O le a se mea e tatau ona ou faia pe a ou fesiligia se mea na aoao mai e se perofeta?
Ina ua faatulaga le Ekalesia toefuataiga, na maua e Iosefa Samita se faaaliga e tau atu i le Au Paia anamua, “O lana [perofeta] upu ia outou talia, e pei lava ua mai i lou lava gutu, i le onosai ma le faatuatua atoa” (MF&F 21:5).
Na saunoa foi Iosefa Samita faapea “o se perofeta faatoa [avea o se] perofeta pe a ia [faia] faapea.”1 O lona uiga “o se faamatalaga e fai e se taitai i se sauniga se tasi e tele lava ina fai ma ona manatu patino, e ui sa lelei ona mafaufauina, ae e le avea ma se faamatalaga aloaia mo le Ekalesia atoa.”2 E masani lava ona iloa gofie pe o le perofeta “ua faia faapea,” e pei o le lauga atu i tagata o le Ekalesia i se tulaga aloaia.
O se faamanuiaga mo i tatou le ole atu i le Tama Faalelagi mo sa tatou lava molimau “e uiga i soo se mea ua folafola mai e Lana perofeta.”3 Afai tatou te le maua se molimau, e tatau la ona tatou suesue i upu na saunoa mai ai nisi perofeta e uiga i le mataupu ma filifili se ala e faatino ai. O le ala sili e faatino ai o le mulimuli i fautuaga tuufaatasi ma faifai pea a perofeta “i le onosai ma le faatuatua atoa.” A tatou faia, o le a faamanuiaina i tatou (tagai i le 1 Nifae 2:11, 16, 19).