisinisi ʻaki hono mataʻitohi BA mei BYU, kau ai ha kautaha naʻá ne faʻu ha polokalama fakakomipiuta ke ne fakafekauʻaki e ngaahi telefoni he meʻa fakatuʻupakeé ʻi he ngaahi kautaha ki he maluʻi ʻo e kakaí.
Kuó ne hoko foki ko ha faiako ʻinisititiuti, aleaʻanga māʻolunga, palesiteni ʻo e Kau Talavoú he uōtí, palesiteni fakasiteiki, pea ʻi he taimi naʻe ui ai ko e Fitungofulú, naʻá ne lolotonga hoko ko e palesiteni ʻo e Misiona Texas Dallas.