E Faafofoga le Tama Faalelagi i Au Tatalo
Saunia e Neill F. Marriott
Fesoasoani Lua i le Au Peresitene Aoao o Tamaitai Talavou
O se tasi taimi ao ou talavou, na ou manaomia le iloa e silafia e le Tama Faalelagi au ma malamalama i faigata na ou feagai ai. Na ou fesili ia te Ia e taialaina au ia maua se mau e fesoasoani ia ou maua ai se lagona sili atu. Na ou susue tusitusiga paia ma faitau, “Tatou te mitamita i puapuaga … ua tatou iloa o le puapuaga e tupu ai le onosai; o le onosai, e tupu ai le mautinoa; o le mautinoa e tupu ai le faamoemoe; o le faamoemoe foi e le ma ai, aua ua faamaligi mai le alofa o le Atua i o tatou loto” (Roma 5:3–5). O lenei mau na aoaoina au faapea o ou aafiaga faigata e mafai ona fesoasoani ia te au e maua ai le onosai, mautinoa, ma le faamoemoe, ma lagona le alofa o le Atua mo au. Na ou iloa na faafofoga mai le Tama Faalelagi i lau tatalo ma tali mai ia te au e ala i tusitusiga paia. Na i ai lou faatuatua o le a lelei mea uma.
O le atalii o lou atalii na aoao faapea e faafofoga le Tama Faalelagi ia tatou tatalo. Na ia manaomia se uo i le aoga. Na ia filifili e tatalo ma lona tina e fesoasoani ia te ia ia maua se uo. O aso uma pe a ta le logo o le malologa, na iloa e Stuart na tatalo lona tina mo ia. Na vave lava ona ia maua se uo fou! Na aoao Stuart e popole alofa le Tama Faalelagi i ona atugaluga. Na ia aoao o le a tali mai le Tama Faalelagi i ana tatalo.
Ina ua 10 tausaga o le atalii o lou atalii, na ia taalo i se au soka malosi. Na talanoa Jack i ona matua ma filifili e faamamalu le Sapati ma aua le taalo i taaloga i le Sapati. Na ia popole o le a le lelei o ia aua ua misia na taaloga. Na iloa e le uso laitiiti o Jack o Charles o loo popole o ia. I se tasi aso na fai ai e Charles le tatalo faaleaiga. Na ia ole atu i le Tama Faalelagi e fesoasoani ia Jack ia aua le popole e uiga i le soka. Na iloa e Charles o se auala lelei tele e fesoasoani ai i lona uso o le tatalo mo ia. Na i ai lona faatuatua o le a fesoasoani lana tatalo ia Jack.
Tatou te manaomia le fesoasoani i lenei olaga, ma e finagalo le Tama Faalelagi e tuu mai ia i tatou lena fesoasoani. E alofa o Ia ia i tatou. O le a Ia faafofoga mai pe a tatou tatalo!