Faatuatua, Tulaga Tutusa, ma le Saolotoga Faalelotu
Saunia e Elder Ronald A. Rasband
O Le Korama a Aposetolo e Toasefululua
Mai se lauga i se sauniga lotu, “Religious Freedom and Fairness for All,” na tuuina atu i le Iunivesite o Polika Iaga ia Setema 15, 2015. Mo le saunoaga atoa i le gagana Peretania, alu i le speeches.byu.edu.
Ao e mulimuli i le valaaulia e aapa atu i isi i se agaga o le tulaga tutusa, o le a e lagonaina se faateleina i le alofa o le Faaola mo oe ma mo fanau uma a le Tama Faalelagi.
Ata na tusia e David Stoker, E tusa ai ma Thinkstock photographs from DigitalVision, iStock, Monkey Business, Photos.com, Stockbyte, and Top Photo Group
Ou te masalo e mo nisi o outou o le fuaitau “saolotoga faalelotu” e sili atu le pei o le “saolotoga e faaeseese ai.” Ou te manao e talanoa atu ia te outou e uiga i lenei vaaiga ma fesoasoani ia te outou ia malamalama i le uiga i le Ekalesia pe a talanoa e uiga i le saolotoga faalelotu ma aisea e taua tele ai mo lou lumanai ma mo Le Ekalesia a Iesu Keriso o le Au Paia o Aso e Gata Ai. Ou te fuafua foi e taua nisi o faafitauli ma le malamalamaaga atonu o loo i ai i nisi o outou pe a oo i le saolotoga faalelotu.
Atonu o nisi o outou o loo tauivi ma se malamalama o le matafaioi faalelotu i le nuu, malo, ma tulaga faalauaitele. O nisi o outou atonu e mafaufau pe aisea e aafia ai vaega faalelotu i upufai o malo i le tulaga muamua lava, ma atonu e masani ona e masalosalo i uunaiga o tagata faalelotu pe a latou aofia ai. I tausaga talu ai nei o le leo autasi o vaega o e lagona faapea o mataupu faalelotu e tatau ona le aafia i se matafaioi i talanoaga faaupufai o malo ua faateleina le leotele.
O le avanoa e aafia ai i le faagasologa faaupufai o malo o se faamanuiaga ua tuuina atu i tagata i le tele o atunuu. O tulafono ma tulafono faapalemene e faia se matafaioi taua faaleaoaoga i le fausiaina o le aganuu faalevafealoai ma amioga. Tatou te manaomia tagata uma i le nuu ia faia se matafaioi o le aafia ai i talanoaga faalauaitele na e fesoasoani e fausia tulafono ma tulafono faapalemene ia tulaga tutusa mo tagata uma.
Saolotoga mo Tagata Uma
O le a le mea o loo matou talanoa i ai pe a matou taua le saolotoga faalelotu? Sei ou tauina atu ia te outou ni tala i ni tagata se toalua. Ao ou faia, ou te manao ia outou mafaufau e uiga i ou lagona pe ana faapea o oe o se tasi o nei tagata.
O le tala muamua e uiga i se tasi o le a ou faaigoa ia Ethan. Sa faatoa amata lana galuega i se matata ua leva ona ia faamemelo i ai, ma na ia manao ia tauleleia. Na ia vave mai i le galuega ma na umi ona nofo [i le galuega]. Na ia pikiina ni galuega faatino faaopoopo ma faia se galuega silisili ona lelei. Na fiafia i ai le tele o lana aufaigaluega ma na fiafia i lana galuega. I se tasi aso i le aiga o le aoauli faatasi ma ni tagata faigaluega, na ia maua le lagona toafimalie e tau atu ia i latou o ia e fiafia i le itupa e tasi. Na mulimuli mai se filemu le lelei aua e leai se tasi na iloa pe faapefea ona tali atu. Na le fiafia Ethan i le tali gugu a ana uo faigaluega, ma na ia lagona ai le tiga ma le le taliaina.
Ina ua uma lena fonotaga i le aiga o le aoauli, na amata ona faateleina le lagona le lelei mo Ethan i le galuega. Na amata ona ia lagonaina le le saogalemu ma le le taua. Na ia vaaia o ia lava ua faaesea mai galuega faatino tetele ma gaoioiga faafiafia pe a manava, ma na amata ona afaina lona galue malosi aua na ia lagonaina le le tatau ona i ai iina ma lona le manaomia. Ina ua mavae ni nai masina na tuli ai o ia aua na lagona e lona pule le le lelei o lana galue. E ui i isi mafuaaga, na iloa e Ethan ua tuli o ia ona o le fiafia i le itupa e tasi.
Sei ou tau atu ia te outou e uiga ia Samantha. Sa faatoa amata ona galue Samantha i le ofisa autu o se iunivesite o le lotoifale. Na fiafia o ia e galue i se siosiomaga e tumu i mafaufauga eseese, manatu ma nofoaga e o mai ai. I se tasi aso i le galuega na alu atu ai se uo faigaluega ia Samantha, na ia fai mai na faalogo o Samantha o se Mamona, ma na fesili mai pe moni. Na tali fiafia atu Samantha ioe, ae o le fesili na sosoo mai na faateia ai o ia.
“O le a la le mea tou te le fiafia ai i tagata e fiafia i le itupa e tasi?” o le fesili lea a lana uo faigaluega. Na faateia Samantha i le fesili ae na taumafai e faamatala atu ona talitonuga i le Atua ma le fuafuaga a le Atua mo Ana fanau, lea na ia fai atu e aofia ai taiala i le amio mama ma faalefeusuaiga. Na finau atu lana uo faigaluega i le tau atu ia te ia faapea o isi o le atunuu ua alualu i luma ma e le toe i ai ni na talitonuga. “Ma le isi mea,” na ia fai mai ai, “ua tumu le talafaasolopito i tagata ua faaaoga aoaoga faalelotu e fai ai taua ma faaleaoga ai vaega vaivai.”
Na toe faaupu atu e Samantha ona manatu ma lona malamalama i le alofa o le Atua mo tagata uma ona ia fesili lea i lana uo faigaluega e faaaloalogia lana aia tatau e talitonu ai. Na lagona e le uo faigaluega le uunaia e tau atu i isi tagata faigaluega le la talanoaga, ma i nai isi vaiaso na sosoo ai, na lagona e Samantha le faateleina o le tuuatoatasi ao tui pea lava pea o ia e tagata faigaluega i fesili ma osofaiga.
O le pule o Samantha, i le vaaia o le faateleina o talanoaga faalelotu i le galuega, na lapataia Samantha faapea o le talaiga i le siosiomaga faigaluega o le a afaina ai lana galuega. O lana galuega, e pei o Ethan, na amata ona afaina. Nai lo le faatalitali seia tuli, na amata ona vaavaai Samantha mo se isi galuega.
Ia, o tala faafaataoto nei, ae e ui i lea e le o ni faataoto. E toatele ni Samantha ma Ethan o loo i ai. Poo le a lava le ituaiga olaga tatou te filifili e ola ai ma po o a lava filifiliga tatou te faia, ua tatou tutusa uma i le agaga e tasi ma le manao mo le faia ia tulaga tutusa ma agalelei. Sa le tatau ona tulia Ethan mo le fiafia i le itupa e tasi, ma o Samantha sa le tatau ona faafefeina mo le avea ma se tagata lotu. Na faitioina sese uma i laua, faamasinoina, ma osofaia.
I le lalolagi i le aso, ua sao i faaupufai o malo le malamalama i le tulaga o Ethan ae itiiti mo Samantha. Atonu e maua e Ethan lona tulaga e faapea e filifilia e se vaega e lagolagoina ae o se isi o le faataitaiga e tetee i e fiafia i le itupa e tasi. Ma, e moni lava, na te manaomia le puipuiga.
Ae faapefea Samantha? O ai o le a puipuia lana aia tatau i talitonuga faalelotu? Ae a lana aia tatau e ola faamaoni o se tagata faatuatua, e naunautai e alofa ma auauna atu i tagata uma ae e i ai foi le aia tatau e filifili ai le mea e sao ma le mea e sese ma ola ai lona olaga?
Tulaga Tutusa mo Tagata Uma
O lo tatou sosaiete ua faatauasoina e lona manao e sui manatu faapito sese agai i se vasega e tasi o tagata ma ua lamatia ai le fatuina o se isi vasega ua sauaina: o tagata o le faatuatua, e pei o oe ma au.
Ua fesiligia lava aoga faalelotu aua latou te manaomia tamaiti aoga ma tagata faigaluega ia tausisia se lisi o amioga faatulagaina na e manaomia ai le faamaoni ma le ola mama. O Pule Faatonu o kamupani tetele ua faasaina mataupu faalelotu pe faamalosia foi e faamavae ona o o latou talitonuga faalelotu patino ua le taliaina i faaupufai o malo. Ma o isi pisinisi ua faamalosia e tapunia ona o tagata e ona ua faamatala atu lo latou talitonuga.
E ui i mea ua e faalogo i ai pe faitau i ai i tausaga ua tuanai, O Le Ekalesia a Iesu Keriso o le Au Paia o Aso e Gata Ai o loo tumau pea lava pea mo le saolotoga o filifiliga ma le talitonuga. I le tele o tausaga ua tuanai na tusia ai e le Perofeta o Iosefa Samita (1805-44), “Tatou te talitonu … na faia tutusa tagata uma, ma e i ai uma lava le avanoa e mafaufau ai mo i latou lava i mataupu e fesootai ma lagona o le loto fuatiaifo.”1
Na mulimuli ane faapea mai, “Afai … ua faaalia na ou naunau ou te oti mo se ‘Mamona,’ … Ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu [e faapei foi o se Mamona]; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau … o soo se isi lava ekalesia o e atonu e le ta’uta’ua pe e vaivai tele foi e puipuia i latou lava.”2
O le a la le tulaga o le Ekalesia i le saolotoga faalelotu? E mafai ona ou faamautinoa ia te oe o aposetolo ma perofeta, i lalo o le uunaiga o le lagi, ua tuuina mai le manatu taua i lenei mataupu. Tatou te talitonu i le mulimuli i poloaiga a le Atua, ia ua mamanuina e saogalemu ai lo tatou fiafia e faavavau. Ae ui i lea, “E le faamalosia e le Atua tagata i le lagi.”3 Tatou te talitonu i le fatuina o se avanoa mo tagata uma e ola i lo latou malamalama e aunoa ma le faalavelave i aia tatau ma le saogalemu o isi. Pe afai o aia tatau a se tasi vaega ua fetoai ma aia tatau a isi, e tatau ona tatou mulimuli i le mataupu faavae o le tulaga tutusa ma manatu i le tele o tagata e mafai ai. E talitonu le Ekalesia ma aoaoina “le tulaga tutusa mo tagata uma.”4
O le puipuia o manatu e faatatau i le saogalemu o le ala e mafaufau ai se tasi ma lagona ma puipuia lena aia tatau a lena tagata e faatino i na talitonuga. O loo ou tautala e uiga i se tasi e tau atu ia te oe o mafaufauga, lagona, ma talitonuga ua e maua e le faatagaina, faatauaina, pe taliaina ona o ou manatu e le lauiloa. O se taua i le lagi na tauina mo le faitalia, ma o se faatafunaga maoae o lena faitalia le faamalosia o oe e faasese ou manatu ona o ou talitonuga e le ogatusa ma le lalolagi.
Faamolemole aua e te malamalama sese. Pe a ou tautala i le avea ma tagata faamaoni, ou te le o faapea atu ua tuuina mai e le Alii ia i tatou se faatagaga maua fua e ola ai i soo se ala tatou te filifilia e aunoa ma ni taunuuga. Tatou te tali atu pea ia te Ia mo a tatou filifiliga. Na Ia fetalai mai, “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” (Mataio 5:48). O le poloaiga e saili le atoatoa e faatatau i lo tatou amata i le mea o loo tatou i ai ma saili le fesoasoani a le Alii e siitia i tatou i le mea e finagalo o Ia tatou te o i ai. O le tumau i lo tatou faamaoni aiai patino e manaomia ai le taumafaiga faaauau pea e faateleina lo tatou susulu, poto, ma le malamalama.
O le tupulaga faiae ua sili le “fesootai i tekinolosi” i le talafaasolopito. Latou te fesootai pea i taimi uma. Ma ua outou iloa o mea uma i le Initoneti e masani lava ona 100 pasene le sao, a ea? E leai. O lea aua le talitonu i mea uma tou te vaai i ai i le Initoneti e uiga i le Ekalesia ma lona tulaga i aia tatau i itupa e tasi.
O se faataitaiga talu ai nei o le mataupu “tulaga tutusa mo tagata uma” a le Ekalesia na tupu ia Ianuari 2015, ina ua faia e le Ekalesia se konafesi faasalalau ma ni Aposetolo e toatolu ma se tasi o le au peresitene aoao a Tamaitai Talavou e faamanatu ai i o tatou tagata, le atunuu, ma le palemene o le setete o Iuta faapea e lagolagoina e le Ekalesia se vaaiga tutusa e saogalemu ai aia tatau a tagata uma.
Na fofogaina e Elder Dallin H. Oaks o le Korama a Aposetolo e Toasefululua i lena konafesi faasalalau: “Matou te valaau atu i tagata o le lotoifale, setete ma le malo tutotonu ia auauna atu i o latou tagata e ala i le pasia o le tulafono faapalemene lena e puipuia saolotoga faalelotu mo tagata, aiga, lotu ma isi vaega faatuatua ao puipuia foi aia tatau mo a tatou tagatanuu TAILU [tamaitai, alii, itupa e tasi, lua itupa, uiga tama toe teine] i ituaiga o eria e pei o fale, galuega, ma nofoaga lautele i faletalimalo, faleaiga ma femalagaaiga—puipuiga e le maua i le tele o vaega o le atunuu.”5
Faatasi ai ma le savali o le puipuiga mo TAILU ma tagata faalelotu foi i le ono vaiaso mulimuli ane, na faamalo atu ai taitai o la tatou Ekalesia ma isi i le faalapotopotoga o le TAILU. Na faamalosiau le vaaia o i latou ua puipuia mai le tuliesea, manatu faapito i mea tau fale, pe tulia foi mai se galuega ona o ituaiga tagata po o itupa e faamemelo i ai. Na matou faamalo atu foi ia tatou uo faalelotu o isi tapuaiga, i le vaaia o i latou o puipuia faapena i nofoaga o galuega ma nofoaga faitele.
Na faasalalauina Iuta—ma le Ekalesia—i talafou faalelalolagi ma viia mo se faaiuga faapena faaletalafaasolopito. O lenei la, ia matauina e leai se aoaoga faavae po o ni mataupu faavae faalelotu na taulagaina. E leai ni suiga na faia i le tulafono a le Atua o le amio mama po o lo tatou talitonuga faapea o fesootaiga faalefeusuaiga e tatau lava ona faataunuuina na o totonu o le faaipoipoga i le va o se alii ma se tamaitai. O le taunuuga na tulaga tutusa i tagata uma ma na atagia ai le faatumauina i tulaga faatonuina o le amio mama ma aoaoga ma le faaaloalo mo isi.
O Se Savali o le Tulaga Tutusa
E le toatele i tatou o le a maua ni matafaioi maualuluga i malo ma faigatulafono, o lea e mafai ai ona e mafaufau pe faapefea e lenei autu ona fetaui ia te oe patino lava i lou olaga o lea aso ma lea aso. Ou te fia talanoa e uiga i ni mea se tolu e mafai ona e faia e lagolago ai ma faalauiloa ai se savali o le tulaga tutusa.
Muamua, taumafai e vaai i isi e ala atu i se vaaiga o le tulaga tutusa. Ina ia faia lenei mea e manaomia ai oe ia faailoa atu muamua faapea e tutusa le alofa o le Tama Faalelagi i Ana fanau uma. Sa Ia faapea mai, “Ia outou fealofani; faapei ona ou alofa atu ia te outou” (Ioane 13:34). E leai se filifiliga, agasala, po o se mea sese e mafai ona e faia pe faia foi e se isi e ono suia ai Lona alofa mo oe po o i latou. E le faapea Na te faatagaina pe le amanaia amioga agasala; e le faapena foi i tatou—ia i tatou lava po o isi. Ae e le faapea tatou te aapa atu ma le alofa e tauanau, fesoasoani, ma laveai.
Pe a tatou lagonaina ua faatumuina ma alofaina atoatoa, e sili atu le faigofie ona alofa i isi ma vaai ia i latou i le ala na faia e le Faaola. Faamolemole ia liliu atu i le Faaola i le tatalo ma ole atu ia maua Lona alofa mama mo oe lava ia faapea ma isi. Ua Ia folafola mai o le a outou lagona Lona alofa pe a outou ole atu i le faatuatua (tagai Moronae 7:48).
O le faatumuina i lenei alofa mama o le a taialaina ai ou manatu ma faatinoga, ae maise lava i mataupu faaupufai o malo na e mafai i nisi taimi ona fefinauai. E mafai ona vave lava le faateleina o le fefinauai pe a tatou talanoaina upufai o malo, ae maise lava pe a tatou talanoa i le saolotoga faalelotu. Afai tatou te faatagaina nei taimi e puleaina a tatou amio, o le a tatou foliga le kerisiano loa i o tatou aiga, uo, tuaoi, ma e masani.
Manatua le ala na taulima ai e le Faaola fesili faigata ma luitau o manatu. Na Ia tumau i le toafimalie, na Ia faaalia le faaaloalo, ma na Ia aoao atu le upumoni, ae Na te lei faamalosia lava se tasi ia ola i le ala na Ia aoaoina atu.
Lona lua, tuu atu i le tulaga tutusa e taialaina le ala e te taulimaina ai isi. E le afaina ia Iesu Keriso po o a ituaiga tagata, mamalu, ma tulaga ina ia aoao ai i latou i le upumoni faigofie. Manatua le fafine Samaria i le vaieli (tagai Ioane 4:5–30), le taitai Roma (tagai Mataio 8:5–13; Luka 7:1–10), ma le telona le aloaia (tagai Luka 18:9–14). Ua poloai mai le Alii ia i tatou e mulimuli i Lana faataitaiga, ma fetalai mai, “Ia e mulimuli mai ia te au, ma fai mea ua outou vaai ua Ou faia.” (2 Nifae 31:12). Aua le faamasinoina tagata pe taulimaina i latou i le tulaga e le tutusa ona latou te faia agasala eseese nai lo oe, po o i tatou.
Atonu o le luitau silisili i le taulimaina o isi ia tutusa o loo i le paleni e manaomia i le lagolagoina o le saolotoga faalelotu pe a i ai ni au uo po o tagata o aiga e aafia i le tosina i le itupa e tasi po o e lagolago malosi aia tatau o le TAILU. O nisi o outou e popole o le a outou foliga e le onosai pe le lagolagoina pe afai tou te saili puipuiga e faatino lou faatuatua faalauaitele ma saoloto.
Ma le isi, suesue i le soifuaga o lo tatou Faaola ma saili Lana taitaiga. Na faaalia lelei e le Faaola le ala e aapa atu ai i le alofa ma le faamalosiauga ao taofi mau pea i le mea ua tatou iloa e moni. Manatua ina ua maua le fafine ua mulilua, na fesili atu le Alii mo soo se tasi e aunoa ma se agasala e laa atu i luma ma avea ma tagata muamua e faasalaina o ia. Ina ua leai se tasi na alu atu, o lo tatou Faaola, o le leai se agasala, na fetalai atu, “Ou te le faasala foi ia te oe: alu ia oe, aua e te toe agasala” (Ioane 8:11). O le faamagalo ma le agalelei na Ia faaalia ia te ia na le feteenai ma Ana aoaoga faapea o fegalegaleaiga faafeusuaiga ua tatau mo se tane ma se ava ua faaipoipo aloaia ma faaletulafono. O oe foi e mafai ona tumau i le sao ma le upumoni ae aapa atu pea i le agalelei.
Ina ua faamutaina e uo a Keriso ma au soo lo latou sootaga ma Ia, na Ia faaleoina le faanoanoa ma le tiga. Ae ui i lea, pe a faamutaina se sootaga, ona o isi ua le fiafia i Ana aoaoga, ae le faapea ona ua le fiafia o Ia i isi.
A o tatou saili e taulimaina isi ma le tulaga tutusa, e tatau ona tatou manatua le mataupu faavae o le faitalia. E tatau ona tatou faaaloalo pea i le gafatia o isi e faia ni filifiliga ma talosagaina ia latou tuuina mai lena faaaloalao e tasi ia i tatou. Pe a talanoa atu i isi e uiga i le saolotoga faalelotu, e tatau ona tatou manatua pea e mafai ona tatou le ioeina e aunoa ma le faatiga. Faamolemole aua le matamuli mai se talanoaga e faatatau i nei mataupu taua ona faapea e te popole atonu e faigata pe le toafimalie. E mafai ona tatou tatalo mo le fesoasoani, ma e mafai ona tatou faamoemoe o le a fesoasoani le Faaola ia i tatou e tautala pe faatino i se ala e faafiafiaina ia te Ia.
Lona tolu, tu atu mo le tulaga tutusa pe a e vaai i aia tatau a isi ua afaina. O Elder L. Tom Perry (1922–2015) o le Korama a Aposetolo e Toasefululua na avea o se faataitaiga maoae o se tasi na talitonu mausali i le faaipoipoga a le alii-tamaitai, ma na ia naunautai e tu atu mo aia tatau a isi. Na ia tuua se faataitaiga o le mautinoa o aia tatau a isi na puipuia pe a ia molimauina le faia le tutusa po o se le paleni i le tulafono.
Mai le taimi o Iosefa Samita i o tatou aso, o la tatou talatuu o le aapa atu e faamalolo manua ma tiga e aunoa ma le suia o le aoaoga faavae lena e le o sa tatou e suia.
Ia Faaaofia Moni Lava
Ona oo mai ai lea i lou manatu mulimuli, ma o le manaomia ona faaaofia moni lava mai lau tupulaga i lenei mataupu. Ou te tu faatasi ma taitai o le Ekalesia a lo tatou Alii pe a ou fai atu tatou te manaomia le malamalama moni lava o lau tupulaga o le agalelei, faaaloalo, ma le tulaga tutusa. Matou te manaomia lo outou manatu lelei ma lo outou naunautai e faatautaia ai nei mau manatu lautele.
E i ai lo matou faatuatua o le a outou liliu atu i le Faaola ia malamalama ai pe faapefea ona ola faapei o le soifuaga o le Faaola ao faapea ona faaalia le tulaga tutusa ma le alofa i isi o e le tutusa tou talitonuga. Matou te iloa tou te mananao ia avea o se vaega o se mea e taua, ma matou te iloa tou te malolosi ma feoeoeai.
O le mea e sili le taua, matou te manaomia outou ia auai i talanoaga e faatatau i le faigata o lenei mataupu ma sue fofo mo le ala sili e tuuina atu ai le tulaga tutusa i tagata uma, e aofia ai tagata faatuatua. O nei talanoaga e manaomia le faia i a tatou aoga, i o tatou aiga, ma ia tatou sootaga ma uo ma tagata faigaluega.
Pe a e faia nei talanoaga, faamolemole manatua nei mataupu faavae: vaai i isi e ala i se vaaiga o le tulaga tutusa, taulimaina i latou ma le faaaloalo ma le agalelei, ma faamoemoe le faiga lava lea e tasi e toe faaalia mai.
O se Faateleina o le Alofa
Mulimuli, ou te fia tuua outou ma lau mau ma lau molimau ma faapea atu ao outou mulimuli i le valaaulia e aapa atu i isi i se agaga o le tulaga tutusa, o le a outou lagonaina se faateleina o le alofa o le Faaola mo outou ma fanau uma a le Tama Faalelagi. O lau faataitaiga o le faaaloalo ma le tulaga tutusa o le a tatala ai faitotoa ma fatuina ni faauoga anoa na o le a e faamemelo ai i lou olaga atoa.
Ou te molimau atu ia te outou o loo soifua le Tama Faalelagi, ma Na te silafia oe, ma e alofa patino lava o Ia ia te oe. Ua saunia o Ia e fesoasoani ia te oe. Ua Ia faaalia Lana fuafuaga ia i tatou e le gata ina ia mafai ona tatou toe foi atu ma ola faatasi ma Ia e faavavau ae ia faamanuiaina foi i tatou ma fiafia i lenei olaga. Ao e mulimuli i Ana aoaoga ma ao e aapa atu i le alofa ma manatu i isi, o le a e lagonaina atili ai lava Lona mana ma le alofa.