Ko e hā ʻoku totonu ke u fai ʻo kau ka fehuʻia ha meʻa kuo akoʻi ʻe ha palōfita?
Ko e taimi naʻe fokotuʻu ai e Siasi kuo toe fakafoki maí, naʻe maʻu ʻe Siosefa Sāmita ha fakahā ke tala ki he Kāingalotú, “Ke mou tali ʻene leá [ʻa e palōfitá], ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē” (T&F 21:5).
Naʻe toe pehē foki ʻe Siosefa Sāmita “[ʻoku] palōfita ha palōfita ʻi he taimi pē [ʻokú ne] ngāue ai ʻo fakatatau mo iá.”1 ʻOku ʻuhinga ʻeni “ka lea ha taki ʻi ha meʻa ʻoku hoko, ʻokú ne faʻa fakafofongaʻi pē ʻe ia ha fakakaukau fakafoʻituitui naʻe fakakaukauʻi fakalelei, ka naʻe ʻikai ʻuhinga ia ko ha meʻa pau ke haʻisia fakakātoa ki ai ʻa e Siasí.”2 ʻOku meimei ke faʻa ʻilonga pē ʻa e taimi ʻoku “ngāue ai ʻo fakatatau mo ia” ha palōfita, hangē ko e taimi ʻoku lea ai ki he kāingalotu ʻo e Siasí.
Ko hotau faingamālie ia ke tau kole ki he Tamai Hēvaní ha fakamoʻoni maʻatautolu pē “fekauʻaki mo ha faʻahinga meʻa pē kuo fakahā Heʻene palōfitá”.3 Kapau he ʻikai ke tau maʻu ha fakamoʻoni, ta ʻoku totonu ke tau ako ki he ngaahi meʻa kuo fakahā mai ʻe he kau palōfita kehé fekauʻaki mo e meʻa koiá pea fili leva e meʻa ke tau fakahokó. Ko e meʻa lelei taha te tau ala fakahokó ko e muimui ki he akonaki ʻoku fakakātoa pea faitatau ai e kau palōfitá “ʻi he kātaki mo e tui kotoa pē.” ʻI heʻetau fakahoko iá ʻe faitāpuekina ai kitautolu (vakai 1 Nīfai 2:11, 16, 19).