Founga ʻEku ʻIloʻí
ʻUhinga ʻo e Tohi ʻa Molomoná
ʻOku nofo ʻa e taha naʻá ne faʻú ʻi he ʻOtu Filipainí.
Ko ʻeku tui ki he Tohi ʻa Molomoná naʻe fakafalala maʻu pē ʻi he fakamoʻoni ʻa e niʻihi kehé, ka naʻá ku fakakaukau kuo taimi ke u fekumi ki haʻaku fakamoʻoni pē ʻaʻaku.
Ko e hā ʻoku tau fie maʻu ai e Tohi ʻa Molomoná, hili ko iá kuo tau ʻosi maʻu e Tohi Tapú? Naʻe tā tuʻo lahi ʻeku fakakaukau ki he fehuʻi ko ʻení. Ne u fie ʻilo ʻi heʻeku kei taʻu hongofulu tupú ki he Tohi ʻa Molomoná, ka naʻe ʻikai ke u maʻu ha holi ke lau ia. Ko ha ʻuhinga ʻe taha, he naʻe ʻikai fakaʻaiʻai au ʻe ha taha ke u lau ia ʻi ʻapi koeʻuhí ko au toko taha pē naʻe kau ki he Siasí ʻi hoku fāmilí, tuku kehe pē ʻeku kui tangatá ʻa ia naʻe ʻosi mālōloó.
ʻI ha Sāpate fakamoʻoni ʻe taha, naʻe fakamoʻoni ai ha niʻihi tokolahi ʻo e kāingalotú kau ki he moʻoni ʻo e Tohi ʻa Molomoná, ʻa ia naʻe kamata ke u tālaʻa ai. Naʻa nau fakaafeʻi kinautolu naʻe teʻeki ke nau lau iá ke nau fakatupulaki haʻanau fakamoʻoni pē ʻanautolu ʻoku moʻoni e Tohi ʻa Molomoná, ko Siosefa Sāmitá ko ha palōfita ia ʻa e ʻOtuá, pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e puleʻanga ia ʻo e ʻOtuá ʻi he māmaní.
Naʻá ku fakalaulauloto pe naʻe mālohi feʻunga nai ʻeku fakamoʻoni ki he Siasí pea mo Siosefa Sāmitá ke ne lava ʻo kātakiʻi e ngaahi ʻahiʻahi mo e ngaahi fakatauvele ʻa Sētané. Naʻá ku ʻiloʻi naʻe ʻikai. Naʻe vaivai ʻeku fakamoʻoní koeʻuhí he naʻá ku fakafalala pē ki he ngaahi fakamoʻoni ʻa e kau taki ʻo e Siasí mo e kāingalotú. Naʻá ku palōmesi kiate au ʻe kamata he ʻaho pē ko iá, ʻeku fekumi ki haʻaku fakamoʻoni.
Naʻá ku fakakaukau ke u lau e Tohi ʻa Molomoná. Naʻá ku lau ʻi he talateú, “ʻOku mau fakaafeʻi e kakai kotoa ʻi he feituʻu kotoa pē ke nau lau ʻa e Tohi ʻa Molomoná, pea nau fakalaulauloto ʻi honau lotó ki he pōpoaki ʻoku tuʻu aí, pea nau fehuʻi ki he ʻOtua, ko e Tamai Taʻengatá, ʻi he huafa ʻo Kalaisí pe ʻoku moʻoni ʻa e tohí. Ko kinautolu te nau fai ʻeni ʻo kole ʻi he tuí te nau maʻu ha fakamoʻoni ki hono moʻoni mo hono faka-ʻOtuá ʻi he mālohi ʻo e Laumālie Māʻoniʻoní. (Vakai ki he Molonai 10:3–5.)” Naʻá ku ʻiloʻi ko ha fakaafe fakafoʻituitui eni kiate au ke u lau e Tohi ʻa Molomoná. Lolotonga ʻeku lau iá, ne u ongoʻi ha fakanonga mei he Laumālie Māʻoniʻoní naʻá ne fakamoʻoniʻi kiate au ʻa e fakalangi mo e moʻoni totonu ʻo e tohí.
Naʻá ku ʻiloʻi ʻoku fakamoʻoniʻi ʻe he Tohi ʻa Molomoná ʻa Kalaisi, pea naʻá ku fakamāʻia ʻi heʻeku fehuʻia hono moʻoní. Naʻá ku ako ʻi he ʻapiakó ki he founga ʻoku ako fakalelei ai ʻe he kau fakamaau ʻo e laó e fakamoʻoni ʻo ha hopo kimuʻa pea nau fai ha tuʻutuʻuni. Ne u fai ʻa e fehangahangai ʻo iá ki he Tohi ʻa Molomoná: ne u tomuʻa fakamāuʻi ia kimuʻa peá u lau iá.
Naʻá ku ʻosiki hono lau iá ʻi ha loto fakatōkilalo mo e loto-toʻa ke maluʻi ʻeku tuí. Pea ko e tahá, ʻoku ou fiefia koeʻuhí kuo ʻi ai hoku kaungālautohi ʻi heʻeku toe lau ʻa e Tohi ʻa Molomoná. Naʻe papitaiso ʻeku kui fefiné ʻi ha taimi nounou pē kimuʻa pea ʻosi ʻeku fuofua lau e Tohi ʻa Molomoná.
ʻOku ou maʻu ha fakamoʻoni mālohi ko Sīsū Kalaisí ko hoku Fakamoʻuí ia, ko Siosefa Sāmitá ko ha palōfita ia ʻa e ʻOtuá, pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi moʻoni mo moʻui pē ia ʻe taha ʻo e ʻOtuá ʻi he māmaní.