O Le Auala Na Ou Iloa Ai
Aisea o Le Tusi a Mamona Ai?
E alala le tusitala i Filipaina.
Na masani lava ona ou faalagolago i isi mo se molimau o le Tusi a Mamona, ae na ou filifili ua oo i le taimi e saili ai lau lava molimau.
Aisea tatou te manaomia ai le Tusi a Mamona ao lea ua i ai le Tusi Paia? Na ou mafaufau soo e uiga i lenei fesili. I le avea ai ma se talavou na ou fiailoa e uiga i le Tusi a Mamona, ae na leai sou naunautai e faitau i ai. O le isi mea, na leai se tasi na faamalosiauina au e faitauina i le fale aua na o au le tagata o le Ekalesia i lou aiga, sei vagana ai lou tamamatua ua maliu.
I se tasi Aso Sa i se sauniga molimau, e toatele tagata na molimau e uiga i le moni o le Tusi a Mamona, lea faatoa ou amata ona masalomia talu ai nei. Na latou luitauina i latou e lei faitauina ia maua sa latou lava molimau o le Tusi a Mamona e moni, o Iosefa Samita o se perofeta a le Atua, ma o le Ekalesia a Iesu Keriso o le Au Paia o Aso e Gata Ai o le malo o le Atua i le lalolagi.
Na ou manatunatu loloto pe o lau molimau o le Ekalesia ma e uiga ia Iosefa Samita na lava lona malosi e tatalia faaosoosoga ma faatosinaga a Satani. Na ou iloaina sa leai. Na vaivai lau molimau aua na ou faalagolago i molimau a taitai ma tagata o le Ekalesia. Na ou folafola ia te au lava e amata i lena aso, o le a ou sailia lau lava molimau.
Na ou filifili e faitau le Tusi a Mamona. I le faatomuaga na ou faitauina, “Matou te valaau atu i tagata uma e i soo se mea, ia faitau i le Tusi a Mamona, ia mafaufau loloto i ai i o latou loto le savali o i ai, ona ole atu lea i le Atua, le Tama Faavavau, i le suafa o Keriso pe ua moni le tusi. O latou e mulimuli i lenei ala ma ole atu i le faatuatua, o le a latou maua se molimau i le moni ma le paia e ala i le mana o le Agaga Paia. (Tagai Moronae 10:3–5.)” Na ou iloaina na valaaulia patino lava au e faitau le Tusi a Mamona. Ao ou faaauau le faitauina, na ou lagona le mafanafana o le Agaga Paia o molimau mai i le paia ma le moni o le tusi.
Na ou iloaina o le Tusi a Mamona o loo molimau mai ia Keriso, ma na ou maasiasi mo le masalosalo i lona moni. I le aoga na ou aoao ai le ala e suesue ai e faamasino o le tulafono se faamaoniga o le solitulafono ae lei faia le faaiuga. Na ou faia le faafeagai i le Tusi a Mamona: na ou faamasinoina ae lei faitau i ai.
Na ou faaiu le faitauina ma se lotomaualalo ma le lototele e puipui le mea ou te talitonu i ai. Ma le isi, ou te fiafia aua o loo i ai sau soa ao ou toe faitauina le Tusi a Mamona. Na papatisoina lou tinamatua ae faatoa uma ona ou faitauina le Tusi a Mamona i le taimi muamua.
E i ai sau molimau malosi o Iesu Keriso o lou Faaola, o Iosefa Samita o se perofeta a le Atua, ma o Le Ekalesia a Iesu Keriso o le Au Paia o Aso Gata Ai o le Ekalesia moni ma le ola a le Atua iinei i le lalolagi.