Mai le Misiona
Alu e Vaai Repeka
E alala le tusitala i Iuta, ISA.
Na leai se tasi na sau i le faitotoa ina ua ma tuitui atu, ae na ma iloaina na auina atu i maua e fesoasoani i se tasi o fanau a le Atua.
Sa ou i ai mo ni nai masina i lau misiona i le Misiona a Ilinoi Sikako i Saute ma o loo auauna pea i lau eria muamua. O le eria a tamaitai faifeautalai e sosoo ma maua na faatoa tapuni talu ai nei lava, ma o lea na i ai ia i maua le tiutetauave mo tagata suesue uma e tautatala faaSipaniolo mai lena eria. I na tagata, na i ai se tamaitai e suafa ia Repeka.
O le taimi muamua na matou feiloai ai ma Repeka, na ou ofo lava i lona faatuatua. Na nofo o ia i le vaega i lalo o se fale, o lea sa tatau ai ona ma tuitui i ona faamalama mo ia e sau ai e tatala le faitotoa mo maua. O faifeautalai muamua na amata ona aoaoina o ia ina ua ia talosaga mai mo se vitio Finding Faith in Christ. Ana le valaau mai o ia mo se vitio, atonu e le maua lava o ia e faifeautalai.
Na mafai ona ou iloaina mai mea na ia tau mai ia i maua o Repeka na faigata lona olaga. Na i ai se taimi na avea ai o ia ma se tagata fiafia tele, ae o lenei ua faaesea o ia mai lana tama tama ma isi tagata o le aiga. E ui sa i ai o ia i ni tulaga maualalo, na ou lagonaina le alofa o le Alii mo ia.
Ao ma aoaoina o ia, na mafai ona ou iloaina na ia lagonaina le Agaga. O a ma asiasiga na sili atu ai lona fiafia. Ae paga lea, na nofo mamao ese o ia, ma na faigata ona asia soo o ia e pei ona ma mananao ai.
I se tasi Aso Faraile ao faia le matou konafesi faalesone, na ma fuafua e o atu i lena vaega o le ma eria mulimuli ane aua o lea ua afa le mamao mai le mea o loo ma i ai. Na ma fesili ia Repeka pe o le a i ai o ia i le fale, ae na ia fai mai o le a faigaluega o ia. Na ma filifili o le a ma asiasi atu pea i isi a ma tagata suesue na i ai i le eria.
Na iu ina i ai se ma taimi o totoe iina, ma na ma le mautinoa po o lea le mea e fai. Ona fai mai lea o lau soa, “Ou te manatu e tatau ona ta o e vaai pe o i ai Repeka i le fale.” O lenei fautuaga na foliga mai e leai se uiga ia te au aua na tau mai e Repeka ia i maua o le a le i ai o ia i le fale. O le taimi lea na ou faalogo ai i se leo o tau mai ia te au, “Toe foi ma asiasi ia te ia.” Na ou lagonaina e pei o lou tino na tosoina moni lava i le itu o loo i ai le fale o Repeka. O se uunaiga sili lea ona malosi na ou lagonaina.
Na ou tau i lau soa e toe liliu le taavale, ma ma o atu loa i le fale o Repeka. Na ma tuitui faalua i faamalama, ma na leai se tasi na tali mai. Na ou matuai faanoanoa lava aua na ou iloaina e tatau ona i ai se mafuaaga na auina atu ai i maua e le Alii. Na ou fautua atu ma te toe tuitui tasi lava. Na ma faatalitali, ma o le taimi lava na ma sauni ai e o ese, na tatala mai ai e Repeka le faitotoa.
Na i ai o ia i le fale aua faatoa tuli lava o ia mai lana galuega, ma na ia manaomia moni lava se tasi e talanoa i ai. Na tatalo o ia ina ia ma o mai. Na ia tau mai ia i maua o i maua o ana agelu. Na mafai ona ma talanoa ia te ia ma faia o ia ia maua se lagona sili atu e ala i le aoaoina atili o ia e uiga i le talalelei.
Ou te matuai fiafia lava e popole alofa le Tama Faalelagi mo Ana fanau taitoatasi ma na faafofoga i le tatalo a Repeka, ma ou faafetai na ma mulimuli i le uunaiga e o e asiasi ia te ia, ina ia avea ai i maua ma lena tali. E silafia e le Tama Faalelagi mea uma o loo tutupu i olaga o i tatou taitoatasi, ma pe a tatou faalagolago ia te Ia ma ole atu i le faatuatua, o le a fesoasoani o Ia ia i tatou i mea tatou te manaomia.