Kalasi Ako Tuituí mo ha Faingamālie Hono Ua
ʻOku nofo ʻa e taha naʻá ne faʻú ʻi Salata, ʻĀsenitina.
Ne mole ʻeku faingamālie ke vahevahe ai ʻa e ongoongoleleí mo ʻeku faiako tā pianó. Te u lava nai ʻo muimui ʻi he ueʻi hono hoko ko ʻení?
ʻI hoku taʻu 18, naʻe hiki hoku fāmilí mei he tafaʻaki fakatonga ʻo ʻĀsenitiná ki he tafaʻaki fakatokelau ʻo ʻĀsenitiná, ʻa ia naʻe hoko ai ʻeku tamaí ko ha palesiteni fakamisiona. ʻI he kamata maí naʻe faingataʻa kiate au mo hoku fāmilí ke mau feangai ki he liliú. Naʻe teʻeki ke mau maheni mo ha taha pea ne mau kamata leva ke fakasio ha ngaahi ʻekitivitī ke mau kau atu ki ai. Ne u fakakaukau ke u toʻo kalasi tā piano.
Naʻe hoko ʻeku faiako tā piano ko Māpelé ko e faiako lelei taha ia kuó u maʻú. Naʻá ku fiefia lahi ʻi he ngaahi kalasí, pea naʻe kamata ke vave e fakalakalaka ʻeku malava ko ia ke tā e pianó. Kaekehe, naʻe puke ʻa Māpele ʻi he kanisaá pea naʻá ne faingataʻaʻia. Naʻá ne fakamoleki ha taimi lahi ke fefolauʻaki ke ʻaʻahi ki he kau faitoʻó, kau toketaá, mo e kau taulaʻeiki ʻi he ngaahi feituʻu kehekehe. Naʻe tuʻo lahi ʻene tokoto falemahakí, ka naʻá ne toe ake pē pea foki mai ʻo faiako ʻaki ʻa e ʻulungaanga lelei mo e mateaki tatau.
Naʻá ku fakaʻamu he ʻaho kotoa pē lolotonga e kalasí ke u vahevahe kiate ia ʻa e ʻamanaki lelei ʻoku maʻu ʻi he palani ʻa e ʻOtuá, ʻa e ʻamanaki lelei ʻoku ʻomi ʻe Sīsū Kalaisi ʻi Hono mālohí, ka naʻe ʻikai ke u ʻilo pe ʻe founga fēfē.
ʻI he taimi naʻe fokotuʻu mai ai e kalasí hili e mālōlō ʻo e faʻahitaʻu māfaná, naʻe toe puke ʻa Māpele. Hili ha ngaahi taimi ʻo e ʻikai ke u toe fanongo meiate iá, naʻá ku telefoni ki ai ʻo tuku ha pōpoaki ke ʻeke pe ʻoku fēfē. ʻI he ʻaho hono hokó naʻe talamai ʻe hono ʻofefiné kuo mālōlō ʻa Māpele. Naʻá ku ongoʻi ha fuʻu loto-mamahi lahi. Naʻá ku ʻiloʻi naʻe totonu ke u vahevahe kiate ia e ongoongoleleí ka naʻá ku toutou fakatoloi hono fai iá pea kuo mole ai e faingamālié.
Naʻá ku kamata toʻo e kalasi tuituí, pea naʻá ku maʻu ha toe faiako lelei ʻe taha. ʻOkú ne tui ki he ʻOtuá, ka ʻoku kau ia ki ha tui fakalotu kehe. Naʻe kamata ke mau talanoa kau ki he ongoongoleleí ʻi ha kalasi ʻe taha, pea ʻi he taimi naʻá ne ʻeke mai ai pe ko e hā e tui fakalotu ʻoku ou kau ki aí, naʻá ku tali ange ko ha mēmipa au ʻo e Siasi ʻo Sīsū Kalaisi ʻo eKau Māʻoniʻoni ʻi he Ngaahi ʻAho Kimui Ní. Naʻá ne ngali puputuʻu ʻi he hingoá, pea ne u fakamahino ange, “ʻOku mau ʻiloa foki ko e kau Māmongá.” Naʻe tuaiekemo ʻene malimali fiefia mo pehē mai, “ʻOku ou ʻofa he kau Māmongá!”
Naʻá ne hoko atu ʻo pehē mai, “ʻOku ou lava pē ʻo tala ko ha Māmonga koe,” peá ne kamata fakalau mai leva e ngaahi ʻuhingá. Ne u fiefia naʻá ne fakatokangaʻi ʻeku feinga ke moʻui ʻaki e ongoongoleleí. Naʻá ne fehuʻi mai kau ki he papitaisó ʻi he Siasí. ʻI heʻeku fakamatala ange kau ki he papitaisó, naʻá ne pehē mai he taimi ko iá, “He ʻikai ke u lava ʻo papitaiso ki homou siasí koeʻuhí he naʻá ku tupu hake ʻi ha tui fakalotu kehe.” ʻI heʻeku fanongo ki heʻene fakamatala kau ki heʻene tuí, ne u ako ha meʻa lahi fekauʻaki mo e meʻa te u lava ʻo vahevahe kiate iá. Naʻá ku ongoʻi e ueʻi fakalongolongo kae mālohí ke ʻoange haʻane Tohi ʻa Molomona, pea ne u ʻiloʻi ko e Laumālié ia ʻoku lea mai kiate au.
Ne u maʻu ha Tohi ʻa Molomona peá u tohi ha kiʻi pōpoaki nounou kae fakamātoato ʻi ha laʻipepa pea mo ʻeku fika telefoní ʻi he tafaʻaki ʻe tahá, telia naʻa ʻi ai haʻane fehuʻi. Naʻá ku faʻo e laʻipepá ʻi loto he tohí, kofukofuʻi ia, pea fakapipiki ha līpine ki ai. Ne u foaki ange kiate ia ʻi he kalasi hokó. Naʻá ne fiefia lahi peá ne fakamālō mai kiate au.
Naʻá ku fifili he uiké kakato pe naʻá ne ongoʻi fēfē nai heʻene fakaava e meʻaʻofá—pe naʻá ne saiʻia ai pe ʻikai. Ne u kiʻi tōmui siʻi ʻi he kalasi hokó ka naʻá ku ʻohovale heʻene talitalí ʻi heʻeku hū atu ki he lokí. Naʻá ne fāʻofua mai peá ne fakapapauʻi mai kiate au, “Naʻá ku ʻofa, ʻofa ʻaupito ai! Ko e tohi naʻá ke ʻomaí ʻoku mālie, ʻo kamata pē ʻi he talateú ʻi he talanoa kau ki he ʻū lauʻi peletí. ʻOku moʻoni ʻaupito ia! ʻOku mālie e ngaahi potufolofola aí. Naʻá ku kamata lau, pea kuó u aʻu ki he vaeuaʻangá. ʻOku ʻikai ke u kei lava ʻo taʻofi hono laú!”
Naʻe tafoki e toenga ʻo e kalasí ke sio pe ko e hā e meʻa ʻoku hokó ʻi heʻenau fanongo ki heʻema fepōtalanoaʻaki fiefiá. Naʻe ʻeke mai ʻe ha taha ʻo hoku ngaahi kaungā akó, ʻa ia ne u faʻa talanoa ki ai kau ki he Tohi ʻa Molomoná, pe ʻoku ʻomi ʻe he tohi ko ʻení ha ongoʻi nonga. Naʻe tali ange heʻeku faiakó, “Naʻá ne ʻai au ke u tangi, ʻo ʻikai ko ha mamahi, ka ko e ongoʻi faitāpuekina.” Naʻe ʻikai ke ne kei lava ʻo taʻofi ʻene malimalí mo e fāʻofua kiate aú.
Ne u ongoʻi fiefia lahi. ʻI he foʻi momeniti ko iá, naʻe mahino ai kiate au he ʻikai lava ke tau fakamāuʻi pe ko hai ʻoku mateuteu feʻunga ke ne tali e folofola ʻa e ʻOtuá. ʻOku ʻikai ke tau ʻiloʻi e tuʻunga ʻoku ʻi ai e loto fiefanongo ʻo ha taha. Kapau ʻoku ueʻi kitautolu ʻe he ʻOtuá ke tau vahevahe, ʻoku fie maʻu ke tau ngāue he ʻokú Ne ʻafioʻi lelei ange ʻiate kitautolu.