O Le Sefuluai, Taimi, ma Auala o Femalagaaiga
O le tusitala e alala i São Paulo, Pasila.
Sa leai se matou tupe e o ai i le lotu, o lea sa amata ai ona matou savavali.
I se tasi Aso Toonai sa ma iloaina ma lo’u toalua e le’i lava se matou tupe e o ai i se pasi i le lotu i le aso e sosoo ai, ma e le mafai ona tala se tupe. O le matou sefuluai ua uma ona tuu i totonu o le teutusi o le foai ua saunia e tuuina atu i le epikopo. Sa amata ona matou talatalanoa pe faapefea ona matou malaga i le lotu. Afai matou te faaaogaina le tupe o le sefuluai e totogi ai le pasi, matou te lagona o le a malamalama le Alii; peitai, sa matou filifili e le sa’o.
O le isi filifiliga o le a matou le o i le lotu, ma sa matou toe mafaufau foi o le a malamalma le Alii aua matou te lei misia lava se lotu. Peitai, afai e tupu lena mea, o le a le mafai ona ave le matou sefuluai i le epikopo, ma sa faaleaogaina lena filifiliga.
O le taumafai ina ia faamaoni, sa matou filifili ai ina ia vave o ese nai lo le taimi masani ma savavali i le lotu. Sa matou malaga atu i lena aso Sapati matagofie agai atu i le falesa, lea e pe tusa ma le tolu maila (4.8 km) mai lo matou fale. Mo le ma fanau e toafa (o le ulumatua sa ono), na pei o se pati, ma sa latou fiafia e taufetuli ma taaalo i le ala.
Ina ua matou taunuu i se tulaga patino i se auala lautele ma le matautia, sa ou faalogo i le Agaga o ta’u mai ia te au, “E tatau ona tou ona kolosi loa i le taimi nei.” Sa ou fai atu i lo’u toalua, ma sa ia tali mai sa le sefe ona o le vaega lena o le auala e amata ona pio, polokaina ai lo matou iloaina atu o taavale o agai mai. Sa ou tali atu ua ou lagona ua tatau ona matou kolosi iina, o lea sa matou kolosi faatopetope ai, sa tofu i ma’ua ma lo’u toalua ma ni tamaiti se toalua. O le taimi lava na matou laasia ai le auala savali, sa tu se taavale i le itu lena, ma fesili mai le avetaavale, “Tou te o i le lotu?”
O le avetaavale o se uso e lē auai i la matou uarota, ae na ou feiloai ia te ia muamua ona sa ou asiasi atu i lana uarota. Sa matou tali atu ioe, ma sa ia ofoina mai e momoli i matou iina. A o matou atu i totonu o le taavale, sa faamalamalama mai e lenei tamalii faapea e le masani ona ia sau i le auala lenei ma na ala ona ia ui mai i le auala lea ona ua leiloa ki a lana paaga faipisinisi ma o loo ia aveina atu ana ki i lana paaga.
Sa ou mafaufau ia te au lava ia faapea e lei tupu fua lenei mea. Na silafia e le Alii sa matou manaomia se taavale e o ai i le lotu. Sa i ai le matou sefuluai i lau taga, ma sa aumaia ia i maua le avanoa e aoao ai le ma fanau e uiga i faamanuiaga o le a oo mai i le totogi o le sefuluai. Na sili atu ona matou vave taunuu i le falesa ile taimi lea nai lo isi taimi muamua ae sa matou maua le fiafia ma le loto faafetai. Sa matou auai i sauniga uma ma e matou te lei ta’uina i se tasi le mea na tupu.
O le taumafanafana i São Paulo e matuai vevela lava, ae maise lava i le aoauli, pe a faaiuina a matou sauniga Lotu. Sa matou sauniuni e toe foi ae sau se tasi tagata ma fesili mai, “O i ai se tasi e toe aveina outou?” Sa matou tali atu e leai, ma sa ia fai mai, “Tou te mananao ou te aveina outou?” Sa matou taliaina lana ofo, ma sa ma fetilotiloai ma lo’u toalua ma laumata fiafia faalelagona.
Na sili atu ma le faatasi ona tuuina mai e le Alii ia i matou se faamanuiaga maoae mo lo matou usiusitai.