Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Ngaahi fekaú = ʻOfa,” peesi 56: Fakakaukau ke fehuʻi ange ki hoʻo fānaú fekauʻaki mo ha ngaahi tūkunga naʻe ʻahiʻahiʻi ai kinautolu ke talangataʻa kiate koe. ʻE lava ke kau ʻi he ngaahi sīpingá ʻa e vaʻinga ʻi ha loto hala femoʻuekiná pe ko e mohe ʻi ha taimi pau. Fehuʻi ange pe ʻoku nau pehē ko e hā e ʻuhinga naʻá ke ʻoange ai e ngaahi fakahinohino ko iá (koeʻuhí ʻokú ke ʻofa ʻiate kinautolu). Te ke lava leva ʻo fakaʻaongaʻi e fakamatalá ke fakaʻaongaʻi e tefitoʻi moʻoni ko ʻení ki he ngaahi fekau mei he Tamai Hēvaní. Fakamatalaʻi ange ʻoku ʻomi ʻe he Tamai Hēvaní e ngaahi fekaú koeʻuhí ʻokú Ne ʻofa ʻiate kitautolu pea ʻokú Ne ʻafioʻi ʻoku maluʻi kitautolu ʻe he ngaahi fekaú. Te tau lava ʻo fakahā ʻetau ʻofa kiate Iá ʻaki hono tauhi e ngaahi fekau ko iá.
“Tokoni ke Tokangaʻi ʻa ʻElisī,” peesi 70: ʻOku ʻomi ʻe he fakamatalá ha talanoa kau ki ha kiʻi tamasiʻi ko Taniela ʻa ia naʻe faʻa ongoʻi ʻita ʻi hono tuofefine ʻoku faingataʻaʻia fakaesino, neongo ʻokú ne ʻofa ʻiate ia. Fakakaukau ke lau fakataha e fakamatalá mo hoʻo fānaú. Te ke lava ʻo fehuʻi ange pe naʻe fakahā fēfē ʻe Taniela ʻene ʻofa ki hono tuofefiné pea aleaʻi leva e ngaahi founga ʻe lava ai homou fāmilí ke fakahā ʻa e ʻofá, ʻo muimui ʻi he sīpinga ʻa Tanielá.